Den gheheelen Bybel, Inhoudende het oude ende nieuwe Testament (Leuvense bijbel 1548)

1

⁺NAE die doot van Iosue, so hebben die kinderen van Israhel raet vanden Heere gheuraecht seggende. Wie sal voor ons optrecken teghen die Chananiten, ende der orloghen leytsman sijn?

+ A

2

Ende die Heere heeft geseyt. Iudas sal optrecken, Siet ic heb dlant in sijn handen gheleuert,

3

Ende Iudas seyde tot Simeon sijnen broeder. Coemt met my opwaerts in mijn lot ende strijdt tseghen den Chananeus, op dat ick met v trecke in v lot, Ende Simeon is met hem wech ghegaen

4

Ende Iudas is opwaerts ten strijde ghetrocken, ende die Heere heeft die Chananiters ende die Pherezeiters in haer handen gheleuert, ende sij hebben te Bezec thien duysent mannen verslagen,

5

⁺Ende sij hebben gheuonden Adonibezec te Bezec, ende sij hebben tseghen hem ghestreden ende sij versloegen die Chananiters ende Pherezeiters,

+ B

6

Maer Adonibezec vluchtede, dien sij veruolgende hebben gheuangen, afsnijdende duyterste van sijn handen ende voeten,

7

Ende Adonibezec heeft geseyt. Tseuentich coningen afgesneden hebbende duyterste van handen ende voeten, vergaderden onder mijn tafel die bleuelingen van mijnder spijsen. Gelijc ic ghedaen hebbe, also heeft my die Heere wederom ghedaen, Ende sij hebben hem ghebracht binnen Iherusalem, ende daer is hy ghestoruen.

8

Aldusdan die kinderen van Iuda die stadt van Iherusalem bestrijdende hebben die ingenomen ende verslaghen met dat scerpte vanden swaerde, verbrandende die gheheele stadt,

9

Ende daer nae sijn sij nederwaerts ghetrocken, ende hebben teghen die Chananiters ghestreden, die opt gheberchte woonden, ende nae den suyden in die platte nederlanden,

10

⁺Ende Iudas reysende tseghen die Chananiters die te Hebron woonden (welcks naem van oudts was Cariatharbe) heeft verslaghen Sesai ende Ahiman, ende Tolmai,

+ C

11

ende van daer vertrocken sijnde, is hy ghereyst tot die inwoonders van Dabir, welcks ouden naem was Cariathsepher, dat is der letteren stadt,

12

Ende Caleb heeft gheseyt. Soo wie Cariathsepher slaet ende die bederft, dien sal ick Aram mijn dochter tot een huysvrouwe gheuen,

13

Ende als Othoniel die sone van Cenez Calebs ioncste broedere die inghenomen hadde, soo heeft hy Aram sijn dochter hem tot een huysvrouwe ghegeuen,

14

Die welcke als sij ouer wech reysde, soo vermaende haer man haer dat sij van haren vader soude een acker begheren, Die welcke als fij versuchte sittende op eenen ezel, so seyde tot haer Caleb. ⁺Wat is v?

+ D

15

Ende sij antwoorde. Gheeft my een benedijnghe Want ghy hebt my een droogh lant ghegeuen, gheeft my ooc een wateruloedich lant. Dus heeft haer Caleb een lant ghegeuen, wateruloedich van bouen ende wateruloedich van beneden,

16

Maer Cineus kinderen van Moyses maescap sijn opghetrocken van der Palmen stadt met die kinderen van Iuda in die woestijne van haren lote welc is ghelegen aen die suytsijde van Arad, ende sij hebben met hen ghewoont,

17

Ende Iudas is wech ghetrocken met Simeon sijnen broeder, ende sij hebben tsamen die Chananiters gheslagen, die te Sephath woonden ende die ghedoot, Ende den naem van dier stadt is ghenoemt Horma, dat is veruloect van Godt,

18

Ende Iudas heeft Gaza inghenomen met sijnen palen, ende Ascalon ende Accaron met sijnen palen,

19

Ende die Heere is met Iuda geweest, ende hy heeft die gheberchten beseten, ende hy en heeft die bewoonders vander valleyen niet mogen te niet doen, want sij hadden oueruloedichlijcken veel wagenen met yseren seysenen,

20

⁺Ende hebben Caleb ghegeuen Hebron ghelijck Moyses gheseyt hadde, die welcke heeft daer wt drij kinderen van Enac vernielt,

+ E

21

Maer den Iebuseiter bewoonder van Ierusalem en hebben Beniamins kinderen niet heel vernielt, ende die Iebuseiters hebben ghewoont metten kinderen van Beniamin binnen Iherusalem tot opden dach van heden toe.

22

Ende dat huys van Ioseph is opghetrocken tot Bethel, ende die Heere heeft met hen gheweest,

23

Want als sij die stadt beleyt hadden die te voren Luza hiet,

24

soo hebben sij eenen man ghesien wter stadt comende, ende sij hebben tot hem gheseyt, toont ons den inganck vander stadt, ende wij sullen met v barmherticheyt doen,

25

Ende als hy hemlieden dien ghetoont hadde, soo hebben sij die stadt gheslagen metten scerp vanden swaerde, maer dien man met alle sijnen gheslachte hebben sij laten gaen,

26

die welcke (als hy verlost was) is wech ghegaen int lant van Hethim, ende heeft daer een stadt ghetimmert, ende die Luza ghenoemt, die welcke also ghenoemt is tot opden dach van heden toe,

27

⁺Ende Manasses en heeft Bethsan ende Tanach met haren dorpkens niet heel vernielt ende die inghesetenen van Dor, ende Ieblaam, ende Mageddo, met haren dorpkens, ende die Chananiters hebben begonnen by hemlieden te woonen,

+ F

28

Maer als Israhel machtich gheworden was, soo hebben sij die ghedwongen tribuyt te geuen, ende sij en hebbense niet willen heel te niet doen,

29

Ephraim en heeft oock die Chananiters niet ghedoot die in Gazer woonden, maer sij hebben met hem ghewoont,

30

Zabulon en heeft oock niet heel te niet ghedaen die inghesetenen van Cethron, ende Naalon, maer dat Chananiters volck heeft ghewoont int midden van hem, ende sij gauen hem tribuyt,

31

Ende Aser en heeft niet heel te niete ghedaen die inwoonders van Accho, ende van Sidon ende Ahalab, ende Achazib, ende Helba, ende Aphec, ende Rohob,

32

⁺Ende sij hebben ghewoont int midden vanden Chananiters bewoonders van dien landen, noch sij en hebben die niet ghedoot

+ G

33

Nephtali, ende heeft oock niet heel te niet ghedaen die inwoonders van Bethsemes ende van Bethanath, ende hy

[p. *201]

heeft ghewoont onder die Chananeen des lants bewoonders, Ende die Bethsemiters, ende Bethaniters sijn tributarisen gheweest,

34

Ende die Amorrhiten hebben die kinderen van Dan benaut int gheberchte, ende sij en hebben hen gheen plaetse ghegheuen dat sij souden nederwaerts comen tot die platte nederlanden,

35

ende sij hebben ghewoont opt gheberchte Hares, welck te segghen is een ghetuyghenis, in Aialon, ende Salebun, Maer die hant van Iosephs huys is machtich gheworden ende sij hebben die Amorrhiten onder tribuyt ghebracht,

36

Ende die pale vanden Amorrhiten is gheweest vanden opganc des scorpioens die steenrootse ende die plaetsen daer ouer ligghende.