Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde Debora ende Barac Abinoems sone hebben ghesonghen op dien dach, segghende.

+ A

2

Ghy die vrijwillichlijck wt Israhel v zielen totten perikel gheoffert hebbet, ghebenedijt den Heere.

3

Hoort ghy coninghen ende vaet met uwen ooren ghy princen. Ick bent, ic bent die den Heere singhen sal een psalter liedt singhen den Heere den Godt van Israhel.

4

O Heere doen ghy wt ghinct van Seir, ende ghinct voorts door die landen van Edom doen worde die eerde beroert, ende die hemelen ende die wolcken druypten van wateren,

5

Die berghen vloeydden voor dat aensicht des Heeren, ende Sinai van dat aensicht des Heeren des Godts van Israhel,

6

In die daghen van Samgar Anaths sone, in die daghen van Iahel hebben die weghen gherust, ende die daer ouer ghinghen hebben ghewandelt door doolweghen.

7

Die stercke in Israhel hebben opghehouden, ende gherust, tot dat Debora opstont, tot dat opstont die moeder in Israhel.

8

Nieuwe strijden heeft die Heere vercoren, ende hy heeft seluer der vianden poorten omgheworpen, daer en was scilt noch spere ghesien onder die veertich duysent van Israhel.

9

⁺Mijn herte bemint die princen van Israhel, die v seluen met uwen eyghenen wille hebt int perikel gheoffert, ghebenedijt den Heere.

+ B

10

Die op witte ezels climt ende int recht sidt, ende wandelt ouer den wech, spreect.

11

Daer die waghenen teghen malcanderen ghebroken sijn, ende dat heyr der vianden versmacht is laet daer vertelt worden des Heeren rechtuerdicheden ende die goedertierenheyt tot die stercke van Israhel.

Doen ghinck des Heerenvolck beneden aen die poorten, ende sij creghen die heerscappie.

12

Staet op, staet op Debora, staet op, staet op, ende spreect dat liedeken, staet op Barac, ende aenueert v gheuanghenen, sone van Abinoem,

13

die bleuelinghen des volcs sijn verlost, die Heere heeft met die stercke ghestreden.

14

Wt Ephraim heeft hy die vernielt wt Amalec, ende nae dien wt Beniamin in uwe volcken o Amalec, Van Machir sijn die princen nederghecomen, ende van Zabulon, die dat heyr leyden souden om te strijden.

15

Die ouercapeteynen van Issachar hebben met Debora gheweest, ende si hebben die voetstappen van Barac gheuolcht, die welcke hem seluen int perikel ghegheuen heeft, als een die v ander hoochden in een groote diepte hem neder worpt, als Ruben teghen si seluen ghesceyden was, so is der grootmoedigher twist beuonden.

16

Waerom woondi tusschen twee palen, om dat ghi der cudden gheblaes soudet hooren? als Ruben teghen sij seluen ghedeylt was, soo is der grootmoedigher twist beuonden.

17

⁺Galaad ruste ouer die iordane, ende Dan becommerde hem met die schepen, Aser woonde inden oeuer der zee, ende woonde in die hauenen,

+ C

18

maer Zabulon ende Nephtali hebben haer zielen ter doot ouerghegheuen, int lantschap van Merome.

19

Die coninghen sijn comen, ende hebben ghestreden, die coninghen van Chanaan hebben in Tanach ghestreden, bij die wateren van Mageddo, Maer sij en brochten niet van dat sij gherooft hadden.

20

Vanden hemel wert teghen hen ghestreden, die sterren blijuende in haer ordinancie, ende in haeren loop hebben teghen Sisaram ghestreden.

21

Die beke ven Cison heeft hen doode lichamen wech ghetrocken, die beke Cadumim, die beke van Cyson o mijn ziele vertreedt die machtighe.

22

Die clauwen vander peerden voeten sijn afgheuallen, doen sij met ghedruysche vloden, ende doen die stercste vanden vianden van bouen nederwaerts vielen.

23

Vermalendijt dat lant van Meroz sprack die Enghel des Heeren, vermalendijt haer inghesetenen, om dat sij tot des Heeren helpe niet ghecomen en sijn ter helpen van sijnen alderstercsten.

24

Ghebenedijt moet onder die vrouwen wesen Iahel die huysvrouwe van Haber den Cineiter, ende ghebenedijt moet sij sijn in haer tabernakel.

25

⁺Den ghenen die water begheerde gaf sij melck, ende in der princen schale gafsij boter.

+ D

26

Sij heeft haer slincke hant aen den spannagel ghesteken ende haer rechte hant aen der smeden hamer, ende sij heeft Sisaram gheslaghen, soeckende in sijn hooft een plaetse om hem te quetsen, ende den slaep sijns hoofts machtelijck doorstekende.

27

Tusschen haer voeten is hy gheuallen, hy is onmachtich gheworden ende ghestoruen.

Hy wentelde voor haer voeten, ende lach daer doot seer deerlijck.

28

Sijn moeder ter vinsteren wtsiende huylde iammerlijck, ende van bouen op die eetcamer heeft sij ghesproken.

Waerom toeft sijnen waghen wederom te comen waerom hebben die voeten van sijnen waghen peerden traech gheweest.

29

Een dalder wijste van sijnen huysvrouwen, heeft dese woorden haers mans moeder gheantwoort.

30

By auontueren hy deylt nv die roouen, ende die schoonste der vrouwen wordt voor hem wtghecoren cleederen van versceydeu verweu, worden Sisara

[p. *204]

ghegheuen voor eenenroof, ende verscheyden cieraet wort verghadert om die halsen mede te vercieren.

31

O Heere alsoo moeten vergaen allen v vianden, maer alle die v lief hebben die moeten blincken als die sonne in haren opganck schijnt.

32

Ende het lant heeft gherust veertich iaren lanck.