Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺MAer die kindern van Israhel hebben quaet ghedaen voor dat aeusicht des Heeren, Ende hy heeftse gheleuert in die hant vanden Madianiters, seuen iaren lanc,

+ A

2

ende sij sijn seer verdruckt gheweest van hemlieden. Ende sij hebben voor hen seluen ghemaect holen ende speluncken in die berghen, ende seer stercke plaetsen om te wederstaen,

3

ende als die van Israhel ghesaeyt hadden, soo quamen die van Madian ende van Amalec, ende die andere vanden oosterschen natien,

4

ende sij sloeghen haer tenten by henlieden, ende sij verdoruent al, alsoo dat noch groen was, tot den inganck van Gaza. Ende sij en lieten in Israhel niet met allen dat den lijftocht aengaet, noch scapen, noch ossen, noch ezels,

5

Want sij ende alle hare cudden quamen met haren tenten, ende bedectent al ghelijck sprinchanen een ontellike menichte van menschen. ende van kemels, al bederuende wat sij ghenaecten.

6

Ende Israhel is seer vernedert voor daensicht vanden Madianiters.

7

⁺Ende sij hebben totten Heere gheroepen begherende helpe teghen die Madianiters,

+ B

8

Die welcke heeft eenen man eenen propheet tot hemlieden ghesonden, ende die heeft gheseyt, Dit seyt die Heere die Godt van Israhel, Ic heb v doen tsamen opcomen wt Egipten, ende ick heb v gheleyt wt dat huys der slauernien,

9

ende ic heb v verlost wt die hant der Egiptenaren ende allen uwer vianden die v verdructen, ende ick heb die tot uwer incoemst verdreuen, ende v lieden haer lant gheleuert,

10

ende ick heb gheseyt, Ick ben die Heere v lieder Godt, en wilt niet vreesen der Amorrhiters goden, in welcker lant dat ghy woont. Ende ghy en hebt nae mijn stemme niet willen hooren.

11

Maer die enghel des heeren es ghecomen ende hy heeft gheseten onder den eycken boom die daer was te Ephra welc toebehoirde Ioas den vader der familien van Ezri. Ende doen Gedeon sijn sone dorschde ende suyuerde die tarwe inder perssen, om dat hi soude ontulieden die Madianiters,

12

soo heeft hem die Enghel des Heeren gheopenbaert ende gheseyt, ⁺Die Heere sij met v ghi aldersterckste der mannen.

+ C

13

Ende Gedeon seyde tot hem, Ick bidde v mijn Heere, is die Heere met ons, waerom hebben ons alle dese dinghen beuanghen? Waer sijn zijn wonderlijcke daden die welcke onse vaders ons vertelt hebben ende gheseyt, Wt Egipten heeft ons die Heere gheleyt? Maer nv heeft ons die Heere verlaten, ende ons gheleuert in die hant der Madianiters.

14

Ende die Heere heeft hem aenghesien ende gheseyt, Gaet henen met deser uwer macht, ende ghy sult Israhel verlossen wt der Madianiters handen, weet dat ick v ghesonden hebbe.

15

Die welcke antwoordende seyde, Ick bidde v mijn Heere, Waer mede sal ick Israhel verlossen? Want siet mijn familie is dalder nederste van Manasses gheslachte, ende ic ben dalder minste in mijns vaders huys.

16

Ende die Heere heeft tot hem gheseyt, Ic sal met v wesen, ende ghy sult die Madianiters verslaen ghelijck eenen man.

17

Ende hy seyde, Heb ic gratie voor v gheuonden, soo gheeft my een teeken dat ghyt sijt die tot my spreect,

18

Ende en gaet van hier niet tot dat ic weder by v come, brenghende sacrificie, ende v dat offerende. ⁺Ende hy antwoorde, Ick sal v coemste verwachten.

+ D

19

Aldus is Gedeon in ghegaen, ende heeft een ionck boxken ghecoect, ende van een mate meels heeft hi ongheheefde brooden ghebacken ende dat vleesch legghende in eenen corf, ende het sop vanden vleesch doende in eenen pot, bracht hy dat al onder die eycke, ende heuet hem gheoffert.

20

Ende die Enghel des Heeren seyde tot hem, Neemt dat vleesch ende die ongheheefde brooden, ende legghet die op dien steen, ende dat vleeschsop ghiet daer op. Ende doen hy alsoo ghedaen hadde,

21

soo stack voorts des Heeren Enghel dat wterste van sijnder roeden die hy in sijn hant hadde, ende raecte dat vleesch ende die ongheheefde brooden, ende daer is een vier wten steen opcomen, ende heeft dat vleesch metten ongheheefden brooden heelverteert. Maer des Heeren Enghel is verswenen wt sijn ooghen.

22

Ende Gedeon siende dat des Heeren Enghel was, heeft gheseyt, Wee my Heere Godt, want ic heb des Heeren Enghel ghesien aensicht aen aensicht.

23

Ende die Heere heeft tot hem gheseyt, Vrede sij met v, en vreest niet ghy en sult niet steruen.

24

⁺Ende hierom heeft Gedeon daer eenen outaer opgherecht den Heere, ende dien ghenoemt, Des Heeren vrede, tot opden dach van heden toe.

Ende doen hy noch te Ephra was, welc der familien van Ezri toebehoort,

+ E

25

op dien nacht heeft die Heere tot hem gheseyt, Neemt ws vaders stier, ende noch eenen anderen stier van seuen iaren, ende ghy sult Baals outaer breken, die uwen vader toebehoort, ende dat bosschelken welck rontsomme den outaer staet suldi afhouwen,

26

ende ghy sult den Heere uwen Godt eenen outaer maken opt hoochste van deser steenrootsen, daer ghy te voren dat sacrificie op gheleyt hebt. Ende ghy sult dien tweeden stier nemen, ende dien offeren tot eenen heelen brantoffer, opden tas vanden houte welck ghi van dat bosch sult afghehouwen hebben.

27

Hierom Gedeon nemende met hem thien mans van sijnen knechten, heeft ghedaen alsoo hem die Heere gheboden hadde. Maer vreesende sijn vaders huys, ende die lieden van dier stadt, en heeft hy dat niet willen by daghe doen, maer heeft dat al by nachte ghedaen.

28

⁺Ende doen die lieden van dier stadt des smorghens opghestaen waren, soo hebben sij ghesien Baals outaer afgheworpen, ende dat bosschelken afghehouwen ende eenen anderen stier gheleyt op den outaer die doen ghemaect was.

+ F

29

Ende sij hebben tot malcanderen gheseyt, Wie heeft dit ghedaen? Ende als sij ondersochten den ghenen diet ghedaen hadde, so isser gheseyt, Gedeon Ioas sone heeft dit al ghedaen.

30

Ende sij hebben tot Ioas gheseyt, Brengt voorts uwen soon herwaerts dat hy sterue, want hi heeft Baals outaer ghebroken, ende dat bossch afghehouwen.

31

Ende hy heeft hen gheantwoort, Sijde ghy die wraecsoeckers van Baal, dat ghy voor hem strijden moet? soo wie Baals viant is, steruen moet die eer dat tlicht van morghen opgaen sal, is hy Godt, soo laet hem sij seluen wreken ouer den ghenen die sijnen outaer ommegheworpen heeft.

32

Van dien daghe voorts soo is Gedeon ghenoemt gheweest Ierobaal, om dat Ioas geseyt hadde, Laet Baal voor sij seluen wraeck doen ouer den ghenen die sijnen outaer omme gheworpen heeft.

33

Aldus sijn alle die Madianiters ende die Amaleciters ende die volcken wt oostlant tsamen vergadert, ende comende ouer die Iorda-

[p. *205]

ne hebben sij haren heyrlegher ghemaect in die valleye van Iezrael.

34

⁺Maer des Heeren gheest heeft Gedeon omuanghen, die welcke met een trompet groot gheclanck makende heeft te samen gheroepen thuys van Abiezer, dat sij hem volghen soude.

+ G

35

Ende hi heeft boden wtghesonden, in gheheel Manasses, die welcke ooc hem gheuolcht is. Ende hy heeft noch ander boden ghesonden tot dat geslachte van Aser ende Zabulon ende Nephthali, die welcke hem te ghemoet comen sijn.

36

Ende Gedeon heeft totten heere gheseyt, Eest sake dat ghy doer mijn hant het volc van Israhel verlost, gelijc ghi gheseyt hebt,

37

so sal ic dit vlies metter wollen opden dorschuloer legghen, eest dat den dauwe op dat vlies alleen sijn sal ende in alle dlant droochte, so sal ic weten dat ghy doer mijn hant (ghelijc ghy gheseyt hebt) Israel sult verlossen.

38

Ende het is also ghesciet. Ende des nachts Gedeon opstaende wranc dat vlies wt, ende vulde een scelpe metten dauwe.

39

Ende hy heeft wederom totten heere gheseyt, En laet v rasende gramscap teghen my niet verstoort wesen, al eest dat ic noch eens tempteere, begherende noch een teeken int vlies, Ic bidde dat het vlies alleen mach drooghe wesen, ende dat alle dat aertrijcke vanden dauwe vochtich sijn.

40

Ende die heere heeft ghedaen op dien nacht als hy begheert hadde ende die droochte was alleen int vlies, ende den dauwe op alle dlant.