Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ALdus is Samson nederwaerts ghegaen in Thamnatha, ende siende daer een vrouwe vander Philistijnen dochters,

+ A

2

is hy opwaerts comen, ende heeft dat sijnen vader ende sijnder moeder te kennen ghegheuen, segghende, Ick heb een vrouwe ghesien in Thamnatha vanden Philistijnen dochteren, Die welcke ick bidde dat ghy my wilt nemen tot een huysvrouwe.

3

Tot wien sijn vader ende moeder hebben gheseyt, En isser gheen vrouwe onder uwe broeders dochteren, ende onder allen v volck, dat ghy wilt een huysvrouwe nemen van die Philistijnen die ombesneden sijn? Ende Samson heeft tot sijnen vader gheseyt, Neemt dese voor my, want sij heeft mijnen ooghen behaecht.

4

Maer sijn ouders en wisten niet dat dit dinc van den Heere gheschiede, ende dat hy een oirsake socht tseghen die Philistijnen, want in dien tijden hadden die Philistijnen heerschappie ouer Israel.

5

Hierom so is Samson nederwaerts gheghaen met sijnen vader ende moeder in Thamnatha. Ende als sij ghecomen waren aen der stadt wijngaerden, soo is daer ghesien een ionck welpen van eenen leeuwe, wreet ende brieschende, ende quam hem teghen.

6

⁺Maer den gheest des Heeren viel haestelijck in Samson, ende hy verscoerde den leuw, rechtoft hy een ionck boxken in stucken ghetrocken hadde, niet met allen in sijn handen hebbende, ende dit en heeft hy sijnen vader ende moeder niet willen te kennen gheuen.

+ B

7

Ende hy is nederwaerts ghegaen, ende heeft die vrouwe aenghesproken die sijnen ooghen behaecht hadde.

8

Ende nae sommighe daghen wederom comende dat hy haer trouwen soude, soo ghinck hy besijden vanden wech af, om te besien dat doode lichaem vanden leeuwe, ende siet daer was eenen swerm bien in den muyl vanden leeuwe, ende honichraten.

9

Die welcke als hy in sijn hant ghenomen hadde, soo adt hy die onder weghen, ende comende by sijn vader ende moeder, heeft hy hen een deel ghegheuen, ende sij hebben dat gheten, Nochtans en wilde hy hen niet segghen, dat hy dit honich wt dat lichaem vanden leuw ghenomen hadde.

10

Aldus is sijn vader nederwaerts ghereyst totter vrouwen, ende hy heeft Samson sijnen sone eenen maeltijt bereyt, want alsoo pleghen die ionghelinghen te doen.

11

⁺Hierom als die borghers van dier stadt hem ghesien hadden, soo hebben sij hem dertich ghesellen ghegheuen die met hem sijn souden.

+ C

12

Totten welcken Samson seyde, Ick sal v een gheraetsel te voren legghen, ende eest sake dat ghy my dat cont gheraden binnen die seuen daghen van deser bruyloft maeltijden, soo sal ick v dertich fijn lijnen hemden gheuen, ende alsoo veel ouercleederen,

13

maer eest sake dat ghy dat niet en cont gheraden ende verclaren, so suldi mi dertich fijn lijnen hemden gheuen, eude soo veel ouercleederen. Die welcke hebben tot hem gheseyt, Brenct voorts v gheraetsel, en latet ons hooren.

14

Ende hy heeft tot hemlieden gheseyt, Wt den etende is spijse ghecomen, ende wt den stercken is sueticheyt ghegaen. Maer sij en conden binnen drij daghen dat gheraetsel niet gheraden.

15

Ende als den seuensten dach ghecomen was, soo hebben sij tot Samsons huysvrouwe gheseyt, Smeect uwen man, ende onderwijst hem, dat hy v te kennen gheue wat dit gheraetsel beteekent. Oft eest dat ghi dit niet doen en wilt, soo sullen wij v ende ws vaders huys verbranden. Oft hebdi ons daer om ter bruyloft gheroepen dat ghy ons beroouen soudt?

16

⁺Ende sij storte tranen by Samson, ende claechde, segghende, Ghy haet my ende ghy en hebt my niet lief, ende daer om het gheraetsel dat ghy den kinderen mijns volcs te voren gheleyt hebt en wildi my niet wtlegghen. Ende hy antwoorde, Ick en hebs mijnen vader ende mijnder moeder niet willen segghen, ende sal ict v moghen segghen?

+ D

17

Hier om soo weende sij voor hem die seuen daghen vander bruyloft maeltijden lanck, ende ten lesten op den seuensten dach als sij hem seer quelde, soe heeft hijt verclaert. Ende sij heeft dat terstont haren borghers te kennen ghegheuen.

18

Ende sij hebben hem dat gheseyt op den seuensten dach voor der sonnen onderganck, Wat is sueter dan honich? en wat is stercker dan eenen leuwe? Die welcke seyde tot hen, En haddi met mijn veers calf niet gheackert, ghy en soudt mijn gheraetsel niet gheuonden hebben.

19

Aldus soo is den gheest Godts haestelijck in hem gheuallen, ende hy is nederwaerts ghetrocken tot Ascalon, ende heeft daer dertich mans verslaghen, Der welcker cleederen af ghenomen hebbende, heeft hy die ghegheuen den ghenen die sijn gheraetsel gheraden hadden. Ende bouen maten seer gram sijnde, is hy weder om opwaerts ghegaen tot sijns vaders huys.

20

Maer sijn huysvrouwe heeft eenen man ghenomen, een van sijnen vrinden, die ouer die bruyloft gheweest hadden.