Den gheheelen Bybel, Inhoudende het oude ende nieuwe Testament (Leuvense bijbel 1548)

Dat. xvi. Capittel

1

⁺SAmpson is oeck ghegaen te Gaza, ende hy sach daer een ghemeyn vrouwe, ende hij is by haer in ghegaen,

+ A

2

Ende als die Philistijnen dit ghehoort hadden, ende dat die nieumare oueral by hen verbreyt was, dat Samson in die stadt comen was, soe hebben sijhem omleyt, ende wachters in die poorte ghestelt, ende aldaer wachtende met stillicheijt den heelen nacht, dat sij des morghens alst dach waer hem souden dootslaen als hij wtcomen soude.

3

Maer Samson heeft gheslapen totten midder nacht, ende van daer opstaende, heeft hy beyde die doeren vander poorten met haren stijlen ende slote ghegrepen, ende die op sijn scouderen gheleyt, ende ghedraghen tot opt hoochste vanden berghe, die teghen ouer Hebron staet

4

Daer nae heeft hy een vrouwe lief ghehadt die woonde in die valleye van Sorec, ende hiet Dalila.

5

Ende die princen der Philistijnen quamen tot haer, ende seyden, Bedriecht hem, ende verneemt van hem waer in dat hi soo grooten stercheyt heeft, ⁺ende hoe dat wij hem souden moghen verwinnen, ende ghebonden pijneghen, ende eest sake dat ghi dit doet, so sullen wij v elck duysent ende hondert silueren penninghen gheuen.

+ B

6

Hier om soo heeft Dalila tot Samson gheseyt, Ick bid v, segt my doch waer in dat v ouergroote macht gheleghen is, ende waer mede datmen v mocht alsoo binden dat ghy niet en soudt connen ontcomen.

7

Tot die welcke Samson heeft gheantwoordt, Waert sake dat ick met seuen seelen van senuen die noch niet drooghe en waren, maer noch versch, ghebonden ware, soo sal ick onmachtich sijn ghelijck ander menschen.

8

Ende die vorsten der Philistinen hebben tot haer seuen seelen ghebracht alsoo hy gheseyt hadde, met die welcke sij hem ghebonden heeft,

9

wesende by haer verborghen laghen, ende in die camer nae dat eynde van dit dinck wachtende, ende sij riep tot hem, Die Philistijnen comen op v Samson. Ende hy brack die banden ghelijck oft iemant eenen draet brake die van vlas met speecsel ghesponnen is, als die den rueck vanden

[p. *213]

viere ontfanghen heeft, ende aldus en eest niet beuonden, waer in dat sijn sterckheyt was.

10

⁺Ende Dalila seyde tot hem, Siet ghy hebt met my ghespot, ende hebt gheloghen, segt my emmers nv waer mede dat men v binden moet.

+ C

11

Doen antwoorde hy haer, Waert sake dat ick ghebonden waer met nieuwen seelen die noyt in gheen werck gheweest en waren, soo sal ick onmachtich wesen ende andere menschen ghelijck.

12

Ende Dalila heeft hem wederom daer mede ghebonden, ende heeft gheroepen, Die Philistinen comen op v Samson, als die laghen in die camer listelijck ghestelt waren. Ende hy brack die banden ghelijck webben draet.

13

Ende Dalila seyde wederom tot hem, Hoe langhe suldi mij bedrieghen ende loghenen segghen, toont my doch waer mede ghy ghebonden moet sijn, Ende Samson heeft haer gheantwoert, Waert sake (seyt hy) dat ghy seuen haren van mijnen hoofde vlechtedet met eenen dromdraet ende dat ghy eenen naghel daer mede al om ghebonden sijnde, in die aerde vast maectet, soe soude ic ommachtich sijn,

14

Ende als Dalila dat ghedaen hadde, soe seyde sij tot hem, Die Philistijnen sijn op v Samson, Ende hy stont op wt sijnen slaep, ende trock den naghel wt metten haire ende met dien dromdraet,

15

⁺Ende Dalila seyde tot hem, Hoe moechdi segghen dat ghy mij lief hebt, als v herte met mij niet en is? Drijmael hebdi mij gheloghen, ende ghy en hebt my niet willen segghen ware inne dat v ouer groote cracht gheleghen is.

+ D

16

Ende doen sij hem seer quelde ende hem veel daghen lanck altijt aenhinck, gheenen tijt hem gheuende om te rusten, soe worde sijn ziele machteloos, ende hy is totter doot toe vermoeyt worden.

17

Doen opende hy haer die waerheyt vander saken ende seyde tot haer, Noyt en quam ijser opmijn hooft want ic ben een Nazareus dat is gode gheheylicht van mijnder moeder lichaem aen, wordt mijn hooft ghescoren, soe sal mijn stercheyt van mij gaen, ende ic sal cranck worden, ende sijn ghelijck ander menschen,

18

⁺Ende als sij sach dat hy haer alle sijn herte beleden hadde, soe heeft sij ghesonden tot die princen der Philistinen, ende hen ontboden, Coemt noch eens opwaerts, want hy heeft my nv sijn herte gheopent.

Ende sij sijn opwaerts ghecomen, mede nemende het ghelt dat sij beloeft hadden,

+ E

19

Ende sij dede hem slapen op haer knien, ende sijn hooft in haren schoot nederlegghen, Ende sij dede eenen barbier halen ende die schoer seuen van sijnen haireu, ende sij begonste hem wech te drijuen, ende van haer te stooten, want terstont is sijn stercheyt vau hem gheghaen.

20

Ende sij seyde, Die Philistijnen comen op v Samson. Ende hy stont op wt sijnen slaep ende seyde in sijn herte, Ick sal wtgaen also ick te voren ghedaen hebbe, ende sal my daer wtslaen, niet wetende dat die Heere van hem ghegaen was.

21

Den welcken als die Philistijnen gheuanghen hadden, soo hebben sij hem ter stont sijn ooghen wtghesteken, ende hem gheleyt te Gaza met ketenen ghebonden, ende in eenen kercker besloten, ende doen malen.

22

Ende sijn hairen begonsten nv weder te wassen,

23

ende die princen der Philistinen sijn tsamen comen, dat sij seer hooghelijcke offeranden souden offereu haren God Dagon, ende blijde maeltijden houden, segghende, ⁺Ons Godt heeft onsen viant Samson in onse handen gheleuert,

+ F

24

Dwelck het volck oock siende heeft haren Godt oock ghepresen ende het selue gheseyt, Onse Godt heeft onsen viant in ons handen gheleuert, die ons lant verdoruen heeft, ende seer veel verslaghen.

25

Ende blijde sijnde in haren maeltijden, als sij nv goede chiere ghemaeckt hadden soo hebben sij gheboden datmen Samson roepen soude, dat hy voor haerlieden spelen soude. Die welcke wten kercker ghebracht sijnde speelde voor haerlieden, ende sij deden hem staen tusschen twee columnen.

26

Ende hy seyde tot den ionghen die hem leyde Laet my gaen dat ick mach ghenaken die columnen daer alle dat huys op rust, op dat ic daer teghen wat lenen mach, ende een lutel rusten.

27

Ende dat huys was vol mans ende vrouwen, ende daer waren alle die princen der Philistijnen ende van dat dack ende vanden solder omtrent drij duysent menschen beyde mans ende vrouwen siende Samson spelen.

28

Maer hy aenriep den Heere, ende seyde, O Heere mijn Godt weest mijns ghedachtich, ende gheeft my nu wederom mijn ierste sterckheyt, ⁺mijn Godt, dat ick my van mijnen vianden wreken mach, ende dat ick voer tverlies van mijnen twee ooghen een wraeck weder crijghen mach,

+ G

29

ende grijpende beyde die columnen daer het huys op ruste, ende houdende die een met sijn rechte hant ende die ander met die slincke hant,

30

heeft hy gheseyt, Laet mijn ziele steruen met die Philistijnen. Ende als hy crachtelijck die columne tsamen ghestooten hadde, soo is dat huys gheuallen op alle die princen, ende op die ander menichte die daer was, ende hy heefter veel meer steruende ghedoot, dan hy te voren leuende ghedoot hadde.

31

Ende sijn broeders met alle sijn maesscap nederwaerts comende, hebben sijn lichaem ghehaelt, ende dat begrauen tusschen Saraa ende Esthaol in Manue sijns vaders graf, ende hy heeft Israhel recht ghedaen twintich iaer.