Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺OOck soo hebben die kinderen van Israhel in Maspha ghesworen ende gheseyt. Niemant van ons en sal den kinderen van Beniamin een huysvrouwe gheuen van sijnen dochteren,

+ A

2

Ende sij sijn al te samen comen in dat huys Gods in Silo, ende in sijn aensicht sittende totten auont toe, hebben sij haer stemme opghehauen ende met grooten ghehuyl begonst te weenen, seggende.

3

Waerom (Heere Godt van Israhel) is dit groot quaet in v volck ghesciet, datter heden een van onsen gheslachten soude wech ghenomen worden wt ons.

4

Maer tsanderdaechs vroech op staende hebben sij eenen outaer opghericht, ende daer op gheoffert heelbrantofferanden ende vreedsamighe offeranden ende hebben gheseyt.

5

Wie ysser van alle die gheslachten van Israhel, die in des Heeren heyr niet opghetrocken en is? Want si hadden hem seluen met eenen grooten eedt verbonden doen sij waren in Maspha dat sij souden ghedoot worden die daer niet gheweest en hadden,

6

Ende die kinderen van Israhel beweecht sijnde door berou ouer haren broeder Beniamin, hebben begonst te seggen. Daer is een gheslachte van Israhel wech ghenomen,

7

Van waer sullen sij huysvrouwen crijghen? ⁺Want wij hebben int ghemeyn alle gader ghesworen dat wij ons dochters desen niet gheuen en souden,

+ B

8

Daerom hebben sij gheseyt. Wie ysser van alle die gheslachten van Israhel die totten Heere te Maspha niet opghetrocken en is gheweest? Ende daer sijn beuonden die inghesetenen van Iabes Galaad dat sij int heyr niet gheweest en hadden,

9

Ende opden tijt als sij te Silo waren, so en is daer niemant van haerlieden gheuonden.

10

Aldus soo hebben sij thien duysent seer vrome mannen wtghesonden, ende hen beuolen, Gaet henen, ende verslaet die inghesetenen van Iabes Galaad met dat scherp vanden swaerde, soo wel hen huysvrouwen als hen kinderen,

11

ende dit sal wesen dat ghy onderhouden moet. Alle dat manspersoon is, ende alle die vrouwen die mans bekent hebben slaet doot, maer die maechden behoudt te leuen,

12

Ende daer sijn van Iabes Galaad gheuonden vier hondert maechden, die gheens mans bedde bekent en hadden, ende sij hebben die tot die legheren bracht te Silo, int lant van Chanaan.

13

⁺Ende sij hebben boden ghesonden tot die kinderen van Beniamin die daer in die steenrootse van Remmon waren, ende hen gheboden dat sij die maechden ontfanghen souden in vrede,

+ C

14

Ende die kinderen van Beniamin sijn op dien tijt ghecomen ende henlieden sijn huysvrouwen ghegeuen van die dochteren van Iabes Galaad, maer sij en hebben gheen ander vonden die sij hen alsoo hadden moghen gheuen,

15

Ende gheheel Israhel hadde grooten rouwe, ende deden penitentie om datter een gheslachte in Israhel verslagen was,

16

Ende die ouders seyden. Wat sullen wij den anderen doen die gheen huysvrouwen ghecregen en hebben? alle die vrouwen van Beniamin sijn verslagen,

17

ende wij moeten met grooter sorghen ende naersticheyt voorsien, datter een gheslachte van Israhel niet heel en vergae,

18

Want ons dochters en moghen wij hemlieden niet gheuen, om dat wij verbonden sijn met den eede ende die vermaledijdinghe door den welcken wi seyden. Vermalendijt moet hy sijn soo wie van sijnen dochteren dien van Beniamin een huysvrouwe gheeft,

19

Ende sij hebben eenen raet ghenomen ende gheseyt. Siet het is een iarich hoochtijt des Heeren te Silo, welck gheleghen is

[p. *218]

aen den noorden der stadt van Bethel, aen die oostsijde vanden wech die van Bethel gaet tot Sichima toe, ende aen die suytsijde der stadt van Lebona,

20

⁺Ende sij hebben den kinderen van Beniamin beuolen ende gheseyt. Gaet henen ende bercht v in die wijngaerden,

+ D

21

Ende als ghy die dochteren van Silo sult sien, na die ghewoonte voorts comen om dansen te gaen, soo gaet onuersienlijck wt die wijngaerden, ende neemt gheweldelijck van dien elck een huysvrouwe, ende reyst wech int lant van Beniamin,

22

Ende als haer vaders ende broeders sullen comen ende beghinnen teghen v lieden te claghen, ende te kijuen, soo sullen wij hen segghen Wilt ontfermen ouer hemlieden, want sij en hebben die niet metter macht ghenomen, nae trecht van vechters oft verwinners, maer want ghy hen v dochters niet ghegeuen en hebt, als sijt v baden, ende daer is misdaen van uwer sijden,

23

Ende die kinderen van Beniamin hebben ghedaen alsoo hen beuolen was, ende nae hen ghetal soo hebben sij voor hen seluen elck een huysvrouwe ghenomen van die daer dansten, ende sij sijn wech ghetrocken nae hen besittinghe timmerende steden, ende daer in woonende.

24

Ende die kinderen van Israhel sijn oock by haren gheslachten ende familien wederom ghekeert in hen tabernakelen. In dien dagen en was daer gheen coninck in Israhel, maer een yeghelijck dede dat hem recht dochte.

Hier eyndt dat boeck der Rechteren.