Den gheheelen Bybel, Inhoudende het oude ende nieuwe Testament (Leuvense bijbel 1548)

Het .ij. Capittel.

1

⁺DIe man Elimelech hadde eenen maech die een machtich man was, ende van grooten rijcdommen ghenaemt Booz,

+ A

2

Ende Ruth die Moabitinne seyde tot haer mans moeder. Eest dat ghijt ghebiet, soo sal ick te velde gaen ende vergaderen die aren, die achter der maeyers handen blijuen daer ick ergers vinden mach die gratie van eenen ghenadigen vader des huysghesins te mywaerts, Ende sij antwoorde. Gaet henen mijn dochter,

3

Aldus is sij wech ghegaen, ende heeft die aren vergadert achter die rugghen vanden maeyers, Ende het gheuiel dat dien acker toebehoorde den man Booz ghenaemt, die van Elimelechs gheslachte was,

4

Ende siet hy quam van Bethlehem, ende seyde tot die maeyers, Die Heere sij met v, Die welcke hem antwoorden. Die Heere moet v ghebenedijden,

5

Eude Booz seyde tot den ionghe die ouer die maeyers ghestelt was Wiens is dese ionghe dochter?

6

Ende hy antwoorde hem. Dit is die Moabitinne, die met Noemi comen is van dat Moabiters lant,

7

ende sij heeft ghebeden dat sij soude moghen die achterblijuende aren vergaderen, volghende die voetstappen vanden maeyers, ⁺Ende van smorgens tot nv toe, blijft sij opt velt, ende sij en heeft niet een weynich tijts, wederom thuys ghegaen

+ B

8

Ende Booz seyde tot Ruth. Hoort dochter, en gaet op gheen ander velt om te vergaderen, noch en gaet van deser plaetsen niet, maer blijft by mijn ionghe dochters,

9

Ende volcht die daersij maeyen. Want ick heb mijnen knechten gheboden dat v niemant moeylijck en sij, Maer oock eest dat ghy dorst crijcht, soo gaet tot die paxkens ende drinct water daer die knechten afdrincken,

10

Die welcke op haer aensicht nederuallende ende aenbiddende opder aerden seyde tot hem. Waer af coemt my dit, dat ick gratie soude vinden voor v ooghen, ende dat ghy v gheweerdighen soudt my te kennen een vreemde vrouwe?

11

Der welcker hy antwoorde. Het is my al te kennen ghegeuen, wat ghy ws mans moeder ghedaen hebt nae die doot van uwen man, ende dat ghy v ouders verlaten hebt, ende dlant daer ghy in gheboren sijt, ende comen sijt tot een volck dwelck ghy te voren niet en kendet,

12

Die Heere moet v loonen voor v werck, ende ghy moet vollen loon ontfangen vanden Heere den Godt van Israhel, tot wien ghi comen sijt, ende onder wiens vloghelen ghy gheuloden sijt,

13

Ende sij seyde. Ick heb gratie gheuonden voor uwen oogen mijn Heere, ⁺die my vertroost hebt ende ghesproken tot dat herte van uwer dienstvrouwen, die niet en ben ghelijck een van uwen dienstvrouwen,

+ C

14

Ende Booz heeft tot haer gheseyt. Alst etens tijt sal wesen, soo coemt herwaerts, ende eedt broot ende dopt uwen bete inden edick, Aldus soo is sij gheseten aen die sijde vanden maeyers,ende sij maecte eenen vrij voor haer seluen, ende si heeft gheten ende is versaet gheworden, ende si nam wech die bleuelingen,

15

ende stont op van daer, dat si die aren soude vergaderen na de ghewoonte, Maer Booz beual sinen knechten, seggende. Al waert oock dat si wilde met v lieden maeyen, soo en verbiet haer dat niet,

16

ende van uwen scoouen werpt al willens wat besiden, ende laet dat ligghen, op dat si sonder scaemte mach rapen ende niemant en berispe haer als si raept.

17

Aldus soo heeft si opt velt vergadert totten auont tot, ende dat si vergadert hadde met eender roeden wtslaende ende wt dorsschende, vant si by nae een ephi mate dat sijn drij vaten ghersten,

18

het welcke sij draghende is wederom gegaen ter stadt, ende si toondet haers mans moeder, daer en bouen soo bracht si ooc voorts ende gaf haer van die bleuelingen van haerder spijsen, daer si mede versaet hadde gheweest,

19

Ende haers mans moeder seyde tot haer. Waer hebdy heden gheraept, ende waer hebdy ghewracht? ghebenedijt moet hy sijn die v barmhertich gheweest is, ⁺Ende si seyde haer by wien dat sij ghewracht hadde, ende sij seyde des mans naem, dat hi Booz hiet,

+ D

20

Der welcker heeft Noemi gheantwoort. Ghebenedijt moet hy sijn van den Heere, want die selue gratie die hy den leuende hadde ghedaen, heeft hy oock ghehouden den dooden, Ende wederom seyde sij. Dese man is ons naemaesscap,

21

Ende Ruth dat (seyt sij) heeft hy my oock beuolen dat ick soo langhe by sijn maeyers blijven soude, tot dat alle het coren ghemaeyt waer,

22

Tot die welcke haers mans moeder heeft gheseyt. Tis beter mijn dochter, dat ghy met sijnen dienstmaechden wt gaet om te maeyen, op dat v niemant en wederstae in eens anders acker,

23

Aldus so is sij bleuen by die dienstmaechden van Booz, ende sij heeft soo langhe met hen ghemaeyt, tot dat die gherste ende die tarwe in die schuere ghedraghen waren.