Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde siet in Ephraim is eenen twistighen strijdt opghestaen, want die van Ephraim ouercreckende teghen den Noorden hebben toe Iephte geseyt, Waer om en hebdi ons niet willen roepen doen ghy ten strijde treckende waert teghen die kinderen van Ammon, dat wi met v hadden ghegaen, daerom sullen wij v huys aensteken.

+ A

2

Den welcken hy antwoorde, Ick ende mijn volck hadden een twistighe sake seer machtich wtstaende teghen die kinderen van Ammon, ende ick heb v gheroepen dat ghy my soudt te helpe comen, maer ghy en hebt dat niet willen doen.

3

Ende dat siende heb ick mijn ziele in mijn handen ghestelt, ⁺ende ben te strijde ouerghereyst teghen die kinderen van Ammon, ende die Heere heeftse in mijn handen gheleuert. Wat heb ick misdaen dat ghy teghen my soudt opstaen ten strijde?

+ B

4

Hierom als hy tot hem gheroepen hadde alle die mannen van Galaad, so streedt hy tseghen Ephraim ende die mannen van Galaad hebben die van Ephraim gheslaghen, om dat sij gheseyt hadden, Galaad is verloopen van Ephraim, ende hy woont int midden van Ephraim ende Manasse.

5

Ende die Galaaditers hebben besedt die passagien vander Iordanen, daer door dat Ephraim wederkeeren soude. Ende als tot die plaetse iemant quam wt dat ghetal van Ephraim vliedende ende seyde, Ick bidde dat ghy my laet doorgaen, soo seyden die Galaaditers tot hem, En sijdi gheen Ephratens man? Ende als hy seyde, Ick en bens niet,

6

soo vraechden sy hem, ⁺Segghet dan Schibboleth, welck beteekent een are. Ende hy antwoorde sibboleth, niet comende een are metter seluer letter wtspreken. Soo grepen sij dien terstont, ende keelden hem daer aen den seluen doorganck vander Iordanen. Ende op dien tijt sijnder verslaghen tweenveertich duysent van Ephraim.

+ C

7

Aldus soo heeft Iephte die Galaaditer een rechter ouer Israel gheeweest ses iaren, ende hy is ghestoruen, ende begrauen in sijn stadt Galaad.

8

Nae desen so heeft een richter in Israel gheweest Abesan van Bethlehem,

9

die hadde dertich sonen ende soo veel dochteren, welcke dochteren hy wtghestelt heeft, ende mans ghegheuen, ende hy nam soo veel huysvrouwen voor sijn sonen, brenghende die in sijn huys. ⁺Dese heeft Israel gheordeelt seuen iaren lanc

+ D

10

ende hy is ghestoruen ende begrauen te Bethlehem.

11

Ende nae hem is comen Ahialon van Zabulons gheslachte, die Israhel recht ghedaen heeft thien iaren,

12

ende hij is ghestoruen ende begrauen in Zabulon.

13

Nae desen heeft een richter in Israhel gheweest Abdon Elels sone, een Pharathoniter,

14

die hadde veertich sonen ende van dien dertich soons sonen, rijdende op tseuentich ionghe vuelens van ezelinnen, ende hy heeft Israhel recht ghedaen acht iaren

15

ende hy is ghestoruen ende begrauen in Pharathon des lants van Ephraim opt gheberchte Amalec.