Den gheheelen Bybel, Inhoudende het oude ende nieuwe Testament (Leuvense bijbel 1548)

Dat x. Capittel.

1

⁺NAe Abimelech soe isser een ander leytsman opghestaen in Israel Thola die soen van Phua Abimelechs oom een man van Issachar, die woonde te Samir, des gheberchten van Ephraim,

+ A

2

ende hij dede Israhel recht drijentwintich iaren, ende hi is ghestoruen ende begrauen te Samir,

3

in wiens plaetse is geuolcht Iair van Galaad, die welcke Israel recht dede tweentwintich iaren,

4

hebbende dertich sonen sittende op dertich vuelens van eselinnen, ende waren ouerste van dertich steden, die van sijnen naem sijn ghenoemt Anothiair, Dats die steden van Iair, tot op desen dach toe int lant van Galaad.

5

Ende Iair is ghestoruen, ende begrauen ter plaetsen diemen noemt Camon.

6

⁺Maer die kinderen van Israel doende tot haren ouden sonden noch nieuwe hebben quaet bedreuen voor dat aensicht des Heeren, ende sij hebben ghedient den afgoden Baalim, ende Astaroth, ende den afgoden van Syrien, ende Sidon, ende van Moab, ende der kinderen van Ammon, ende der Philistijnen. Ende sij hebben den Heere verlaten, ende sij en hebben hem niet ghedient.

+ B

7

Ende die Heere is teghen hemlieden gram gheworden, ende heeftse gheleuert in die handen vanden Philistijnen, ende der kinderen van Ammon.

8

Ende sij sijn ghepijnicht gheweest ende seer verdruct achtien iaren lanck, alle die ouer die Iordane woonden in der Amorrhiters lant, welc is in dlant van Galaad,

9

alsoo seere dat die kinderen van Ammon ouer die Iordane treckende verdoruen Iudam ende Beniamin, ende Ephraim, ende Israhel heeft groot verdriet gheleden.

10

⁺Ende roepende tot den Heere hebben sij gheseyt, Wij hebben teghen v ghesondicht, want wij hebben den Heere onsen Godt verlaten, ende Baalim ghedient.

+ C

11

Ende die Heere heeft tot hemlieden gheseyt, En hebben die Egiptenaers ende die Amorrhiters,ende die kinderen van Ammon, ende die Philistinen,

12

ende die van Sidon ende van Amalec, ende van Chanaan v niet verdruct, ende altijt hebdi mi aengheroepen, ende ic heb v verlost wt haren handen?

13

Ende nochtans hebdi my verlaten, ende den vreemden goden ghedient, daerom en sal ic niet meer daer toe doen, om v te verlossen,

14

gaet henen ende roept v goden aen die ghy vercoren hebt, laet v die verlossen inden tijt van uwer benautheyt.

15

Ende die kinderen van Israhel hebben tot den Heere gheseyt, Wij hebben ghesondicht, doet met ons dat v belieft, alleenlijc wilt ons doch nv verlossen.

16

⁺Ende als sij dit seyden, soo wierpen sij wt haren palen alle die beelden der vreemder goden, ende sij hebben den Heere Godt ghedient die welc medelijden ghehadt heeft ouer haer allendicheden.

+ D

17

Aldus die kinderen van Ammon tsamen roepende hebben haer tenten nedergheslaghen int lant van Galaad. Ende die kinderen van Israhel daer teghen vergadert hebben haren legher ghemaect te Maspha.

18

Ende die princen van Galaad hebben elck tot haren naesten gheseyt, Soo wie van ons ierst beghint te strijden teghen die kinderen van Ammon, die sal een prince wesen des volcs van Galaad.