Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺IN dien daghen soo en was in Israhel gheen coninck, ende het gheslachte van Dan socht een besittinghe voor haer dat sij daer in woonen soude, Want tot op dien dach toe soo en hadden sij noch gheen erfdeel ontfanghen onder die ander gheslachten.

+ A

2

Aldus soo hebben Dans kinderen wtghesonden vijue seer stercke mans van haren gheslachten ende familie, van Saraa ende Esthaol, dat sij het lant souden bespieden ende seer naerstelijck besien, ende sij hebben tot hemlieden gheseyt, Gaet henen, ende besiet dat lant. Die welcke als sij reysende comen waren opt gheberchte van Ephraim, ende ghegaen int huys van Michas, soo hebben sij daer gherust,

3

ende kennende die stemme vanden ionghelinck den Leuijt, ende ghebruyckende sijn herberghe, hebben sij tot hem gheseyt, Wie heeft v hier bracht? wat maect ghy hier? by wat saken hebdi hier willen comen?

4

⁺Ende hy heeft hen gheantwoordt, Dese ende dese dinghen heeft my Michas ghedaen, ende hy heeft my om loon ghehuert, dat ic sijn priester wesen soude.

+ B

5

Sij baden hem dat hy van den Heere raet vraghen wilde, ende dat sij weten mochten oft sij oock een gheluckighe reyse deden, ende oft die sake te wercke gaen soude.

6

Ende hy heeft tot hemlieden gheseyt, Gaet henen met vreden, die Heere aensiet uwen wegh, ende v reyse daer ghi henen gaet.

7

Hier om soo sijn die vijf mannen voorts ghaende ghecomen te Lais, ende sij hebben ghesien het volck daer in woonende sonder eenighe vreese, nae die costume vanden Sydoniters, vrij ende gherust, den welcken met allen niemant en wederstont, ende sij hadden groote rijcdommen, ende waren verre versceyden van Sydon ende van alle menschen.

8

⁺Ende als sij weder ghecomen waren tot haren broeders te Saraa ende Esthaol, ende die hen vraechden wat sij ghedaen hadden, soo hebben sij gheantwoordt,

+ C

9

Staet op, ende laet ons tot hen optrecken, want wij hebben daer ghesien een seer rijck ende vruchtbaer lant, en wilt niet traech sijn, en wilt niet ophouden, laet ons gaen, ende dat besitten, ten sal gheenen arbeyt sijn,

10

Wij sullen daer binnen comen, tot een volck dat sonder sorghe is, in een seer breet lant, ende die Heere sal ons die plaetse leueren, daer gheender dinghen ghebreck en is, die wter aerden wassen.

11

Hier om so sijn wech ghereyst die van Dans gheslachte, te weten die van Saraa ende Esthaol ses hondert mannen, omgordt met oorloochsche wapenen,

12

ende optreckende sijn sij bleuen in Cariath-iarim Iude, welcke plaetse van dier tijt voorts heeft den naem ghecreghen, van Dans heirlegher, ende het is achterrugghe van Cariath-iarim.

13

Ende van daer sijn sij voorts ghegaen opt gheberchte van Ephraim. Ende als sij comen waren tot aen Michas huys,

14

so seyden die vijf mannen, die te voren ghesonden waren om te besien het lant van Lais, tot haren anderen broeders ⁺Weet ghy wel dat in dese huysen een Ephod is ende een Theraphim, ende een ghesneden ende ghegoten beelt? Besiet wat v belieft.

+ D

15

Ende als sij een luttelken afgheweken waren, so syn sij ghegaen int huys van den ionghelinc den Leuijt, die in Michas huys was ende sij hebben hem ghegroet met vreedtsamighe woorden.

16

Ende die ses hondert mannen al ghewapent al soo sij waren stonden voor die doore,

17

Maer die ghene die int huys vanden ionghelinck ghegaen waren die arbeydden om wech te draghen dat ghesneden beelt, ende den Ephod ende Theraphim ende dat ghegoten beelt, ende die priester stont voor die doore, die wijle dat die ses hondert seer vrome mannen niet verre van daer verbeydden.

18

⁺Aldus soo hebben dese die binnen ghegaen waren ghehaelt dat ghesneden beelt, den Ephod ende die afgoden ende dat ghegoten beelt. Totten welcken die priester seyde, Wat maecti?

+ E

19

Ende sij hebben gheantwoort, Swijcht ende legt uwen vingher op uwen mont, ende coemt met ons, dat wi v moghen hebben tot eenen vader, ende priester. Wat is v beter dat ghy die priester sijt int huys van eenen man, oft in een gheslachte ende familie van Israhel?

20

Ende als hy dat ghehoort hadde, soo is hy met haren woorden te vreden gheworden, ende hy nam den Ephod, ende die afgoden, ende dat ghesneden beelt, ende hy is met hemlieden ghereyst.

21

Ende als sij wech voorts trocken, ende voor hen hadden doen gaen die cleyn kinderen ende dat vee, ende alle dat costelijc was,

22

ende sij nv verre van Michas huys waren, soo hebben die mans die in Michas huys woonden tsamen roepende hen nagheuolcht,

23

ende hebben achter rugghe begonst te roepen, ⁺Die welcke als sij hem omme ghekeert hadden, soo seyden sij tot Michas, Wat wildi v? Waerom roept ghy?

+ F

24

Die welcke antwoorde, Ghy hebt mijn goden ghenomen die ick voor my ghemaect hadde, ende den priester, met alle dat ic hebben, ende ghy segghet, Wat is v?

25

Ende die kinderen van Dan seyden tot hem, Wacht v dat ghy voorts niet meer en spreect tot ons, ende dat die mannen wt eenen grammen moede tot v niet en comen, ende dat ghy met allen uwen huysghesinne niet vernielt en wordt.

26

Ende alsoo sijn sij dien wech voorts ghegaen die sij begonst hadden. Ende Michas (siende dat sij stercker waren dan hy) is wederom in sijn huys ghekeert.

27

Maer die ses hondert mannen hebben den priester ghenomen ende alle dat wi voerseyt hebben, ende sijn gecomen te Lais, tot een rustende volc ende sonder sorghe, ende sij hebben die metten swaerde verslaghen, ende die stadt verbrant,

28

ende daer en was niemant die hen helpe dede, om dat sij verre van Sidon woonden, ⁺ende dat sij gheen ghemeynscap oft comenscap en hielen met eenighe menschen. Ende die stadt was gheleghen int lant van Rohob. Die welcke sij weder op timmerende, hebben daer in ghewoont,

+ G

29

ende sij noemde die stadt Dan nae haers vaders naem, den welcken Israhel ghewonnen hadde, welcke stadt te voren Lais hiet.

[p. *215]

30

Ende sij hebben voor hen ghestelt dat ghesneden beelt, ende Ioathan Gersams sone, des soens Moysi, ende sijn sonen tot priesters int gheslachte van Dan, tot opden dach van haerder gheuanghenissen toe.

31

Ende dat afgodts beelt van Michas, is hy hemlieden bleuen alle den tijt, dat het huys Godts te Silo was, in dien daghen en was gheen coninck in Israel.