Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺TEn seluen tijde heeft Iosue gheroepen die Rubeniten, ende Gadditen, ende dat half gheslachte van Manasse,

+ A

2

ende hi heeft tot hen gheseyt. Ghy hebbet al ghedaen dat Moyses des Heeren dienaer v beuolen hadde, ende my oock in alle dinghen ghehoorsaen gheweest,

3

ende ghy en hebt v broeders binnen langhen tijt niet verlaten, tot op desen dach toe, onderhoudende dat ghebodt des Heeren ws Godts.

4

Hierom aenghesien dat die Heere uwe Godt uwen broeders rust ende vrede verleent heeft ghelijck hy ghelooft hadde, keert wederomme, ende gaet in uwe tabernakelen, ende int lant van uwer besittinghen, welck Moyses des Heeren dienaer v ghegheuen heeft ouer die iordane,

5

also nochtans dat ghi naerstelijck bewaert, ende metten wercken volbrenghet tghebodt ende die wet welck Moyses des Heeren dienaer v beuolen heeft, Dat ghy den Heere uwen God bemint, ende wandelt in alle sijn weghen, ende dat ghi sijn gheboden onderhoudt, ende hem aencleeft, ende hem dient in alle v herte, ende alle v ziele.

6

Ende Iosue heeftse ghebenedijt, ende laten gaen.

⁺Ende si sijn wederom ghekeert tot haerlieder tabernakelen.

+ B

7

Maer den haluen gheslachte van Manasse hadde Moyses een besittinghe ghegheuen in Basan, ende daerom heeft Iosue der ander helicht die daer ouerbleef een lot ghegheuen onder hen ander broeders ouer die iordane, aen die westsijde.

Ende als hy hen liet gaen in hen tabernakelen ende hy hen ghebenedijt hadde,

8

so seyde hi tot hen. Met veel goets ende rijcdommen keerdy wederom tot uwer steden met siluer, ende gout, metael, ende yser, ende met veelderhande cleederen, Deylt der vianden roof met uwen broeders.

9

Ende die kinderen van Ruben ende van Gad, ende dat halue gheslachte van Manasse, sijn wederom ghekeert ende wech ghegaen vanden kinderen van Israhel wt Silo die gheleghen is int lant van Chanaan, dat sij sonden gaen in Galaad dlant van hen besittinghe, dwelc sij vercreghen hadden, nae dat ghebodt des Heeren door die hant van Moyses.

10

⁺Ende als sij comen waren aen die tomben der iordanen int lant van Chanaan, so hebben sij by die iordane eenen outaer opgherecht van onmetelijcker grootheyt,

+ C

11

dwelc als die kinderen van Israhel ghehoort hadden, ende seker boden hen dit ouerbracht hadden, dat die kinderen van Ruben, Gad ende dat half deel van Manasses gheslachte eenen outaer opgherecht hadden int lant van Chanaan op die tomben der iordanen, teghen die kinderen van Israhel,

12

so sijn sij al te samen vergadert te Silo, datsij souden optrecken ende strijden teghen henlieden,

13

Ende by middelen tijde soo souden sij aen hen int lant van Galaad Phinees Eleazarus sone den priester,

14

ende thien hooftmannen met hen, wt elcken gheslachte eenen man besonder,

15

Die welcke sijn ghecomen by die kinderen van Ruben, ende Gad, ende dat half gheslachte van Manasse, int lant van Galaad, ende sij hebben tot henlieden gheseyt.

16

Dit ontbiet alle dat volc des Heeren. Wat ouertredinghe is

[p. *198]

dit? ⁺Waerom hebdi den Heere den Godt van Israhel verlaten, timmerende eenen gode lasterlijcken outaer, ende van sijnen dienst sceydende?

+ D

17

Duncket v cleyn te sijn dat ghi misdaen hebt metten afgod Beelphegor, ende dat die smette van dat groot misdaet, noch op v blijft tot desen dach toe, ende dat daer omme veel vanden volcke verslagen sijn?

18

Ende ghy hebt heden den Heere verlaten ende morgen sal sijn gramscap ouer gheheel Israhel haer wreetheyt openbaren,

19

Eest sake dat ghi v laet duncken dat het lant van uwen erfdeel onsuyuer is, so coemt ouer tot het lant daer des Heeren tabernakel is, ende woont onder ons, alleenlijc op dat ghi vanden Heere ende van onsen gheselscap niet en sceydt, eenen outaer ghetimmert hebbende buyten den outaer vanden Heere uwen Godt,

20

En heeft Achan Zares sone het ghebodt des Heeren niet ouertreden, daerom dat sijn gramscap ouer tgheheel volc van Israhel viel? Ende hi was een man, ende och oft hi alleen in sijn misdaet vergaen ware,

21

Ende die kinderen van Ruben ende Gad ende dat half deel van Manasses gheslachte hebben gheantwoort den princen die van Israhel wtgesonden waren.

22

⁺Die alder sterckste Godt die Heere, hy kent, ende Israhel salt mede verstaen, eest dat wi desen outaer gemaect hebben ter meyningen van eeniger ouertredingen, so en wil ons die Heere niet bewaren, maer plagen moet hy ons nv op desen tijt,

+ E

23

ende eest sake dat wij desen wt sulcken voornemen gemaect hebben, dat wi daer op souden heelbrantofferanden oft spijsoffer oft vreedsamige offeranden op leggen, soo moet die Heere dat versoecken ende vonnissen,

24

ende en hebben wi dat niet principalijc ghedaen wt sulcken ghepeyse, ende onderlingen raet, dat wi seyden. Morgen sullen v kinderen tot onsen kinderen seggen. Wat hebt ghi met den Heere den Godt van Israhel te doen?

25

o ghi kinderen van Ruben ende van Gad die Heere heeft tusschen ons ende v tot een pale ghestelt den vloet der iordanen, ende daerom en hebdi gheen deel in den Heere, Ende door dese oorsake sullen v kinderen onse kinderen afkeeren van die vreese des Heeren. Dus heuet ons beter ghedocht,

26

ende wi hebben gheseyt. ⁺Laet ons voor ons eenen outaer maken niet tot heelbrantofferanden, oft om slachofferanden te offeren,

+ F

27

maer tot een ghetuygenisse tusschen ons ende v, ende tusschen ons kinderen, ende uwe gheslachte, dat wi den Heere mogen dienen, ende dat wi ooc een recht behouden souden, om te offeren, heelbrantofferanden ende slachofferanden, ende vreedsamige offeranden, ende dat v kinderen gheensins morgen en moghen seggen tot onsen kinderen. Ghy en hebt gheen deel inden Heere,

28

Maer eest sake sat sij dat seggen willen, so sullen sij hem seggen. Siet daer den outaer des Heeren den welcken ons vaders ghemaect hebben, niet tot brantofferen oft tot sacrificie, maer tot een getuygenis tusschen ons ende v,

29

Verre moet die groote misdaet van ons wesen, dat wi souden vanden Heere sceyden, ende sijn voetstappen verlaten, ende dat wij daerom souden eenen outaer opghetimmert hebben, om heelbrantofferanden ende sacrificien oft slachofferanden daer op te offeren, buyten den outaer des Heeren ons Godts die daer ghemaect is voor sijn tabernakel.

30

Welcke dingen ghehoort hebbende Phinees die priester, ende die princen die met hem wtgesonden waren van Israhel sijn si ghepaeyt gheweest, ⁺ende si hebben die woorden der kinderen van Ruben ende Gad, ende van dat half geslachte van Manasse seer gheerne ontfangen,

+ G

31

Ende Phinees Eleazarus sone die priester heeft tot hen geseyt. Nv weten wi wel dat die Heere met ons is, aenghesien dat ghi vreemt sijt van deser ouertredingen, ende hebt die kinderen van Israhel verlost wt die hant des Heeren.

32

Ende hi is met die princen wedergekeert vanden kinderen van Ruben ende Gad, wt dat lant van Galaad, der palen van Chanaan, tot die kinderen van Israhel, ende hi heuet hen vertelt,

33

Ende die redene ghenoechde wel alle den ghenen diese hoorden, Ende die kinderen van Israhel hebben den Heere ghelooft, ende sij en hebben gheensins meer gheseyt, dat sij tegen hen souden optrecken ende strijden, ende het lant van haer besittinghe bederuen,

34

Ende die kinderen van Ruben, ende die kinderen van Gad hebben den outaer die sij ghemaect hadden ghenoemt. Ons ghetuyghenisse, dat die Heere self Godt is.