Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺ENde Iosue heeft alle die gheslachten van Israhel vergadert te Sichem, ende hy heeft die ouders, ende princen ende rechters, ende meesters gheroepen, ende si hebben ghestaen voor dat aenschijn des Heeren,

+ A

2

ende hy heeft totten volcke ghesproken aldus. Dit seyt die Heere die Godt van Israhel. V vaders hebben van ierst ghewoont ouer den vloet, Thare Abrahams vader ende Nachor, ende sij hebben den vreemden goden ghedient,

3

Daerom heb ic Abraham uwen vader ghenomen wt die palen van Mesopotamien, ende ick heb hem ghebracht int lant van Chanaan, ende sijn saet vermenichfuldicht, ende hem Isaac ghegheuen,

4

ende dien heb ick noch voorts ghegheuen Iacob ende Esau, Vanden welcken heb ick Esau dat gheberchte van Seir ghegheuen te besitten, Maer Iacob ende sijn sonen reysden nederwaerts in Egipten,

5

Ende ic heb ghesonden Moysen ende Aaron, ende Egipten gheslagen met veel teekenen, ende wonderlijcke wercken,

6

Ende ick heb v lieden ende uwe vaders wt Egipten gheleyt, ⁺ende ghi sijt comen tot aen die zee, ende die Egiptenaren hebben v vaders veruolcht met wagenen ende rosvolc tot aen die roode zee toe.

+ B

7

Ende die kinderen van Israhel hebben totten Heere geroepen ende hi stelde duysternissen tusschen v ende die Egiptenaren, ende hy heeft die zee op hen ghebracht, ende hy heeftse bedect. V ooghen hebben ghesien alle die dingen die ick in Egipten ghedaen hebbe, ende ghi hebt seer langen tijt in die woestijne ghewoont,

8

ende ick v bracht int lant van die Amorrheen die welcke woonden ouer die Iordane, Ende als sij tsegen v streden, soo heb icse in v handen gheleuert ende ghi hebt hen lant beseten, ende hen verslagen

9

Maer Balac Sephors sone die coninck van Moab is opghestaen, ende heeft tegen Israhel ghestreden ⁺Ende hy heeft wtghesonden ende doen roepen Balaam Beors sone dat hy v vermalendijden soude,

+ C

10

ende ick en wilde hem niet hooren, Maer daer tegen heb ic v ghebenedijt door hem, ende ick heb v wt sijnen handen verlost,

11

Ende ghy sijt door dien iordane ghegaen, ende ghecomen tot Iericho, Ende die mannen van dier stadt hebben tseghen v ghestreden, die Amorrhiters ende Pherezeiters, ende die Chananiters, ende Hethiters, ende Gergeseiters, ende Heueiters, ende Iebuseiters, ende ick heb die in v handen gheleuert,

12

Ende ick heb voor v horselen ghesonden, ende ick hebse wt haren plaetsen verdreuen twee coningen der Amorrhiters niet met uwen swaerde, oft met uwen boghe,

13

Ende ic heb v een lant ghegheuen daer ghi niet in ghearbeyt en hebt, ende steden die ghi niet ghetimmert en hebt, dat ghi daer in woonen soudt, wijngaerden ende olijfgaerden die ghi niet geplant en hebt,

14

Daerom nv so vreest den Heere, ende dient hem met een volcomen ende seer warachtich herte, ende doet wech die goden, den welcken uwe vaders ghedient hebben in Mesopotamien, ende in Egipten, ende dient den Heere,

15

⁺Maer eest dat v quaet dunct dat ghi den Heere dienen soudt, v wort koese ghegeuen, Kiest heden dat v belieft, wien dat ghi aldermeest sculdich sijt te dienen tsij die goden den welcken v vaders ghedient hebben in Mesopotamien, oft den goden vanden Amorrhiters, in wiens lant dat ghi woont, Maer ic ende mijn huys sullen den Heere dienen,

+ D

16

Ende dat volc heeft gheantwoort ende gheseyt. Verre sij dat van ons, dat wij den Heere souden verlaten, ende den vreemden goden dienen,

17

Die Heere onse God heeft ons ende onse vaders geleyt wt dat lant van Egipten ende wt dat huys der slauernien ende heeft (daer wijt sagen) gedaen groote teekenen, ende hy heeft ons bewaert in alle die wegen daer wi door gereyst hebben ende onder alle die natien daer wi door ghepasseert sijn,

18

Ende hi heeft alle die volcken verdreuen die Amorrhiters des lants inghesetenen, in dwelcke wij ghecomen sijn, Hierom sullen wi den Heere dienen want hi is onse Godt.

19

⁺Ende Iosue heeft totten volcke gheseyt. Ghi en sult den Heere niet mogen dienen, want Godt is heylich ende een sterck wreker, ende hy en sal v sonden ende misdaden niet vergheuen,

+ E

20

Eest dat ghi den Heere verlaet ende den vreemden goden dient, so sal hi hem ommekeeren, ende v pijnigen ende verderuen na dat hi v veel goets sal gedaen hebben,

21

Ende dat volc heeft tot Iosue geseyt. Ten sal gheensins also wesen ghelijc ghi segghet, maer wi sullen den Heere dienen,

22

Ende Iosue totten volcke. Ghi sijt getuyghen (seyt hy) dat ghi seluer voor v den Heere vercoren hebt, om hem te dienen, Ende si antwoorden, wi sijn getuygen,

23

Daerom doet nv (seyt hi) wech, die vreemde goden, wt dat midden van v lieden, ende boocht v herten tot den Heere den Godt van Israhel,

24

Ende dat volc seyde tot Iosue, Den Heere onsen Godt sullen wij dienen, ende sijnen gheboden ghehoorsaem wesen.

25

⁺Aldus soo heeft Iosue op dien dach een verbont ghemaect, ende den volcke te vorengheleyt die gheboden ende rechten in Sichem.

+ F

26

Ende hy heeft ooc alle dese woorden ghescreuen int boec van des Heeren wet, ende heeft eenen seer grooten steen ghenomen, ende dien ghestelt onder den eycken boom, die in die heylighe plaetse des Heeren was

27

ende hi seyde tot alle den volcke. Siet desen steen sal v lieden wesen tot een ghetuygenisse, dat ghy alle die woorden des Heeren ghehoort hebt, die hi v gheseyt heeft, op dat ghi by auontueren dat namaels niet en soudt willen loochenen, ende liegen den Heere uwen God

28

Ende hi heeft dat volc laten gaen een yeghelijcken in sijn besittinghe.

29

Ende na desen is Iosue Nuns sone des Heeren dienaer ghestoruen, out sijnde hondert enn thien iaren,

30

⁺Ende sij hebben hem begrauen in die palen van sijnder besittingen in Thamnathsare, die leyt opt geberchte van Ephraim, aen die noortsijde vanden berch Gaas,

+ G

31

Ende Israhel heeft den Heere ghedient alle die dagen van Iosue, ende der ouders die langen tijt na Iosue leefden, ende die alle des Heeren wercken kenden die hy in Israhel gedaen hadde.

32

Ende dat ghebeente van Ioseph het welcke die kinderen van Israhel wt Egipten ghebracht hadden, hebben sij begrauen te Sichem in een stuck vanden acker den welcken Iacob van Emors kinderen gecocht hadde, om hondert ionge scapen, ende desen acker was in die besittinge der kinderen van Ioseph,

33

Ende Eleazar Aarons sone is oock ghestoruen, ende sij hebben hem begrauen in Gabaath toebehoorende Phinees sijnen sone, welc hem ghegheuen was int gheberchte van Ephraim.

Hier eyndet dat boeck Iosue.