Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺IN dien tijden was een man van dat gheberchte van Ephraim, Michas ghenaemt,

+ A

2

die tot sijnder moeder seyde, Die duysent ende hondert silueren penninghen die ghy voer v wtghesceyden hadt, ende daer ghi ouer gesworen hadt dat ict hoorde, siet die heb ic, ende sij sijn by my. Ende sij seyde, Ghebenedijt moet mijn soen wesen den heere,

3

alsdus soe heeft hy diesynder moeder wederom ghegheuen, die hem gheseyt hadde, Ic heb dit ghelt den heere gheheijlicht ende beloeft, dat mijn sone dit vanmijnder hant ontfanghen soude ende maken eenghesneden ende ghegoten beelt, ende nu leuere ic v dat.

4

Aldusdan gaf hy die sijnder moeder wederom. ⁺Ende sij nam twee hondert silueren penninghen ende gaf die eenen siluersmit dat hy daer af een ghesneden ende ghegoten beelt maken soude, dwelc in Michas huys is gheweest.

+ B

5

Ende hy heeft dien godt ooc een cleyn tempelken daer in besonder ghemaect, ende eenen witten lijfroc, ende eenen Theraphim, dat is een priesterlijck cleedt ghemaect, ende afgoden, ende hy vulde die hant van een sijnder sonen, ende die is sijn priester gheworden.

6

In dien daghen en wasser gheen coninck in Israel, maer een ieghelijck wat hem recht dochte dat dede hy.

7

⁺Ende daer was noch een ander ionghelinc van Bethlehem Iuda van sijnen maesscap, ende die was selue een Leuijt, ende hy woonde daer.

+ C

8

Ende wter stadt van Bethlehem gaende, om erghers als vreemdelinck te woonen, daer hy sijn gherief soude

[p. *214]

moghen vinden. Ende als hy reysende ghecomen was opt gheberchte van Ephraim, ende een luttel int huys van Michas was ter herberghen ghegaen,

9

so vraechde hem Michas van waer hy comen was. Ende hy antwoorde, Ick ben een Leuijt van Bethleem Iuda, ende ick gae om erghers te woonen daer ick sal moghen woonen, ende daer ic sien sal dat my profijtelijck sal wesen.

10

⁺Ende Michas seyde tot hem, Blijft by my, ende weest my een vader ende een priester, Ende ic sal v tot allen iaren gheuen thien silueren penninghen, ende een dobbel cleedt, ende alle dat nootelijc is om te leuen.

+ D

11

Hy heeft te vreden gheweest, ende is by dien mensch bleuen, ende hy heeft hem gheweest als een van sijnen kinderen.

12

Ende Michas vulde sijn hant, ende so hadde hy eenen dienaer die een priester was by hem, segghende,

13

Ick weet nv wel dat Godt my wel doen sal, als ick eenen priester by my hebbe die vanden Leuiten gheslachte is.