Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ENde dlot is gheuallen den gheslachte van Manasse (want hy is Iosephs ierste gheboren sone) Machir den iersten gheborenen van Manasse den vader van Galaad, die welcke heeft gheweest een strijdtbaer man, ende heeft ghehadt tot een besittinghe Galaad ende Basan,

+ A

2

ende den anderen van Manasses kinderen by haren familien, Den kinderen van Abiezer, ende den kinderen van Helec, ende den kinderen van Esriel ende den kinderen van Sechem ende den kinderen van Hepher, ende den kinderen van Semida, Dit sijn die kinderen van Manasse Iosephs sone, die mannen by haren maesscappen,

3

Maer Salphaad die sone van Hepher des soons Galaad des soons Machir des soons Manasse, en hadde gheen sonen, maer alleen dochteren, der welcker namen waren dese, Maala ende Noa, ende Hegla, ende Melcha, ende Thersa,

4

ende sij sijn comen int aenscijn Eleazari des priesters, ende Iosue Nuns soons, ende der princen, segghende, Die Heere heeft gheboden door die hant van Moyses, datmen ons een besittinghe gheuen soude int midden van onsen broederen, Ende hy heeft hen nae des Heeren ghebodt ghegheuen een besittinghe int midden van haers vaders broederen,

5

Ende die coordekens van Manasse sijn thien gheuallen, ⁺sonder dlant van Galaad ende Basan ouer die Iordane,

+ B

6

Want die dochteren van Manasse hebben een erffelijcheyt beseten int midden van sijnen sonen, Maer dlant van Galaad is ten deele gheuallen den kinderen van Manasse die daer noch ouer waren,

7

Ende die pale van Manasse was van Aser, Machmathath die siet teghen Sichem ende gaet wt ter rechter sijden bi die bewoonders der fonteynen Taphue,

8

Want in Manasses lot was gheuallen dlant van Taphue, welc is by die palen van Manasse der kinderen Ephraim,

9

Ende die pale vander rietvalleye gaet nederwaert na die suytsijde der beken van Ephraims steden, die welcke sijn int midden van Manasses steden, Die pale van Manasse is van die noortsijde der beken, ende haren wtganck gaet tot die zee,

10

Alsoo dat het erfdeel van Ephraim sij vanden suyden, ende Manasses erfdeel van den noorden, ende beyde die deelen besluyte die zee, ende dat sij met malcander aen een comen int gheslachte van Aser vanden noorden, ⁺ende int gheslachte van Issachar vanden oosten,

+ C

11

Ende die erffenisse van Manasse was in Issachar ende in Aser, Bethsan ende sijn dorpkens, ende Ieblaam met sijnen dorpkens, ende die inghesetenen van Dor, met haren steden ende daer toe oeck die bewoonders van Endor met haren dorpkens, Desghelijcs oock die inwoonders van Tenac met haren dorpkens, ende die inwoonders van Mageddo met sijnen dorpkens, ende dat derde deel vander stadt Nopheth,

12

Ende Manasses kinderen en consten dese steden niet verderuen, maer dat Chananeus volc begonste in dit lant te woonen,

13

Maer nae dat die kinderen van Israhel machtich gheworden waren, soo hebben sij dat Chananeus volc onder hen bedwanc ghebracht, ende sij hebbense tributarisen ghemaect ende sij en hebbense niet verslaghen.

14

Ende die kinderen van Ioseph hebben tot Iosue ghesproken, ende gheseyt. Waerom hebdi my een besittinghe van eenen lote ende van eenen coordeken ghegheuen, daer ick van so grooten menichte ben, ende mi die Heere ghebenedijt heeft?

15

⁺Den welcken Iosue heeft gheseyt, Sydy een groot volck, soo gaet opwaerts in die bosscagien, ende houwet ruymte af voor v seluen in dat lant van den Pherezeiters, ende Raphaim want die besittinghe van Ephraims gheberchte v te cleyne is,

+ D

16

Ende die kinderen van Ioseph hebben hem gheantwoort. Wij en sullen niet connen opt gheberchte comen, aenghesien dat die Chananiters yseren waghenen ghebruycken die opt blac lant woonen, daer Bethsan gheleghen is met sijnen dorpkens, ende Iezrael besittende die helicht vander valleyen,

17

Ende Iosue seyde tot den huyse van Ioseph, Ephraim, ende Manasse. Ghy sijt een volc veel van ghetale, ende van grooter macht, ghy en sult niet een lot hebben,

18

Maer ghi sult trecken opt gheberchte ende daer voor v af houwen, ende suyueren ruymte om te woonen, ende dan suldi mo-

[p. *195]

ghen voorts trecken, als ghy dat Chananeus volck sult verdreuen hebben, die welcke ghy segt dat yseren waghenen hebben, ende seer sterck sijn.