Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *209]

Dat .xi. Capittel.

1

⁺ALdus soo was in dien tijden Iephte die Galaditer een seer vroem ende strijdtbaer man een sone van een ghemeyn vrouwe, die gheboren is van Galaad.

+ A

2

Maer Galaad hadde een huysvrouwe daer hy sonen af ghecreghen heeft, die welcke als sij opghewassen waren, so verdreuen sij Iephte segghende, Ghy en sult gheen erfghenaem moghen sijn in ons vaders huys, want ghy sijt van een ander moeder gheboren.

3

Die welcke hy vliedende ende scouwende heeft ghewoont int lant van Tob, ende veel arme mannen ende straetroouers sijn by hem vergadert, volghende hem als haren prince.

4

In dien tijden soo streden die kinderen van Ammon tegen Israhel.

5

Ende als die seer stranghelijck den strijt veruolchden, so sijn die ouders van Galaad ghegaen, dat sij Iephte souden wt dat lant van Tob nemen tot haerlieder helpe,

6

ende sy hebben tot hem gheseyt, Coemt ende sijt ons prince, ende strijdt teghen die kinderen van Ammon.

7

Totten welcken hy antwoorde, En sijt ghy niet die ghene die my ghehaedt hebt ende hebt my wt mijns vaders huys ghestooten, ⁺ende nv sijdi tot my comen van noode bedwonghen?

+ B

8

Ende die princen van Galaad hebben tot Iephte gheseyt Om dese sake sijn wij nv tot v comen om dat ghi met ons trecken soudt ende strijden teghen die kinderen van Ammon, ende dat ghy soudt sijn die prince van alle die in Galaad woonen.

9

Ende Iephte heeft tot hen gheseyt, Eest dat ghy warachtelijck tot my comen sijt, dat ic voor v lieden tseghen die kinderen van Ammon vechten soude, ende dat die Heere die in mijn handen leuert, sal ic dan v prince wesen?

10

Die welcke hebben hem gheantwoort, Die Heere die dit hoort, die is een middelaer, ende een ghetuyghe, dat wij ons beloften voldoen sullen.

11

Hier om soo is Iephte wech ghegaen met die princen van Galaad, ende alle dat volck maecten haren prince van hem. Ende Iephte heeft alle sijn woorden ghesproken voor den Heere in Maspha.

12

Ende hy sandt boden totten coninck der kinderen van Ammon, die van sijnen weghen segghen souden, Wat hebdi met my wtstaende, dat ghy teghen my comen sijt, om mijn lant te bederuen?

13

⁺Totten welcken hy gheantwoordt heeft, Om dat Israhel mijn lant ghenomen heeft, doen sij wt Egipten quamen, van die palcu van Arnon af tot Ieboc ende totter Iordanen toe. Daerom gheeft my nv dat met vreden wederom.

+ C

14

Ende Iephte heeft door die selue boden wederom ontboden, ende beual hemlieden dat sij segghen souden den coninck van Ammon,

15

Dit seyt Iephte, Israhel en heeft het lant van Moab noch dlant der kinderen van Ammon niet ghenomen,

16

Maer als sij wt Egipten nederwaerts quamen soo ghinghen sij door die woestijne tot aen die roode zee, ende sijn comen te Cades.

17

Ende sij sonden boden tot den coninck van Edom segghende, Gheeft ons orlof dat wij moghen door v lant gaen, ende hy en wilde hen beden niet verhooren. Ende hy sandt ooc aen den coninck van Moab die welc oock versmaedde passagie te gheuen. Hier om bleef Israel te Cades,

18

ende ghinck omme van besijden dat lant van Edom ende het lant van Moab, ende is ghecomen tot die oostsijde des lants van Moab, ende hy heeft sijnen legher ghemaect ouer Arnon, ende hy en wilde in die palen van Moab niet gaen, want Arnon is gheleghen aen die palen des lants van Moab.

19

⁺Hierom heeft Israhel boden ghesonden aen Sehon den coninck vanden Amorrhiters, die te Hesebon woonde, ende sij hebben tot hem gheseyt, Gheeft my orlof dat ic mach door v lant gaen tot aen den vloet toe,

+ D

20

Die welcke Israhels woorden ooc versmadende en heeft hem niet laten passeren door sijn palen, maer hy heeft een ontellijcke menichte van volck verghadert, ende is teghen hem ghecomen te Iasa, ende heeft sterckelijck wederstaen.

21

Ende die Heere heeft hem gheleuert in die handen van Israhel, met alle sijnen heir, ende sij versloeghen hem, ende sij hebben beseten alle der Amorrhiters lant, die in dat lantscap woonden

22

met allen haren palen, van Arnon tot Ieboc toe, ende van der woestijnen totter Iordanen toe.

23

⁺Aldus soo heeft die Heere Israhels Godt die Amorrhiters verdoruen, als dat volck van Israhel teghen hem streedt, en wilde ghi nv sijn lant besitten?

+ E

24

En behoort v niet met rechte toe dat Chamos v Godt beseten heeft? Maer die landen welck die Heere onse Godt verwinnende ghecreghen heeft sullen ooc tot onser besittinghe comen,

25

ten sij dat ghy by auontueren beter sijt dan Balac Sephors sone die coninc van Moab, oft dat ghi moecht toonen, dat hy teghen Israhel twist ghehadt heeft ende teghen hen ghestreden heeft

26

doen hy te Hesebon woonde, ende in haer dorpkens, ende in Aroer ende haren dorpkens, oft in alle steden by die Iordane, ouer drijhondert iaren.Waerom en hebdi binnen so langhen tijt niet begonst te doen om dese landen weder te crijghen?

27

Daerom ic en sondighe teghen v niet, maer ghy doet teghen my qualijck beroepende my tot onrechtuaerdighe orloghe. Die Heere die een richter is van desen daghe, die doe recht tusschen Israhel ende die kinderen van Ammon.

28

Maer die coninc der kinderen van Ammon en wilde nae die woorden van Iephte niet hooren, welck hy hem door die boden hadde doen segghen.

29

Hierom so is den gheest des Heeren op Iephte worden, ⁺ende ghaende rontsomme Galaad ende Manasse, Maspha oock ende Galaad, ende van daer passerende nae die kinderen van Ammon

+ F

30

heeft hy den Heere een ghelofte gheloeft, segghende, Eest sake dat ghy die kinderen van Ammon in mijn handen leuert,

31

Soo wie ierst wt die doore van mijnen huyse comen sal, ende my te ghemoete coemet als ic met vrede sal wederom comen van die kinderen van Ammon, dien sal ick tot eenen brantoffer den Heere offeren.

32

Ende Iephte is ouerghetrocken tot die kinderen van Ammon dat hy teghen hen strijden soude, die welcke die Heere in sijn handen gheleuert heeft.

33

Ende hy versloechse van Aroer af tot daermen coemt te Mennith, twintich steden, ende tot Abel die al rontsomme met wijngaerden beplant is, met eenen bouen maten seer grooten slach. Ende die kinderen van Ammon sijn vernedert van die kinderen van Israhel.

34

Ende als Iephte wederom quam te Maspha nae sijn huys, soo is hem sijn eenighe dochter te ghemoete ghecomen, met bommen ende dansen, want hy en hadde anders gheen kinderen.

35

Ende als hy haer ghesien hadde, soo scoerde hy sijn cleederen, ende seyde, Wee my, mijn dochter, ghy hebt my bedroghen, ende ghi sijt selue bedroghen, Want ic heb mijnen mont open ghedaen totten Heere, ende ick en sal anders niet moghen doen.

36

⁺Den welcken sij antwoorde, Mijn vader, hebdi uwen mont totten Heere open ghedaen, soo doet my al wat ghy gheloeft hebt, als v wrake ende victorie van uwen vianden verleent is.

+ G

37

Ende sij heeft tot haren vader gheseyt, Verleent my alleen daer ic v om bidde, Gheeft my orlof dat ick twee maenden mach rontsomme die berghen gaen, ende mijnen maech-

[p. *210]

dom beclaghen met mijnen ghespelinnen.

38

Ende hy heeft haer gheantwoordt, Gaet henen, ende hy heeft se twee maenden lanck laten ghaen. Ende als sij wech gheghaen was met haren ghesellinnen, ende ghespelinnen, soo beweende sij haren maechdom op die berghen.

39

Ende als die twee maenden ouerleden waren, soo is sij weder by haren vader comen ende hy heeft haer ghedaen ghelijck hy gheloeft hadde, die welcke en hadde gheenen man bekent. Van dien tijde voertaen eest voor een maniere opghestaen, ende voor een ghewoonte onderhouden,

40

dat die kinderen van Israhel (alst iaer omgheloopen is) tsamen vergaderen, ende beweenen Iephte des Galaaditers dochter vier daghen lanck.