Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *212]

Dat .xv. Capittel.

1

⁺MAer nae een luttel tijts als die daghen vanden tarwen oochst aenstaende waren, soo is Samson ghecomen willende sijn huysvrouwe besoecken, ende hy bracht haer een boxken vanden gheyten. Ende doen hy in haer slaepcamer nae ghewoonte wilde ghaen, soo heeft haer vader hem dat verboden segghende,

+ A

2

Ic hadde ghemeynt dat ghy haer ghehaet hadt, ende daer om heb ickse ghegheuen uwen vrindt, maer sij heeft een suster die noch iongher ende scoonder is dan sij, laet die voor haer v huysvrouwe wesen.

3

Ende Samson heeft hem gheantwoordt, Van desen daghe en salt mijn schult niet sijn teghen die Philistijnen, want ic sal v lieden quaet doen.

4

Ende hy is wech gheghaen, ende heeft drij hondert vossen gheuanghen ende bantse steert aen steert, ende int midden van dien heeft hy fackelen ghebonden,

5

die welcke hy metten vier ontstekende heeft laten gaen dat sij herwaerts en derwaerts loopen souden. Die welcke sijn terstont gheloopen int coren vanden Philistijnen. Ende als dat ontsteken was, ⁺soo eest al verbrant, soo wel het coren dat te hoop ghedraghen was, als dat noch op sijn stroo staende was, soo vele dat die vlamme oock verslinde die wijngaerden, ende die olijfgaerden.

+ B

6

Ende die Philistijnen hebben gheseyt, Wie heeft dit dinck bedreuen? Den welcken is gheseyt, Samson die behoude sone vanden Thannathiter, om dat hy sijn wijf hem ontnomen heeft ende die eenen anderen man ghegheuen, heeft dese dinghen ghedaen. Ende die Philistinen sijn opghetrocken, ende hebben verbrant soo wel die vrouwe als haren vader.

7

Ende Samson seyde tot hemlieden, Al hebdi dit ghedaen, nochtens sal ick noch een wrake van v lieden nemen ende dan sal ick rusten.

8

Ende hy sloechse met eenen swaren slach, also dat sij verbaest sijnde hen braeyen op hen dgyen leyden. Ende nederwaerts gaende heeft hy ghewoont in een speluncke der steenrootsen Etam.

9

Hier om sijn die Philistinen opghetrocken int lant van Iuda, ende hebben haren legher ghemaect ter plaetsen die namaels ghenoemt worde Lechi, dat is te segghen een kinnebacken, daer is hen heyr breedt wt ghespraeyt.

10

⁺Ende die van Iuda gheslachte hebben tot hen gheseyt, Waerom sijdi teghen ons opghetrocken? Ende sij hebben gheantwoordt Wij sijn comen om Samson te binden, ende dat wij hem souden betalen dat hy teghen ons ghedaen heeft

+ C

11

Hier om sijnder drij duysent mannen van Iuda neder waerts ghegaen tot aen die speluncke der steenrootsen van Etam, ende sij seyden tot Samson, En weet ghy niet dat die Philistijnen ons ouerheeren sijn? Waerom hebdi dit willen doen? Ende hy heeft tot hen gheseyt, Ghelijck sij my ghedaen hebben, soo heb ick hen ghedaen.

12

Wij sijn comen (seyden sij) om v te binden, ende te leueren in die handen der Philistijnen. Samson seyde tot hemlieden, Sweert my dan ende gheloeft my, dat ghy my niet dooden en sult,

13

Sij seyden, Wij en sullen v niet dooden, maer wij sullen v ghebonden leueren. Ende sij hebben hem met twee nieuwe coorden ghebonden, ende hem alsoo ghebracht wt die steenrootse van Etam.

14

Die welcke als hy comen was ter plaetsen vanden kaexbeen, ende dat die Philistijnen al chrijsschende hem teghen quamen, soo is den gheest des Heeren in hem gheuallen, ende ghelijck dat hout pleech verteert te worden door den rueck des viers, alsoo sijn die banden daer hy mede ghebonden was in stucken gheborsten ende ontbonden.

15

⁺Ende opnemende een kaecke dat is een kaexbeen van eenen ezele dat hy daer vant ligghende, heeft daer mede duysent mans doot gheslaghen,

+ D

16

ende hy seyde, Met die kake van eenen ezel, ende met dat kaexbeen vander ezelinnen vuelen, heb ickse vernielt, ende heb verslaghen duysent mans.

17

Ende als hy dese woorden al singhende volseyt hadde, soo wierp hy dat kaexbeen wt sijnder hant, ende hy noemde die plaetse Ramath-lechi, dats te segghen, die opheffinghe vanden kaexbeen.

18

Ende seer dorstich sijnde, heeft hy totten Heere gheroepen, ende gheseyt, Ghy hebt ghegheuen door ws dienaers handt dese groote verlossinghe ende victorie, ende siet ick sterue van dorst, ende sal vallen in die handen vanden onbesnedenen.

19

Hier om heeft die Heere eenen baecktant in dat ezels kaexbeen open ghedaen, ende daer is veel waters wtcomen. Ende als hy dat ghedroncken hadde, soo heeft hy sijnen gheest vermaect, ende wederom macht ghecreghen, Ende daerom is den naem van dier plaetsen ghenaemt die fonteyn des aenroepers vanden kaexbeen tot opden dach van heden toe.

20

Ende hy heeft Israhel recht ghedaen ten tijde van den Philistijnen twintich iaren.