Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺MAer doent langen tijt gheleden was, nae dat die Heere den volck van Israhel vrede verleent hadde, doen alle die natien int ronde onder hen bedwanc waren, ende doen Iosue nv seer langhe gheleeft hadde, ende seer out was van iaren,

+ A

2

so heeft Iosue gheheel Israhel geroepen, ende die outste des volcs, ende die princen, hooftmannen, ende meesters, ende hi heeft tot hemlieden gheseyt. Ic ben out geworden ende seer ouertijdich van ouderdom,

3

ende ghi siet alle die dinghen welc die Heere uwe God ghedaen heeft alle den natien des volcs die rontsomme gheleghen sijn, hoe dat hi seluer voor v lieden ghestreden heeft,

4

Ende nv aengesien dat hi v metten lote alle dlant ghedeylt heeft, van die oostsijde der iordanen tot die groote zee toe, ende want daer noch veel natien ouerbleuen sijn,

5

soo sal die Heere uwe Godt die oock verderuen, ende van uwen ooghen wech nemen, ⁺ende ghi sult dat lant besitten, ghelijck hy v belooft heeft,

+ B

6

alleen hebt v vromelijck, ende sijt sorchfuldich dat ghi bewaert alle die dinghen die daer ghescreuen sijn in dat boeck van Moyses wet, ende en gaet daer niet besiden af, ter rechter noch ter slincker hant,

7

Op dat (als ghy incomen sult sijn tot die heydenen, die onder v lieden sijn sullen) ghy niet en sweert by den naem van haren goden, ende dat ghy die niet en dient, oft en aenbidt,

8

maer dat ghi den Heere uwen Godt vast by blijft, dwelc ghi ghedaen hebt tot op desen dach toe,

9

ende dan sal die Heere v Godt voor v aenschijn wech nemen groote ende seer machtighe natien van volcke, ende niemant en sal v lieden moghen wederstaen,

10

⁺Een van v lieden sal van dervianden duysent mannen wech iaghen, want die Heere uwe Godt sal seluer voor v lieden strijden alsoo hy ghelooft heeft,

+ C

11

Alleenlijck siet seer naerstelijck voor v dat ghy den Heere uwen Godt bemint,

12

Maer eest sake dat ghy wilt aenhanghen die dolinghen van desen volcke die onder v heden woonen, ende met hem lieden onderlinghe houwelijcken versamen ende vrientscappen maken,

13

soo weet nv dat die Heere uwe Godt dese natien niet en sal vernielen voor v aensicht, maer sij sullen v lieden wesen tot een grachte, ende tot eenen strick, ende tot een struycksele aen v sijden, ende eenen scerpen staeck in v ooghen, tot dat hy v sal wech ghenomen ende verdoruen hebben van desen seer goeden lande, welck hy v ghegheuen heeft,

14

⁺Siet ick sal heden inghaen den wech van alder eerden, ende ghy sult met gheheelder herten bekennen, datter niet een woort voorby verloren en is gheghaen, van alle den woorden welc die Heere v belooft heeft te doen,

+ D

15

Daerom ghelijck hy metten wercken volbracht heeft dat hy ghelooft heeft, ende ghelijc dat alle dingen gheluckichlijck comen sijn, also sal hi ooc op v bengen alle dat quaet daer hy v mede ghedreycht heeft, totdat hy v sal

[p. *199]

wech ghenomen ende vernielt hebben van desen seer goeden lande dwelc hi v gegeuen heeft,

16

om dat ghi sult ouerghetreden hebben het verbont des Heeren ws Godts dwelc hy met v lieden ghemaect heeft, ende den vreemden goden ghedient hebt, ende die aenbeden. Die gramscap des Heeren sal haestelijc tegen v opstaen, ende ghy sult van desen seer goeden lande wech ghenomen worden dwelck hy v gheleuert heeft.