Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺HIer om Ierobaal die oock Gedeon is, des nachts opstaende ende alle tvolck met hem is ghecomen by die fonteyne die ghenoemt wort Harad. Ende den legher vanden Madianiters was in die valleye aen die noortsijde vanden hooghen hoeuele.

+ A

2

Ende die Heere heeft tot Gedeon gheseyt, Daer is veel volcs met v, ende die Madianiters en sullen in haerlieden handen niet gheleuert worden, op dat Israhel teghen my niet en glorieere, segghende, Ic ben door mijn macht verlost.

3

Spreect tot den volcke, ende roept wt dat sijt allegader hooren, So wie anxt heeft ende veruaert is, die keer weder. Ende daer isser vanden berch van Galaad wech gegaen, ende vanden volcke isser weder ghekeert tweentwintich duysent mannen, ende daer en isser maer thien duysent bleuen.

4

⁺Ende die Heere seyde tot Gedeon, Noch is tvolck vele, leytse aen die wateren, ende daer sal icse proeuen, ende vanden welcken ic v segghen sal dat hy met v gae die reyse, ende dien ic verbie met te gaen, die keere weder.

+ B

5

Ende als dat volc beneden aen die wateren comen was, soo seyde die Heere tot Gedeon, Die metter tonghen dwater lecken ghelijc die honden pleghen te lecken, die suldi op een sijde stellen, Maer die met gheboochde knien drincken, die sullen op dander zijde sijn.

6

Aldus soo was tghetal vanden ghenen die dwater ghelect hadden worpende dat metter hant inden mont, drij hondert mannen, maer alle die ander menichte hadde met gheboochden knien ghedroncken

7

Ende die Heere seyde tot Gedeon, Met die driehondert mannen die dat water ghelect hebben sal ic v verlossen, ende die Madianiters in v hant leueren, Maer alle die ander menichte keere weder in sijn stede.

8

⁺Als hy dan victalie ghenomen hadde, ende trompetten, nae tghetal sijns volcs, soo gheboodt hi dat alle die ander menichte des volcs wechgaen soude nae haer tabernakelen, ende hy heeft hem met die drij hondert mannen ten strijde ghegheuen. Maer den legher vanden Madianiters was beneden in die valleye.

+ C

9

Opden seluen nacht heeft die Heere tot hem gheseyt, Staet op ende gaet beneden in die legheren, want ick heb die in v handen gheleuert,

10

Maer eest dat ghy v ontsiet alleen te gaen, soo laet Phara v knecht met v nederwaerts gaen.

11

Ende als ghy ghehoort sult hebben, wat sij segghen, dan sullen uwe handen versterct worden, ende dan suldi vrijlijcker tot der vianden heirlegher afdalen. Aldus is hy met Phara sijnen knecht nederwaerts gheghaen in een deel vanden leghere, daer der ghewapender wake was.

12

⁺Maer die Madianiters ende Amalechiters, met alle dat volck wt oostlant, laghen verspraeyt in die valleye ghelijc een menichte van sprinchanen, ende die kemels waren ontellijcke ghelijc dat sant welc aenden oeuer der zee leyt.

+ D

13

Ende als Gedeon daer comen was, soo vertelde daer een sijnen droom tot sijnen naesten, ende op dese maniere vertelde hy dat hy ghesien hadde, Ick heb eenen droom ghesien, ende my dochte datter een ghersten broot onder die asschen ghebacken wentelde, ende in der Madianiten legher afquam, ende alst comen was aen dat tabernakel, soo sloecht dat ende wierpt daer neder, ende maecte dat effen ten gronde ghelijck der aerden.

14

Die ghene daer hy toesprack, antwoorde, Dat en is anders niet dan het swaert van Gedeon Ioas sone des Israhelijtschen mans, want die Heere heeft die Madianiters in sijn handen gheleuert, ende allen haren heyrlegher.

15

⁺Ende als Gedeon ghehoort hadde den droom met sijnen bedietsel, soo heeft hy aenbeden, ende is wederom ghekeert tot den legher vanden Israheliten, ende heeft gheseyt, Staet op, want die Heere heeft der Madianiters heyrlegher in onse handen gheleuert.

+ E

16

Ende hy heeft die drijhondert mannen in drij deelen ghedeylt, ende hy heeft trompetten in haer handen gegheuen ende ydele flesschen, ende lampen int midden der flesschen,

17

Ende hi heeft tot hen gheseyt, Dat ghy my sult sien doen, doet dat ooc. Ic sal in een deel vanden legher gaen, ende dat ic doen sal volcht dat nae.

18

Als dat trompet in mijn hant gheluyt gheuen sal, soo maect ghy ooc rontsomme die leghers gheclanck, ende roept al te samen, Den Heere ende Gedeon.

19

⁺Aldus so is Gedeon metten drijhondert mannen ghecomen in een deel vanden legher, als die wake vander middernacht begonste, ende als die wakers opgheweckt waren, soo begonsten sij met die trompetten groot gheclanck te maken, ende die flesschen teghen malcanderen te slaen.

+ F

20

Ende doen sij rontsomme den leghere te drij staden groot gheclanck maecten, ende hen cruycken ghebroken hadden, soo hielen sij die berrende lichten in haer slincke handen, ende met die rechte handen maecten sij met die trompetten groot gheclanck ende riepen, Dat swaert des Heeren ende Gedeons,

21

staende elck op sijn plaetse rontsomme vander vianden leghere.

Hierom sijn alle die legheren verbaest gheweest, ende al roepende ende huylende sijn sij gheuloden,

22

ende nochtans soo bleuen die drij hondert mannen staende ende haer trompetten staende. Ende die Heere heeft het swaert in alle die legheren ghesondeu, ende sij sloeghen malcanderen doot,

23

vliedende tot Bethseca, ende totten oeuer van Abelmehula in Tabbath. Maer tsamen roepende die mannen van Israhel, van Nephthali, ende van Aser, ende van gheheel Manasses, hebben die Madianiters veruolcht.

24

Ende Gedeon heeft boden wtghesonden ouer alle dat gheberchte van Ephraim, segghende, Coemt nederwaerts teghen die Madianiters, ende ondergaet hen die wateren tot Beth-bera ende totter Iordanen toe. Ende alle die van

[p. *206]

Ephraim hebben gheroepen, ende hebben hen onder gaen die wateren, ende die Iordane tot Beth-bera toe.

25

Ende doen sij gheuanghen hadden twee mans vanden Madianiters, Oreb ende Zeb, dooden sij Oreb aen den steen Oreb, ende Zeb aen die persse Zeb. Ende sij veruolchden die Madianiters, die hoofden van Oreb ende Zeb draghende tot Gedeon ouer die vloeden der Iordanen.