Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺IOsue was out ende van grooter ouderdom, ende die Heere heeft tot hem gheseyt, Ghy sijt out gheworden ende van grooter ouderdom, ende daer is een seer breedt landt ghelaten, dat noch niet metten lote ghedeelt en is,

+ A

2

te weten gheheel Galileen, Philisthijm, ende gheheel Gessuri,

3

Van den turbelen vloet die Egipten watert, tot aen die palen van Accaron teghen den Noorden, Dlant van Chanaan dwelck in vijf cleyn coninghen der Philistijnen ghedeylt wordt, Die Gazeiters ende Azotiters ende Alcaloniters, Getheiters ende Accaroniters.

4

Maer aen die zuytsijde sijn de Heueiters, alle dlant van Chanaan, ende Maara der Sidoniters, tot Apheca, ende die palen der Amorrhiters,

5

ende haer reghenooten, Ende ooc dlantscap van Libanus, teghen den Oosten van Baalgad onder den berch Hermon tot dat ghy coemt in Emath,

6

Van allen den ghenen die daer woonen opden berch van Libanus tot die wateren Maserephoth, ende alle die Sidoniters, Ick ben die ghene diese vernielen sal voor daensicht der kinderen van Israhel. Daer om laet dit lant comen int deel der erffenissen der kinderen van Israhel, ghelijck ick v beuolen hebbe.

7

⁺Ende nv deylt dat lant tot een besittinghe den neghen gheslachten, ende den haluen gheslachte van Manasses,

+ B

8

met den welcken Ruben ende Gad het lant beseten hebben, het welck hen Moyses des Heeren dienaer gheleuert heeft ouer die vloeden der Iordanen aen die oostsijde

9

van Aroer, welck gheleghen is aen den oeuer der beken Arnon ende int midden der valleyen, ende alle die platte landen van Medaba tot Dibon toe,

10

ende alle die steden van Sehon den coninck vanden Amorrhiters die gheregneert heeft in Hesebon tot aen die palen der kinderen van Ammon,

11

ende Galaad, ende die pale van Gessuri ende Machati, ende alle den berch Hermon ende gheheel Basan tot Salecha toe,

12

alle tconincrijck van Og in Basan die gheregneert heeft in Astaroth ende Edrai, hy was van die ouerghebleuene van Raphaim, ende Moyses heeft dese verslaghen ende vernielt

13

Ende die kinderen van Israhel en hebben niet willen heel te niet doen Gessuri ende Machati, ende sij hebben ghewoont int midden van Israhel tot opden dach van heden toe,

14

Ende den gheslachte van Leui en heeft hy gheen besittinghe ghegheuen, maer die sacrificien ende slachofferanden des Heeren des Godts van Israhel, dese sijn haer erffenisse, ghelijc hy hen gheseyt heeft.

15

⁺Aldus heeft Moyses een besittinghe ghegheuen den gheslachte der kinderen van Ruben, na hen maesscappen,

+ C

16

Ende hen pale was van Aroer, welck gheleghen is op den oeuer der beken van Arnon, ende int midden van die valleye der seluer beken, alle dat effen lant dwelc leyt tot Medaba

17

ende Hesebon, ende allen haer dorpkens welck sijn in die veltachtighe landen Ende oock Dibon ende Bamoth Baal, ende die stadt Baalmeon,

18

ende Iassa ende Cedimoth, ende Mephaath,

19

ende Chariathaim, ende Sabama, ende Sarathasar opden berch der valleyen

20

Bethphogor ende Asedoth, Phasga, ende Bethiesimoth,

21

ende alle die steden des platten lants ende alle die rijcken van Sehon der Amorrhiters coninc die geregneert heeft in Hesebon, den welcken Moyses verslaghen heeft, met die princen van Madian den Heueiter, ende Recem, ende Sur, ende Hur, ende Rebe die vorsten van Sehon inwoonders des lants,

22

Ende Balaam den sone van Beor den waersegghere hebben die kinderen van Israhel metten swaerde verslaghen metten anderen verslaghenen,

23

Ende die pale der kinderen van Ruben is gheworden die vloet Iordanis, Dit is die besittinghe der Rubeniters by hen maesscappen der steden ende dorpkens,

24

Ende Moyses heeft ghegheuen den gheslachte van Gad ende haren kinderen by hen maesscappen een besittinghe waer af dit is die deylinghe,

25

Die pale van Iaser, ende alle die steden van Galaad, ende dat half deel van dlant der kinderen van Ammon, tot Aroer, welck is teghen Rabba,

26

ende van Hesebon tot Ramoth, Masphe ende Betomim, ende van Manaim tot die pale van Dabir,

27

⁺Ende in die valleye Betharam ende Bethnemra, ende Sochot ende Saphon, dat ander deel des rijcs van Sehon des conincs van Hesebon, ende het eynde van desen is oock die Iordane, tot dat wterste deel der zee Ceneroth, ouer die Iordane aen die oostsijde.

+ D

28

Dit is die besittinghe der kinderen van Gad bi haren familien hen steden ende dorpen,

29

Oock heeft hi den haluen gheslachte van Manasse ende sijnen kinderen nae hen maesscappen een besittinghe ghegheuen,

30

waer af dit het beghinsel is, Van Manaim, gheheel Basan, ende alle die rijcken van Og den coninck van Basan, ende alle die dorpen van Iair die in Basan sijn, tsestich steden

31

ende dat halfdeel van Galaad, ende Astaroth ende Edrai die steden des rijcs van Og in Basan den kinderen van Machir des soons van Manasse, den haluen deele der kinderen van Machir by haren maesscappen,

32

Dese besittinghe heeft Moyses ghedeylt in die veltachtighe landen van Moab, ouer die iordane teghen ouer Iericho aen die oostsijde,

33

Ende den gheslachte van Leui en heeft hy gheen besittinghe ghegheuen, Want die Heere die Godt van Israhel is seluer hen besittinghe ghelijck hy hen ghesproken heeft.