Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺DIt is tghene dat die kinderen van Israhel beseten hebben int lant van Chanaan, welc hen ghegheuen hebben Eleazar die priester ende Iosue die sone van Nun ende die Princen der familien nae die gheslachten van Israhel,

+ A

2

metten lote dat al deylende, ghelijck die Heere beuolen hadde door die hant van Moyses den neghen gheslachten ende den haluen gheslachte,

3

Want den twee gheslachten ende den haluen, hadde Moyses ouer die Iordane een besittinghe ghegheuen, sonder die Leuiten die gheen landt en hebben ontfanghen onder hen broeders,

4

maer in hen plaetse quamen die kinderen van Ioseph in twee gheslachten ghedeelt Manasse ende Ephraim, ⁺ende die Leuiten en ontfinghen gheen ander deel des lants, dan alleen steden om in te woonen ende haer voorsteden om te voeden hen groot ende cleyn vee,

+ B

5

Ghelijck die Heere Moysi beuolen hadde alsoo hebben die kinderen van Israhel ghedaen, ende sij hebben dlant ghedeylt.

6

Hierom sijn die kinderen van Iuda ghecomen tot Iosue in Galgala, ende Caleb die sone Iephone die Cenezeus heeft tot hem ghesproken, Ghi weet wat die Heere ghesproken heeft tot Moysen den man Gods van my ende v, in Cadesbarne,

7

Veertich iaren oudt was ick, doen Moyses des

[p. *193]

Heeren dienaer my sandt van Cadesbarne, dat ick dlant besien soude, ende ick heb hem ghebootscapt, dat my warachtich dochte,

8

maer mijn broeders die met my opghetrocken waren, ⁺hebben het herte des volcs onmachtich ghemaect, ende niet te min ick heb gheuolcht den Heere mijnen Godt,

+ C

9

Ende Moyses heeft ghesworen op dien dach segghende. Dlant het welc uwen voet betreden heeft dat sal v besittinghe wesen ende uwer kinderen inder eewicheyt, om dat ghy gheuolcht hebt den Heere mijnen Godt,

10

Hierom heeft my die Heere dleuen verleent, ghelijck hy belooft heeft tot op desen dach toe, Het sijn vijf ende veertich iaren voorleden, van dat die Heere dit woort ghesproken heeft tot Moysen, doen Israhel wandelde door die woestijne, Heden ben ick vijfentachtentich iaren out,

11

alsoo weluarende als ick weluarende was op dien tijt doen ick om te bespieden wtghesonden was, ⁺Die vromicheyt van dien tijt blijft in mi tot op desen dach toe, so wel om te strijden, als om te reysen

+ D

12

Daerom soo gheeft my desen berch, den welcken die Heere belooft heeft, doen ghijt oock hoorde, daer Enacim op sijn, ende groote steden ende vast besloten, oft die Heere by auontueren met my ware, ende dat ickse mocht te niet doen, ghelijck hy my belooft heeft.

13

Ende Iosue heeft hem ghebenedijt ende hem gheleuert Hebron tot een besittinghe,

14

Ende van dien tijt heeft Hebron toebehoort Caleb den sone van Iephone den Cenezeus, tot opden dach van heden toe om dat hy gheuolcht heeft den Heere den God van Israhel,

15

Den naem van Hebron worde te voren ghenoemt Cariatharbe, Adam die alder meeste is daer onder die Enacims gheleyt, ende dlant hiel op van strijden.