Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde die Heere heeft tot Iosue ghesproken segghende. Spreect tot die kinderen van Israhel ende segghet hen.

+ A

2

Scheydt wt die steden voor die vluchtighe, daer af dat ick ghesproken hebbe, door die hant van Moyses,

3

dat tot die vlieden mach soo wie een ziele onwetens gheslaghen heeft, ende dat hy mach ontulieden den toren van den naesten die des bloets wreker is,

4

als hi tot een van desen steden gheuloden sal sijn, ende hy sal staen voor die poorte der stadt, ende segghen tot die ouders van dier stadt, ⁺alle die dinghen die hem toonen sullen ontsculdich, ende alsoo sullen si hem ontfanghen, ende hem plaetse gheuen om te woonen,

+ B

5

Ende als die wreker des bloets hem veruolghen sal, soo en sullen sij dien in sijn handen niet leueren, om dat hy sijnen naesten onwetens gheslaghen heeft, ende want men niet ghetoonen en can dat hy twee oft drij daghen te voren sijn viant gheweest is,

6

Ende hy sal in die stadt woonen, tot dat hy stae voor trecht, reden gheuende van sijnen feyte, ⁺ende tot dat die ouerste priester sterue, die in dien tijde sijn sal, dan sal die dootslagher weder om comen ende gaen in sijn stadt ende in sijn huys, daer hy wt gheuloden was,

+ C

7

Ende si hebben daer toe ghescict Cedes in dlant van Galileen des gheberchte van Nephtali, ende Sichem int gheberchte van Ephraim, ende Cariatharbe, welc is Hebron int gheberchte van Iuda,

8

Ende ouer die Iordane teghen die oostsijde, van Iericho hebben sij daer toe ghescict Bosor die gheleghen is in die platte neder woestijne van Rubens gheslachte, ende Ramoth in Galaad van Gads gheslachte, ende Gaulon, in Basan, van Manasses gheslachte,

9

⁺Dese steden sijn ghestelt allen den kinderen van Israhel, ende aencomelinghen die onder hemlieden woonden, dat daer toe vlieden soude, soo wie een ziele onwetens gheslaghen hadde, ende dat hy niet en soude steruen in des naesten hant die begheert wraeck te doen ouer dat wtghestort bloet, tot dat hy voor tvolc stonde, om sijn sake te verclaren.

+ D