Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ALdus sijn alle die kinderen van Israhel wt ghetrocken ende tsamen vergadert, als een man, van Dan tot Bersabee toe, ende tot dat lant van Galaad, tot den Heere in Maspha,

+ A

2

ende alle die hoecken der volcken, ende alle die gheslachten van Israhel, sijn tsamen comen in die vergaderinghe van Godts volc vier hondert duysent strijtbaer mannen te voete,

3

Ende die kinderen van Beniamin hebben vernomen dat die kinderen van Israhel te Maspha opcomen waren, Ende die Leuijt der vrouwen man die daer gedoot was, onderuraecht sijnde in wat manieren soo groote boosheyt bedreuen is gheweest,

4

heeft gheantwoort. Ic quam te Gabaa Beniamin met mijnder huysvrouwen, ende daer ben ick ghegaen ter herberghen,

5

ende siet des nachts hebben die luyden van dier stadt het huys omleyt daer ic in was ter herbergen, willende my dooden, ende mijn huysvrouwe met een onghelooffelijcke rasernie der onsuyuerheyt quellende, die daer nae ghestoruen is,

6

Die welcke ick heb ghegrepen ende in stucken ghehouwen, ende heb die deelen ghesonden tot alle die palen van uwer besittingen, want noyt sulcken ontsprekelijcke boosheyt ende soo groote onsuyuerheyt ghedaen en is in Israhel.

7

Ghi sijt alle hier ghi kinderen van Israhel, gheeft vonnisse wat dat ghi behoort te doen,

8

Ende alle tvolck staende heeft gheantwoort als metten woorde van eenen mensche. Wy en sullen in ons tabernakelen niet wech gaen, noch een ieghelijc en sal in sijn huys niet gaen,

9

⁺Maer wij sullen dit tsegen Gabaa int ghemeyn doen,

+ B

10

Laet thien mannen kiesen wt hondert, wt alle die gheslachten van Israhel, ende hondert van duysent, ende duysent van thien duysent dat sij den heyre moghen victalie aenbrenghen, ende dat wij moghen strijden teghen Gabaa Beniamin, ende hen loonen voor dat groot misdaet dat sij verdient hebben,

11

Ende gheheel Israhel is vergadert aen die stadt al oft een mensch hadde gheweest met eender meyninghen ende met eenen raet,

12

ende sij hebben boden ghesonden aen alle dat gheslachte van Beniamin, die segghen souden. Waerom is sulcke onsprekelijcke boosheyt onder v lieden beuonden,

13

Leuert die luyden van Gabaa, die dit leelijc feyt bedreuen hebben dat sij steruen, ende dat sulck quaet mach van Israhel wech ghedaen worden, Maer sij en hebben niet willen hooren nae dat ghebodt van haren broeders der kinderen van Israhel,

14

maer wt alle die steden die van haren erfdeel waren sijnder tsamen comen te Gabaa, dat sij hen souden te helpe comen, ende tseghen alle dat volck van Israhel strijden

15

Ende daer sijn gheuonden van Beniamin vijfentwintich duysent mannen die swaert wt trocken sonder die inghesetenen van Gabaa,

16

die welcke waren seuen hondert seer stercke mannen soo wel metter slincker hant als metter rechter hant vechtende, ende soo sekerlijck steenen worpende met die slinghere dat sij oock een hayr souden hebben connen raken, ende dat den steen gheensins besijden vlieghen en soude.

17

⁺Ende vanden kinderen van Israhel, sonder die kinderen van Beniamin sijnder gheuonden vier hondert duysent die swaert wt trocken ende bereyt waren ten strijde,

+ C

18

Die welcke opstaende sijn ghecomen int huys Godts, dat is in Silo, ende hebben den Heere gheuraecht ende gheseyt. Wie sal in ons heyr die prince des strijts wesen teghen die kinderen van Beniamin? Totten welcken die Heere heeft gheantwoort Laet Iudas v leytsman wesen,

19

Ende ter stont die kinderen van Israhel smorgens vroech opstaende hebben haer legheren ghemaect bi Gabaa,

20

ende van daer voorts ten strijde treckende teghen Beniamin hebben sij die stadt begonst te bestormen,

21

Ende die kinderen van Beniamin comende wt Gabaa hebben op dien dach verslagen vanden kinderen van Israhel tweentwintich duysent mannen.

22

Ende die kinderen van Israhel wederom betrouwen hebbende in hen vromicheyt ende groote menichte, hebben haer slachoorden ghestelt ten strijde op die selue plaetse daer sij te voren ghestreden hadden,

23

alsoo nochtans dat sij te voren opghingen ende weenden voor den Heere totten nacht toe, ende hem vraechden ende seyden. ⁺Moet ick voorts noch ten strijde gaen tegen die kinderen van Beniamin mijn broeders, oft niet, Totten welcken hy gheantwoort heeft. Trect opwaerts tot hen, ende bestaet te strijden.

+ D

24

Ende als die kinderen van Israhel des anderen daechs teghen die kinderen van Beniamin ten strijde ghegaen waren,

25

soo sijn die kinderen van Beniamin wt die poorten van Gabaa met eenen ghedruysch ghecomen, ende hen te ghemoete comende hebben sij soo grooten moort in henlieden ghedaen, dat si nederwierpen achtien duysent mannen, die alle swaert wt trocken.

26

Om welcke saken sijn alle die kinderen van Israhel ghecomen in dat huys Godts, ende sittende weenden sij voor den Heere, ende sij hebben dien dach gheuast tot den auont toe, ende hebben hem gheoffert heelbrantofferanden ende vreedsamighe offeranden,

27

ende hem gheuraecht van haren staet, Op dien tijden was daer die arcke des Heeren,

28

ende Phinees die sone van Eleazarus Aarons sone die ouerste vanden huyse. Hierom hebben sij den Heere gheuraecht ende gheseyt. Sullen wij noch meer moeten wt trecken ten strijde tegen die kinderen dan Beniamin onse broeders, oft rusten? Totten welcken heeft die Heere gheseyt. Trect opwaerts, want morghen sal ick die in v handen leueren,

29

Ende die kinderen van Israhel hebben laghen gheleyt rontsomme der stadt van Gabaa,

30

ende si hebben ter derder reysen hen heyr wtghebracht ende ghestelt teghen Beniamin ghelijc sij ter ierster ende tweeder reyse ghedaen hadden,

31

⁺Ende die kinderen van Beniamin sijn seer stoutelijck met eenen ghedruysch wter stadt gheloopen, ende hebben haer vianden (die vluchtich waren) verre veruolcht also dat sij die sommighe van hen quetsten, als opden iersten ende tweetsten dach, ende dat sij die sloeghen door twee weghen den rugghe keerende, waer af den eenen ghinck nae Bethel ende den anderen nae Gabaa, alsoo dat sij nederwierpen omtrent dertich mannen,

+ E

32

want sij meynden dat sij nae die ghewoonlijcke maniere wijcten, Die welcke veynsden hem listelijc als oft sij gheuloden hadden ende ouerdroeghen dien raet, dat sij die souden verre vander stadt aftrecken, ende als vluchtighe hen brenghen tot die voorseyde weghen toe.

33

Aldusdan alle die kinderen van Israhel opstaende wt haren plaetsen, hebben hen slachoordenen ghestelt ter plaetsen die ghenoemt is Baalthamar, Ende die laghen die omtrent der stadt waren begonsten hem allinxkens te ontdecken

34

ende voorts te comen van die westsijde der stadt, Maer oock die

[p. *217]

ander thien duysent mannen van gheheel Israhel hebben die inghesetenen der stadt beroepen ten strijde, Ende den strijt is seer swaer gheworden teghen die kinderen van Beniamin, ende sij en mercten niet dat hen die doot van alle sijden naecte,

35

Ende die Heere heeftse gheslagen in dat aenscijn der kinderen van Israhel, ende sij hebben verslagen op dien dach van haer lieden vijfentwintich duysent, ende hondert mannen alle vechtende mannen ende swaert wt treckende.

36

⁺Maer als die kinderen van Beniamin sagen dat sij die nederlaghe hadden, soo begonsten sij te vlieden.

Het welck die kinderen van Israhel siende hebben hen plaetse ghemaect om te vlieden, om dat sij comen souden tot die bereyde laghen, die welcke sij by die stadt gheleyt hadden,

+ F

37

Ende als die onuersiens opghestaen waren wt die plaetsen daer sij verborgen lagen ende Beniamin den rugghe keerde den ghenen diese sloeghen, soo sijn sij in die stadt ghegaen, ende hebben die al verslaghen met dat scerp vanden sweerde,

38

Maer die kinderen van Israhel hadden een teeken ghegeuen den ghenen die sij in die lagen ghestelt hadden, dat sij tvier ontsteken souden als sij die stadt inghenomen hadden, op dat sij (als den roock hooghe opghinck) toonen souden dat die stadt inghenomen was,

39

Ende als die kinderen van Israhel dat saghen die inden strijt waren ghestelt (want die kinderen van Beniamin meynden dat sij gheuloden hadden ende sij veruolchdense te neerstelijcker van haren heyr dertich mannen verslagen hebbende)

40

ende hebben ghesien vander stadt opgaen ghelijck een columne van roock, Ende Beniamin ooc achterwaerts omme siende, doen hy sach dat die stadt inghenomen was, ende dat die vlammen hooghe op ghingen,

41

soo hebben die ghene die hem te voren veynsden als oft sij gheuloden hadden met omghekeerden aensicht vromelijcker wederstaen. Als dit die kinderen van Beniamin sagen, soo sijn sij ghekeert ter vlucht,

42

ende begonsten te gaen nae den wech ter woestijnen,ende derwaerts veruolchden hen haer vianden oock, ende die de stadt aenghesteken hadden quamen hen oock teghen,

43

Ende alsoo eest gheschiet dat sij aen beyde die sijden van haren vianden gheslagen worden, alsoo dat den steruende gheen ruste en worde ghegeuen, ⁺Ende sij sijn gheuallen ende verslagen aen die oostsijde der stadt van Gabaa,

+ G

44

Ende der gheender die in die selue plaetse verslaghen waren, wasser achtien duysent, alle gader seer stercke vechtende mannen,

45

dwelc als ghesien hadden die daer ouerbleuen waren van Beniamin, soe vloden sij in die woestijne ende ghingen nae die steenrootse die Remmon ghenoemt wort, Ende in die vluchte hebben si die onghescictelijck loopende, ende nae versceyden plaetse treckende vijf duysent mannen verslaghen, Ende doen si noch voorder trocken, soo hebben sij die ooc veruolcht, ende noch ander twee duysent verslaghen,

46

Ende also eest ghesciet, dat alle die van Beniamin op verscheyden plaetsen verslagen waren vijfentwintich duysent vechtender mannen die seer bereedt waren ten strijde.

47

Aldus soo sijnder van alle den ghetale van Beniamin ouerbleuen die ontgaen mochten ende vlieden in die wildernisse ses hondert mannen, ende sij saten in die steenrootse van remmon vier maenden,

48

Ende die kinderen van Israhel wederom ghekeert sijnde hebben al dat in die stadt ouerbleuen was metten swaerde verslagen vanden mans totten beesten toe, ende alle die steden ende dorpen van Beniamin heeft die verslindende vlamme verteert.