Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde die kinderen van Israhel hebben noch daer toe ghedaen quaet voor dat aenschijn des Heeren nae die doot van Aod,

+ A

2

ende die Heere heeftse gheleuert in die hant van Iabin des conincs van Chanaan die te Asor regneerde, ende hy hadde eenen ouer capiteyn sijns heyrs, Sisara genaemt maer hy woonde in Haroseth der heydenen,

3

Ende die kinderen van Israhel hebben totten Heere gheroepen, Want hy hadde neghenhondert waghenen met yseren seysenen beslaghen, ende hy hadde hen twintich iaren lanck seer swaerlijck verdruct.

4

Maer in dien tijden was Debora een prophetersse Lapidoths huysvrouwe, die het volc in dien tijden recht dede,

5

Ende sij sadt onder den palmboom, die met haren naem ghenoemt was, tusschen Rama ende Bethel, opt gheberchte van Ephraim, ende die kinderen van Israhel ghinghen opwaerts tot haer in alle vonnisse

6

Die welcke heeft ghesonden, ende gheroepen Barac, Abinoems sone van Cedes Nephtali, ende sij heeft tot hem gheseyt. Die Heere die Godt van Israhel heeft v gheboden. Ghaet henen ende leyt een heyr opden berch van Thabor, Ende ghy sult met v nemen thien duysent strijdtbaer mannen vanden kinderen Nephtali ende van Zabulons kinderen,

7

Ende ick sal tot v brenghen ter plaetsen vander beken Cison, Sisaram den ouercapiteyn van Iabins heyr ende sijn waghenen ende alle die menichte, ende ick sal die leueren in uwe handen,

8

Ende Barac heeft tot haer gheseyt. ⁺Eest sake dat ghy met my coemt, soo sal ick gaen, Eest dat ghy met my niet comen en wilt, so en sal ick niet reysen,

+ B

9

Ende sij heeft tot hem gheseyt. Ic sal voorwaer met v trecken, maer te deser reysen en sal die victorie v niet toe ghescreuen worden, want in eender vrouwen hant sal Sisara gheleuert worden. Hierom is Debora opghestaen, ende met Barac ghereyst tot Cedes,

10

Die welcke heeft by hem gheroepen Zabulon ende Nephtali, ende is opwaerts ghetrocken met thien duysent vechtender mannen, hebbende Deboram in sijn gheselscap,

11

Maer Haber die Cineus man was voortijts vertrocken vanden Cineen sijnen broeders Hobabs kinderen Moyses maech, ende hy hadde sijn tabernakelen wtghespannen, tot aen die valleye diemen noemt Sennim, ende die was by Cedes.

12

Ende het is Sisare gheseyt, hoe dat Barac Abinoems sone comen was opden berch van Thabor,

13

Ende hy heeft vergadert neghen hondert waghenen met seysenen beslaghen, ende alle dat heyr van Haroseth der heydenen, tot die beke van Cison.

14

Ende Debora seyde tot Barac. Staet op, want dit is den dach opden welcken die Heere Sisaram in v handen gheleuert heeft. Siet hy is v leytsman. Aldus so is Barac af ghetrocken vanden berch Thabor, ende thien duysent strijtbaer mannen met hem,

15

Ende die Heere heeft Sisaram ende alle sijn waghenen ende die gheheel menichte veruaert met dat scerpte vanden swaerde, ten aensien van Barac, ⁺soo seere dat Sisara vanden waghen springhende te voete vluchte,

+ C

16

ende dat Barac veruolchde die vliedende waghenen, ende dat heyr tot Haroseth der heydenen toe, ende dat alle die menichte der vianden verslaghen wor-

[p. *203]

de totten laetsten man toe.

17

Maer Sisara vliedende quam tot die tente van Iahel, Haber des Cineus huysvrouwe, Ende het was paeys tusschen Iabin den coninc van Azor, ende dat huys van Haber den Ceneiter.

18

Aldus soe is Iahel Sisara te ghemoet ghegaen, ende heeft tot hem gheseyt. Coemt by mi binnen mijn Heere, coemt binnen en vreest niet Die welcke is in haer tente ghegaen, ende doen hy met eenen mantel bedect was,

19

soo seyde hy tot haer. Ick bidde v gheeft mi een luttelken waters, want ick heb grooten dorst, Ende sij dede een flessche melcs open, ende gaf hem te drincken, ⁺ende sij bedecte hem,

+ D

20

Ende Sisara seyde tot haer. Staet voor die dore vander tenten, ende als daer yemant coemt v vraghende, ende segghende. En is hier niemant? soo suldi segghen. Niemant en is hier.

21

Aldus soo heeft Iahel die huysurouwe van Haber ghehaelt eenen spannaghel vander tenten, nemende daer mede eenen hamer, ende sij quam al bedectelijc ende swijghende binnen, ende stelde op den slaep van sijnen hoofde den spannaghel, ende slaende daer op metten hamer heeft sij dien door sijn herssenen gheslaeghen tot in die aerde toe, ende aldus heeft hi dien slaep metter doot versaemt ende hy is cranck gheworden ende ghestoruen,

22

Ende siet Barach is ghecomen volghende Sisaram, Ende Iahel is hem te ghemoet ghegaen, ende seyde tot hem. Coemt ende ick sal v den man toonen dien ghy soeckt, Ende als hy by haer binnen der tenten comen was, soo heeft hi Sisaram ghesien doot ligghende, ende den spannaghel in sijn hooft gheslaeghen.

23

Aldus soo heeft Godt op dien dach Iabin den coninck van Chanaan vernedert voor die kinderen van Israhel,

24

die welcke daghelijcs wiessen ende sij verdructen Iabin den coninck van Chanaan met gheweldigher hant, tot dat sij hem heel te niet ghebracht hadden.