Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺DIt sijn die heydenen welck die Heere heeft laten blijuen, om dat hy Israhel daer door leeren soude, ende alle die ghene die der Chananiters strijden niet ghesien en hadden,

+ A

2

op dat haer kinderen namaels oock souden leeren strijden teghen die vianden, ende dat sij die ghewoonte van strijden ooc hebben souden,

3

Die vijf vorsten der Philisthijnen, ende alle die Chananiters, ende die Sidomiters, ende Heueiters, die op tgheberchte van Libano woonden vanden berch Baalhermon af, tot den inganck van Emath,

4

Ende hy heeft die ghelaten, om dat hi door die sonde Israhel proeuen, oft sij oock nae des Heeren gheboden hoorden, dat hy haren vaderen gheboden hadde door die hant van Moyses, oft niet.

5

Aldus soo hebben die kinderen van Israhel ghewoont int midden vanden Chananiters, ende Hethiters ende Amorrhiters, ende Pherezeiters, ende Heueiters, ende Iebuseiters,

6

ende sij namen hen dochters tot huysvrouwen, ende gauen hen dochters den sonen van dien volcke ende sij hebben haren goden ghedient,

7

Ende sij hebben quaet ghedaen voor des Heeren aensicht, ende hebben haren Godt vergheten, dienende Baalim, ende Astharoth,

8

Ende die Heere teghen Israhel gram sijnde, heeftse gheleuert in die hant van Chusan Rasathaim des conincs van Mesopotamien, ende sij hebben hem ghedient acht iaren.

9

⁺Ende sij riepen totten Heere, die welcke heeft hen verwect eenen verlosser, ende die heeftse verlost te weten Othoniel Cenez sone, den ioncsten broeder van Caleb,

+ B

10

ende den gheest Godts was in hem, ende hy heeft een rechter geweest ouer Israhel.

Ende hy is wtghetrocken ten strijde, ende die Heere heeft Chusan Rasathaim den coninck van Sirien in sijn handen gheleuert, ende hy heeft dien verwonnen,

11

Ende het lant heeft veertich iaren in rusten ghe-

[p. *202]

weest, Ende Othoniel Cenez sone is ghestoruen.

12

Ende die kinderen van Israhel hebben wederom quaet ghedaen voor dat aenschijn des Heeren, Die welcke heeft teghen hen versterct Eglon den coninc van Moab om dat sij quaet ghedaen hadden voor sijn aensicht,

13

Ende hy versaemde met hem die kinderen van Ammon ende Amalec, Ende Eglon is wtghereyst, ende hy heeft Israhel gheslaghen ende der palmen stadt beseten,

14

Ende die kinderen van Israhel hebben ghedient Eglon den coninck van Moab achtien iaren,

15

ende daer nae hebben sij totten Heere gheroepen, die welcke hen eenen verlosser heeft verwect, ⁺ghenoemt Aod die sone van Gera des soons van Iemini die beyde sijn handen voor die rechte hant ghebruycte.

Ende die kinderen van Israhel hebben daer hem giften ghesonden Eglon den coninck van Moab,

+ C

16

Die welcke maecte hem een swaert op beyde sijden snijdende, hebbende int midden eenen hecht een palm lanc ende hy is daer mede omgort onder sijn cleedt op sijn rechte dgye.

17

Ende hy presenteerde die giften Eglon den coninc van Moab. Maer Eglon was bouen maten seer vet,

18

Ende als hi hem die gauen ghepresenteert hadde, soo is hi sijn ghesellen gheuolcht die met hem comen waren,

19

Ende wederom ghecomen sijnde van Galgalis daer die afgoden waren, soo heeft hy totten coninc gheseyt. Ic heb aen v een verborghen heymelijc woort o coninc, Ende hy gheboodt datmen swijghen soude, ende als sij alle gader wtghegaen waren die by hem waren,

20

so is Aod by hem incomen, ende hy sadt alleen in die somer eetcamer, Ende Aod seyde. Ick heb aen v dwoort Gods, Die welcke verhief hem terstont wt sijnen troon,

21

Ende Aod stack sijn slincke hant wt, ende nam dat steecswaert van sijn rechte sijde, ende hi stack die in sijnen buyc,

22

so crachtelijc, dat den hecht het yser in die wonde volchde, ende met die alder dicste vetticheyt des inghewants daer in besloten worde, Ende hi en track dat steecswaert niet weder wt, maer hy liet dat int lichaem alsoo hijt daer in ghesteken hadde, ende ter stont so berste den dreck des buycs wt die secrete plaetsen der natueren,

23

Ende als Aod seer neerstelijck die dore vander eetcameren ghesloten hadde ende metten slote vast ghemaect,

24

⁺soo is hy door die achter dore wtghegaen Ende als des conincs knechten inne quamen, soo saghen sij dat die dore vander eedtcameren ghesloten was, ende sij seyden. Hy maect by auontueren sijn gheuoech, in die somer eedtcamer,

+ D

25

Ende verbeydende soo langhe tot dat sij hen scaemden, ende siende datter niemant open en dede, soo hebben sij den slotel ghehaelt ende open doende hebben sij vonden haren Heere op die aerde doot ligghende.

26

Ende die wijle dat sij verbaest waren, soo is Aod ontuloden, ende is voorby ghegaen die plaetse der afgoden van daer hy weder comen was, Ende hy is ghecomen te Seriath

27

ende ter stont heeft hy met een trompet groot gheclanck ghemaect op tgheberchte van Ephraim, ende die kinderen van Israhel sijn met hem nederwaerts ghereyst, ende hy ghinc voor hen allen int vorste vanden heyre,

28

Die welcke seyde tot hemlieden. Volcht my, want die Heere heeft onse vianden die Moabiten in ons handen gheleuert, Ende si sijn hem nederwaerts gheuolcht, ende hebben inghenomen passagien der Iordanen die ouersetten nae Moab, ende sij en lieten niemant passeren,

29

maer sij versloeghen die Moabiters op dien tijt tot omtrent thienduysent alle vrome ende stercke mannen, niemant van hemlieden en mocht ontgaen,

30

Ende die Moabijter is op dien dach vernedert onder die hant van Israhel, ende het lant heeft gherust tachtentich iaren.

31

Nae desen was Samgar Anaths sone die ses hondert mannen vanden Philistijnen versloech met eenen ploechcoutere, ende hy bescermde oock Israhel.