Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde die kinderen van Israel hebben weder om quaet bedreuen voor dat aensicht des Heeren, ende hy heeftse gheleuert inder Philistijnen handen veertich iaren lanck.

+ A

2

Maer daer was een man van Saraa ende wt Dans gheslachte Manue ghenoemt, hebbende een onuruchtbaer huysvrouwe,

3

der welcker een enghel des heeren openbaerde, ende seijde tot haer, Ghy sijt onuruchtbaer, ende sonder kinderen, maer ghy sult ontfanghen ende baren eenen sone,

4

daerom wacht v dat ghy gheenen wyn, oft sicere en drinct, ende dat ghy niet onsuyuers en etet,

5

want ghy sult ontfanghen ende baeren eenen sone, wiens hooft gheen scaers ghenaken en sal, Want hy sal van sijnder kintscheyt ende wt sijns moeders lichaem een Godts Nazareus wesen, ende hy sal Israhel beghinnen te verlossen wt der Philistinen hant.

6

Die welcke als sij by haren man comen was, soo heeft sij tot hem gheseyt, Daer is een man Godts tot my comen hebbende een Enghels aensicht, bouen maten seer veruaerlijck. Ende als ick hem gheuraecht hadde wie hy was, ende van waer dat hy quam, ende hoe dat hy ghenaemt was, soo en wilde hy my dat niet segghen,

7

⁺maer hi antwoorde my dit, Siet ghy sult ontfanghen ende baren eenen sone, Wacht v dat ghy gheenen wijn en drinct oft eenighen sicere, ende dat ghy niet onsuyuers en etet, want dat kint sal een Godts Nazareus wesen van sijnder kintscheyt, ende van sijns moeders lichaem, tot opden dach van sijnder doot toe.

+ B

8

Aldus soo heeft Manue den Heere ghebeden, ende gheseyt, Ick bid v Heere dat die man noch eens comen mach die ghy ghesonden hebt, ende dat hy ons leere wat wij met desen kinde sullen moeten doen datter gheboren sal worden.

9

Ende die Heere heeft dat ghebedt van Manue verhoort, ende die Enghel Godts heeft hem wederom sijnder huysvrouwen gheopenbaert, daer sij opt velt sadt, Maer Manue haer man en was met haer niet. Die welcke als sij den Enghel gesien hadde,

10

soo heeft sij haer ghehaest ende is gheloopen tot haren man, ende ghaf hem dit te kennen segghende, Siet die man heeft my weder om gheopenbaert, dien ick te voren ghesien hadde.

11

Die welcke is opghestaen ende sijn huysvrouwe gheuolcht, ende comende by den man heeft hy tot hem gheseyt, Sijde ghy die met deser vrouwen ghesproken hebt? Ende hy heeft gheantwoordt, ⁺Ick bent.

+ C

12

Ende Manue seyde, Als v woordt sal volbracht wesen, wat wildi dat dit kint doen sal? oft waer af sal hy hem moeten wachten?

13

Ende die Enghel des Heeren heeft tot Manue gheseyt, Hy moet hem wachten van alle dat ic uwer huysvrouwen gheseyt hebbe,

14

ende wat wten wijngaert spruyt, dat hy dat niet en ete, noch gheenen wijn ende sicere en drincke, ende dat hy oock niet onreyns en ete. Ende dat ick haer beuolen hebbe moet hy volbrenghen ende onderhouden.

15

Ende Manue seyde tot den Enghel des Heeren, Ick bidde v dat ghy wilt mijn ghebedt verhooren, ende dat ghy ons laet voor v een boxken vanden ghey-

[p. *211]

ten bereyden.

16

Den welcken die Enghel antwoorde, Eest dat ghy my dwinghet, soo en sal ick v brooden niet eten, maer wildi een heel brantofferande doen, soo offert die den Heere. Ende Manue en wist niet dattet een Enghel des Heeren was,

17

ende hy seyde tot hem, Hoe is uwen naem? op wy v moghen eeren, eest dat v woordt volbracht wordt?

18

Totten welcken hy heeft gheantwoordt, Waer om vraechdi nae mijnen naem, die wonderlijck is?

19

⁺Aldus heeft Manue ghebracht een boxken vanden gheyten, met natte offeranden, ende hy leyde die opden steen, offerende den Heere die wonderlijcke dinghen doet. Maer hy ende sijn huysvrouwe saghen dat aen.

+ D

20

Ende als die vlamme vanden outaer opwaerts naden hemel ghinck, soo is die Enghel des Heeren in die vlamme tsamen oock opgheclommen.

Dwelck als Manue ende sijn huysvrouwe saghen, soo vielen sij op hen aensicht plat neder ter aerden,

21

ende den Enghel des Heeren en openbaerde hem voorts niet meer. Ende ter stont heeft Manue verstaen dattet een Enghel Godts was,

22

ende hy heeft tot sijn huysvrouwe gheseyt, Wij sullen die doot steruen, om dat wy den Heere ghesien hebben.

23

Totten welcken heeft die vrouwe gheantwoordt, Hadde die Heere ons willen dooden, hy en soude die heelbrantofferande ende die natte offeranden van onser hant niet ontfanghen hebben, Noch hy en soude ons alle dese dinghen niet ghetoont hebben, noch ons die dinghen die toecomende sijn gheseyt hebben.

24

Aldus soo heeft sij eenen sone ghebaert, ende hem ghenoemt Samson. Ende dat kint is ghewassen, ende die Heere heeft hem ghebenedijt.

25

Ende den gheest des Heeren beghonst met hem te sijne in die legheren van Dan, tusschen Saraa ende Esthaol.