Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde daer is eenen Enghel des Heeren opghecomen van Galgalis tot die plaetse der weenender, ende heeft gheseyt. Ick heb v wt Egipten gheleyt, ende v ghebracht int landt daer om dat ick uwen vaderen ghesworen hadde, ende ick heb ghelooft dat ick mijn verbont met vlieden niet breken en soude inder eewicheyt,

+ A

2

alsoo nochtans dat ghy gheen verbont en soudt maken met die inghesetenen van desen lande, ende dat ghy haerlieden outaren afworpen soudt, ende ghy en hebt mijn stemme niet willen hooren? Waerom hebdi dit ghedaen?

3

Daerom en heb ickse niet willen heel te niet doen wt uwen aensicht om dat ghy vianden hebben soudt, ende dat haerlieden goden v souden wesen tot eenen valle,

4

Ende als die Enghel des Heeren dese woorden sprack tot alle die kinderen van Israhel, so hebben sij haer stemme opghehauen, ende gheweent,

5

Ende die plaetse is ghenoemt die plaetse der screyender oft der tranen, ende sij hebben den Heere aldaer slachofferanden gheoffert.

6

⁺Aldus soo heeft Iosue het volck laten gaen ende die kinderen van Israhel sijn wech ghegaen een yeghelijck insijn besittinghe, om dat sij die besitten souden,

+ B

7

ende si hebben den Heere ghedient alle sijn daghen lanck, ende der ouders die langhen tijt na hen leefden, ende die alle des Heeren wercken wel wisten die hy met Israhel ghedaen hadde.

8

Maer Iosue Nuns sone des Heeren dienaer is ghestoruen out sijnde hondert ende thien iaren,

9

ende sij hebben hem begrauen in die pale van sijnder besittinghen in Thamnathsare opt gheberchte van Ephraim, aen die noortsijde vanden berch Gaas.

10

Ende alle dat gheslachte is tot haren vaders vergadert, ende daer sijn andere opghestaen die den Heere niet ghekent en hebben, noch sijn wercken die hy met Israhel ghedaen hadde,

11

Ende die kinderen van Israhel hebben quaet bedreuen voor dat aensicht des Heeren, ende Baalim ghedient,

12

Ende sij hebben den Heere haerder vaderen Godt verlaten, die hen wt dat lant van Egipten gheleydt hadde, ende sij hebben die vreemde goden gheuolcht, ende die goden vanden volcken die rontsomme van hen woonden, ⁺ende si hebben die aenbeden, ende den Heere tot gramscap verwect,

+ C

13

verlatende hem ende dienende Baal ende Astharoth.

14

Ende die Heere is gram gheworden teghen Israhel, ende hy heeftse gheleuert in die handen vanden roouers, die welcke hen gheuanghen hebben, ende hebbense vercocht haren vianden die rontsomme hen woonden, ende sij en mochten haer wederpartien niet teghenstaen,

15

maer waer henen dat si trecken wilden, daer was die hant des Heeren op hen, ghelijck hi ghesproken heeft ende hemlieden ghesworen, ende sij sijn seer ghepijnicht gheweest.

16

Ende die Heere heeft rechters verwect die hen verlossen souden wt der verderuers handen, maer sij en wilden die ooc niet hooren,

17

ontsuyuerende hen metten vreemden goden, ende die aenbiddende, Sij hebben seer corts den wech verlaten door den welcke hen vaders ghewandelt hadden, ende die gheboden des Heeren hoorende, deden sij heel daer teghen,

18

Ende als die Heere die rechters verwecte, soo worde hy in die daghen van dien rechters tot barmherticheyt gheboocht ende hy hoorde dat suchten vanden verdruckten, ⁺ende hy verlostese van tverslaen der verderuers,

+ D

19

Maer als die rechter doot was, so keerden sij wederom, ende deden veel argher dan haer voorvaders ghedaen hadden volghende die vreemde goden, die dienende ende die aenbiddende, Sij en hebben hen sonden niet ghelaten, noch den seer harden wech daer sij door plechen te wandelen,

20

Ende die rasende gramscap des Heeren is ghestoort gheweest teghen Israhel, ende hy heeft gheseyt. Aenghesien dat dit volc mijn verbont ghebroken heeft dat ick met haren vaderen vast ghemaect hadde, ende hebben versmaet te hooren nae mijn stemme,

21

daerom en sal ick die heydenen niet heel te niet doen, die Iosue ghelaten heeft, doen hy ghestoruen is,

22

op dat ick door dese mach Israhel ondersoecken, oft sij des Heeren wech bewaren ende daer in wandelen, ghelijc haer vaderen dien bewaert hebben, oft niet.

23

Hierom soo heeft die Heere all dese nacien van volcken laten blijuen, ende hy en heeft die niet ter stont willen verdrijuen, noch hy en heeft die in die handen van Iosue niet gheleuert.