Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺Ende die mannen van Ephraim hebben tot hem gheseyt, Wat es dit dat ghy hebt wil, len doen? dat ghi ons niet en riept doen ghy ten strijde ghinct teghen die Madianiters, ende sy keuen seer sterckelijck, ende by nae ghewelt doende

+ A

2

Maer hy seyde tot hemlieden, Wat heb ic connen doen sulcs, als ghi ghedaen hebt? en es eenen druyf van Ephraim niet beter dan dat heele wijnsnijtsel van Abiezer?

3

Die Heere heeft die princen der Madianiters Oreb ende Zeb in v handen gheluert, wat heb ic connen doen sulcs als ghi ghedaen hebt? Ende als hi dat geseyt hadde so is haren gheest ghesoncken, waer mede sij te voren teghen hem opghehauen waren.

4

Ende als Gedeon by die Iordane quam, soe es hy daer ouer ghegaen met drie hondert mannen die met hem waren, ende van vermoetheden die vluchtende niet veruolghen en consten.

5

Ende hy seyde tot die mannen van Socoth, Ic bidde v gheeft doch desen volcke dat met my is brooden, want sij sijn seer machteloos gheworden, op dat wij moghen Zebee ende Salmana der Madianiters coninghen veruolghen.

6

⁺Ende die princen van Socoth hebben gheantwoort By auontueren sijn nv in v handen die palmen van Zebee ende Salmana handen, ende daerom begeerdi dat wij uwen heyr brooden gheuen souden.

+ B

7

Ende Gedeon heeft tot hen gheseyt, Soo wanneer dat die Heere Zebee ende Salmana in mijn handen sal gheleuert hebben, ende dat ic met victorie in vreden weder comen sal wesen, soo sal ic v vleesch in stucken wrijuen, met die doornen ende distelen der woestijnen.

8

Ende van daer opwaerts treckende is hy ghecomen te Phanuel, ende hy seyde tot die mannen van dier steden desghelijcken, Den welcken die oock gheantwoort hebben, alsoo die mannen van Socoth gheantwoort hadden.

9

Hier om soo heeft hy tot hemlieden gheseyt, Als ick met vrede victorioes verwinner wederom sal comen sijn, so sal ic desen torre verderuen.

10

Maer Zebee ende Salmana rusten met alle haren heyre, ⁺Want daer waren vijfthien duysent mannen ouerbleuen, van alle die scaren des oostlantschen volcke, nae datter verslaghen waren hondert ende twintich duysent strijdtbaer mannen, ende swaerden wttreckende.

+ C

11

Ende Gedeon opwaerts gaende nae den wech der gheender die in die tabernakelen woonden aen die oostzijde van Nobe ende Iegbaa, heeft die legheren der vianden gheslaghen die sonder sorghe waren, ende gheen quaet vermoeden en hadden van eenich teghenspoet.

12

Ende Zebee ende Salmana vluchten, die welck Gedeon veruolghende heeft gheuanghen verstoorende alle hen gheheel heyr.

13

Ende wederkeerende wt den strijdt voor der sonnen opganck

14

nam hi gheuanghen eenen knecht der mannen van Socoth, ende hy vraechde van hem die namen vanden ouersten ende outsten van Socoth, ende hy heefter seuen ende tseuentich mans bescreuen.

15

Ende hy is te Socoth ghecomen, ende hi seyde tot hemlieden, Siet hier Zebee ende Salmana, om die welcke ghy my versmaedet, segghende, By auontueren sijn die handen van Zebee ende Salmana in uwe handen, ⁺ende daerom begheerdi dat wij uwen mannen die vermoeyt ende machteloos gheworden sijn, brooden souden gheuen?

+ D

16

Hierom nam hy die ouders vander stadt, ende doornen ende distelen wt der wildernissen, ende wreef die mannen van Socoth daer mede, ende mineerdese al in stucken.

17

Ende den torre van Phamiel heeft hy ooc omgheworpen nae dat hy alle die inghesetene der stadt verslaghen hadde.

18

Ende hy seyde tot Zebee ende Salmana, Hoedanich waren die mannen die ghy dootsloecht te Thabor. Ende sij antwoorden, ws ghelijcke, ende die een van dien was als een conincks sone.

19

Ende hi heeft hen gheantwoort, Dat waren mijn broeders, mijns moeders sonen, Soo warachtelijck als die Heere leeft, hadde ghy dien tleuen behouden, ic en soude v niet dooden.

20

Ende hy seyde tot Iether sijnen iersten gheboren sone Staet op ende slaetse doot, Maer hy en track sijn swaert niet wt, want hy vreesde, aenghesien dat hy noch ionck was.

21

Ende Zebee ende Salmana seyden, ⁺Staet ghy op, ende slaet op ons, want na den ouderdom heeft een mensch cracht. Gedeon is opghestaen, ende hy heeft Zebee ende Salmana doot gheslaghen. Ende hi heeft ghenomen die cierlijcke iuweelen ende die costelijcke spanselen daermen die halsen vanden coninclijcken kemels mede te cieren pleech.

+ E

22

Ende alle die mannen van Israhel seyden tot Gedeon, Hebt heerscappie ouer ons ghy ende v sone, ende ws soons sone, want ghy hebt ons verlost wt die hant vanden Madianiters.

23

Totten welcken hy seyde, Ick en sal gheen Heere wesen ouer v lieden, noch mijn sone en sal oock v ouerheere niet sijn, Maer die Heere sal ouer v lieden heerschappie hebben.

24

Ende hy seyde tot hemlieden, Een bede begheer ic van v, Gheeft my van uwen roof die ooringhen, Want die Ismaheliters pleghen gulden ooringhen te hebben.

25

⁺Ende sij hebben gheantwoordt, Wij sullen v die seer gheerne gheuen. Ende spreydende eenen mantel op die aerde, wierpen sij daer op alle die ooringhen van den roof,

+ F

26

ende dat ghewicht van die ooringhen die hy begheert hadde, was duysent ende seuen hondert siclen siluers, sonder alle die ander cieraeden ende halsbanden ende purpuren cleederen die der Madianiters coninghen pleghen te draghen, ende sonder die gulden halsbanden der kemelen.

27

Ende Gedeon heeft daer af gemaect eenen Ephod, ende heeft dien ghestelt in sijn stadt Ephra. Ende alle die van Israhel hebben hen daer mede ontsuyuert, ende tes Gedeon met alle sijnen huyse tot eenen val gheworden.

28

Ende die Madianiters sijn vernedert gheweest voor die kinderen van Israhel, ende sij en consten niet meer haer necken oprichten, maer het lant was in rusten veertich iaren lanck, die wijle dat Gedeon die ouerste was.

29

Aldus soo is Ierobaal Ioas sone gheghaen woonen in sijn huys,

30

ende hy hadde tseuentich sonen, ⁺die wt sijnen dgyen comen waren, om dat hy veel huysvrouwen hadde.

+ G

31

Maer sijn concubine die hy hadde te Sichem die bracht hem voorts eenen sone Abimelech ghenoemt.

32

Ende Gedeon Ioas sone is ghestoruen in goeden ouderdom, ende begrauen in Ioas sijns vaders graf te Ephra, van der familie van Ezri.

33

Maer nae dat Gedeon ghestoruen was, soo sijn die kinderen van Israel afghekeert, ende hebben hem ontsuyuert met Baalim. Ende sij hebben een verbont met Baal ghemaect, dat hy haerlieder Godt sijn soude,

[p. *207]

34

ende sij en hebben niet ghedacht op den Heere haren Godt die hen verlost hadde wt die handen van allen haren vianden rontsomme ligghende,

35

oock en hebben sij gheen bermherticheyt ghedaen met dat huys van Ierobaal Gedeon nae alle die weldaden die hy den huyse van Israel ghedaen hadde.