Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺DAer is een man gheweest die een Leuijt was woonende op die sijde van dat gheberchte van Ephraim, die een huysvrouwe ghenomen heeft van Bethlehem Iuda,

+ A

2

die welcke hem verlaten heeft, ende is wederom ghegaen tot haers vaders huys te Bethlehem, ende sij bleef by hem vier maenden.

3

Ende haer man is haer gheuolcht, willende sijnen pays met haer maken, ende haer smeeken ende wederom met hem leyden, hebbende in sijn gheselscap eenen ionghe ende twee ezels, ende sij heeft hem ontfanghen ende ghebracht in haers vaders huys. Ende als sijns wijfs vader dat ghehoort hadde, ende hem ghesien hadde, soo is hi hem blijdelijck te ghemoete ghegaen,

4

ende heeft den man omhelst. Ende die behoude sone is in sijns sweers huys bleuen drij daghen ghemeynsaemlijck met hem etende ende drinckende.

5

Maer ten vierden daghe des nachts opstaende heeft hy willen wech reysen, Den welcken sijn sweer heeft ghehouden, ende tot hem gheseyt, Proeft ierstmael een luttelken broots, ende versterct v maghe, ende alsoo suldi reysen.

6

Ende sij sijn tsamen gheseten, ende hebben gheten ende ghedroncken.

⁺Ende die vader vander iongher dochter seyde tot sijnen behouden sone, Ick bid v dat ghy heden hier blijft, ende dat wij tsamen moghen vrolijck wesen.

+ B

7

Maer hi opstaende begonste willen te reysen, Ende niet te min sijn sweer heeft hem met ghewelt ghehouden, ende by hem doen blijuen.

8

Maer alst vroech dach was soo heeft die Leuijt hem bereyt te reysen, Totten welcken sijn sweer wederom, Ic bidde v hertelijc (seyt hy) dat ghy een luttel spijse neemt, v versterckende ende cracht aennemende tot dat den dach sal opghegaen sijn, daer nae suldi reysen. Aldus aten sij te samen,

9

ende die ionghelinc stont op dat hy wech reysen soude met sijnder huysvrouwen, ende met sijnen knecht. Totten welcken die sweer heeft wederom gheseyt, Aenmerct dat den dach nv seer neder is, ende ten auont waert gaet, dus blijft noch heden by my, ende maect eenen blijden dach, ende morghen suldi reysen om nae v huys tte gaen.

10

⁺Maer die behoude sone en wilde sijns sweers woorden niet volghen, maer hy is terstont ghereyst ende comen teghen ouer Iebus, die anders ghenoemt wordt Ierusalem, leydende met hem twee gheladen ezelen, ende sijn concubine.

+ C

11

Ende als sij nv waren by Iebus, soo veranderde den dach inden nacht. Ende die knecht seyde tot sijnen heere, Coemt (bidde ic v) laet ons in dese stadt der Iebuseiten besijden af gaen, ende daer in blijuen.

12

Totten welcken die heere antwoorde, Ick en sal niet ghaen in die stadt van een vreemt volck, die welcke vander kinderen van Israels steden niet en is, maer ic sal voorts gaen tot Gabaa,

13

ende als ic tot daer comen ben, soo sullen wij daer in blijuen, oft emmer in die stadt van Rama.

14

Aldus sijn sij voorby Iebus gheghaen, ende sijn voorts ghetrocken ouer den wech die sij begonst hadden, ende die sonne ghinck hemlieden onder by Gabaa, welc is int gheslachte van Beniamin,

15

ende sij weken daer inne om daer te blijuen. ⁺Ende als sij daer in comen waren, soo saten sij op die strate vander stadt ende niemant en wilde hen ter herberghen ontfanghen

+ D

16

Ende siet daer openbaerde een out man wedercomende wt den velde ende van sijnen wercke tsauonts, die welcke ooc was van tgheberchte van Ephraim, ende woonde als vreemdelinck te Gabaa, ende die luyden van dien lande waren kinderen van Gemini.

17

Ende die oude man sijn ooghen opheffende heeft ghesien den man sittende met sijnen pacxkens op die strate vander stadt, ende hy seyde tot hem, Van waer coemdi? ende waer gaedi henen?

18

Ende hy antwoorde hem,Wij sijn ghereyst van Bethlehem Iuda, ende wij gaen nae ons plaetse, welc is ter sijden vanden berch van Ephraim, van daer wij ghegaen waren tot Bethlehem, ende nv gaen wi nae dat huys Godts, ende niemant en wilt ons onder sijn dack ontfanghen,

19

hebbende caf ende hoy tot voeder vanden ezels, ende broot ende wijn voor my ende uwer dienstvrouwen behoeften, ende voor den ionghe die met my is, ⁺wij en hebben gheens dincs ghebreck, dan alleen herberghe.

+ E

20

Den welcken die oude man heeft gheantwoordt, Vrede sij met v, ick sal v gheuen al dat van noode is, alleen bid ick v dat ghy op die strate niet en blijft.

21

Ende hy leyde hem in sijn huys, ende gaf den ezelen voeder, ende als sij haerlieden voeten ghewasschen hadden, soo heeft hy hen ter maeltijt ontfanghen.

22

Als sij nu etende waren ende nae den arbeyt des reysens haer lichamen vermaecten met spijse ende dranck soo quamen die mannen van dier stadt die kinderen van Belial, dat es sonder bedwanck, ende omlegghende dat huys vanden ouden man, hebben aen die doere begonst te cloppen roepende tot den weert vanden huyse, ende segghende, Brengt den man buyten, die in v huys ghegaen es, dat wy hem misbruyken moghen.

23

⁺Ende die oude man is tot hemlieden buyten ghegaen, ende heeft gheseyt En wilt niet broeders, ende wilt dit groot quaet niet doen, want dese man is in mijn herberghe comen, ende wilt ophouden van dese dwaesheyt,

+ F

24

Ic heb een dochter die noch maghet is, ende dese man heeft een concubine, ic sal die tot v lieden buyten brenghen, dat ghy die vernedert, ende v wellusticheyt volbrenghet, Alleenlick bidde ick, dat ghy dese groote sonde teghen natuere met den man niet en doet.

25

Maer sij en wilden na sijn woorden niet hooren, Dwelc die mensch siende, heeft sijn concubine tot hen buyten ghebracht, ende hy heeftse hemlieden gheleuert om scandelijck te hanteren, ende als sij den heelen nacht die misbruyct hadden, so hebben sij haer des morghens laten gaen.

26

Maer die vrouwe (als die duysternisse wech ghinghen) is comen aen die doore vanden huyse, daer haer heere ghelogeert was, ende daer viel sij neder.

27

Alst nv morghenstont gheworden was, soo is die man opghestaen, ende heeft die doore open ghedaen om dat hy sijnen wech voorts gaen soude die hy begonst hadde, ende siet sijn concubine lach voor die doore met haren handen van een gheslaghen opden dorpel.

28

⁺Tot die welcke hy sprack meynende dat sij gherust hadde, Staet op, dat wij voortgaen moghen. Ende doen sij niet en antwoorde ghewaer wordende dat sij doot was, soo heeft hi haer ghenomen ende op sijnen ezel gheleyt, ende hy is wederom tot sijn huys ghegaen.

+ G

29

Ende als hy daer in comen was, so nam hy een sweert, ende het doode lichaem van sijnder huysvrouwen met sijnen ghebeente in twaelf deelen ende stucken snijdende heeft die ghe-

[p. *216]

sonden in alle die palen van Israhel

30

Ende als si dat elck ghesien hadden, soo riepen sij te samen. Noyt en is sulck dinck ghesciet in Israhel, van dien dach dat ons vaders wt Egipten optrocken tot op desen tijt toe, gheeft het vonnisse ende draghet ouer een tsamen wat hier toe van noode is te doen.