Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ENde alle die kinderen van Israhel sijn vergadert te Silo, ende sij hebben daer dat tabernakel des ghetuyghenis vast ghemaect, ende het lant was onder hen bedwanck,

+ A

2

Maer daer waren noch seuen gheslachten der kinderen Israhel ouerbleuen, die hen besittinghen noch niet ontfanghen en hadden,

3

Tot die welcke seyde Iosue. Hoe langhe suldy vergaen van traecheyt dat ghy niet en trect in dlant om dat te besitten, het welck die Heere uwer vaderen Godt v lieden ghegheuen heeft?

4

Kiest wt elcken gheslachte drij mans, dat sij die senden, dat die wtreysen ende het heel lant omme gaen, ende dat bescrijuen nae tghetal van een yeghelijcs menichte, ende dat sij tot my brenghen tghene dat sij bescreuen sullen hebben

5

Deylt voor v het lant in seuen deelen, Laet Iudas in sijn palen wesen van die suytsijde, ende Iosephs huys vanden noorden,

6

het landt dat midden tusschen dese leyt, suldi in seuen deelen bescrijuen, ende ghy sult hier by my comen, op dat ick voor den Heere uwen Godt mach voor v hier het lot worpen,

7

want die Leuiten en hebben onder v gheen erfdeel, ⁺maer dat priesterscap des Heeren is hen erfdeel, Maer Gad, ende Ruben, ende dat half gheslachte van Manasse hadden nv te voren haer besittinghen ontfanghen ouer die Iordane aen die oostsijde, welck hen Moyses des Heeren dienaer ghegheuen heeft.

+ B

8

Ende als die mannen opghestaen waren dat si reysen souden, om dat lant te bescrijuen, so heeft Iosue hen beuolen, segghende, Gaet rontsomme doort lant ende bescrijft dat, ende coemt wederom tot my, op dat ick hier voor den Heere te Silo mach het lot voor v worpen.

9

Aldus sijn sij ghereyst, ende dat lant al omme doorsiende, hebben sij dat ghedeelt in seuen deelen, scrijuende dit in eenen boeck, Ende sij sijn wederom tot Iosue ghecomen inden legher te Silo,

10

Ende hy heeft die loten gheworpen voor den Heere te Silo, ende den kinderen van Israhel het landt ghedeelt in seuen deelen.

11

Ende het ierste lot is opcomen der kinderen van Beniamin, nae haren familien, dat sij souden besitten het lant tusschen die kinderen van Iuda, ende die kinderen van Ioseph,

12

⁺Ende hen palen waren teghen den noorden vander Iordanen voortgaende by die sijde van Iericho noortwaerts, ende van daer opwaerts gaende nae tgheberchte teghen den westen, ende voorts doorcomende tot die woestijne van Bethanen,

+ C

13

ende voorts doorgaende by Luza aen die suytsijde, dese is Bethel, ende het daelt voorts tot Atarothaddar op den berch die gheleghen is aen dat suyden van neder Bethoron,

14

ende wort gheneycht gaende omme teghen die zee, tot aen die suytsijde vanden berch die teghen ouer Bethoron staet suytwaerts, ende sijn wtganghen sijn te Cariathbaal, , welck oock ghenoemt wort Cariathiarim der kinderen van Iuda stadt, dit is die sijde teghen die zee westwaerts,

15

Maer vanden suyden vander sijden van Cariathiarim, soo coemt die pale wt teghen die zec, ende gaet voorts tot die water fonteyne van Nephtoa,

16

Ende daelt neder op een deel van dat gheberchte welck is teghen ouer die valleye van Ennoms kinderen, ende het is teghen die noortsijde, in dat wterste deel van Raphaims valleye, Ende gaet nederwaerts tot Geennom (dat is die valleye van Ennom) by die sijde vanden Iebuseen, ⁺aen den suyden, ende coemt voorts tot die fonteyne Rogel,

+ D

17

doorgaende nae den noorden, ende wtcomende tot Ensemes, dat is die fonteyne der sonnen,

18

ende tgaet voorts dore tot die tomben, die daer sijn teghen ouer den opganck van Adommim, ende gaet uederwaerts tot Aben Boen, dat is den steen van Boen Rubens sone, Ende gaet voorts dore van die noortsijde, tot die platte acker landen, ende gaet nederwaerts tot dat effen lant,

19

ende gaet voorby teghen den noorden van Bethhagla, ende sijn wtganghen sijn teghen ouer die tonghe vander soutster zee, vanden noorden, ten eynde vander Iordanen, aen die suytsijde,

20

welck sijn pale is vanden oosten. Dit is die besittinghe der kinderen van Beniamin, nae haren palen int ronde, ende haren familien,

21

Ende haer steden waren Iericho, ende Bethhagla, ende Casis dal,

22

Betharaba, ende Saniaraim, ende Bethel,

23

ende Auim, ende Aphara, ende Ophera,

24

dat dorp van Hemona, ende Ophni, ende Gabee, twaelf steden ende haer dorpen,

25

Gabaon, ende Rama, ende Beroth,

26

ende Mesphe, ende Caphara, ende Amosa,

27

ende Recem, ende Iarephel, ende Tharela,

28

ende Sela, Eleph ende Iebus, welck is Ierusalem, Gabaath, ende Cariath veerthien steden ende haer dorpen, Dit is die besittinghe der kinderen van Beniamin, na haren familien.