Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

DIt sijn die coninghen welc die kinderen van Israhel verslaghen hebben, ⁺ende hebben hen lant beseten, ouer die Iordane teghen der sonnen opganck, vander beken Arnon totten berch Hermon, ende alle die oostsijde die daer siet nae die woestijne.

+ A

2

Sehon die coninck der Amorrheen, die woonde in Hesebon, heeft heerscappie ghehadt van Aroer welc gheleghen is op den oeuer der beken Arnon, ende van dat middelste deel in die valleye, ende der helicht van Galaad tot aen die beke van Ieboc welc is die pale der kinderen van Ammon,

3

ende vander woestijnen totter zee Ceneroth teghen den Oosten, ende tot die zee der woestijnen, welck is dalder soutste zee, aen die oostsijde door den wech die leydt tot Bethsunoth, ⁺ende van die suytsijde die light beneden Asedoth Phasga.

+ B

4

Die pale van Og des conincs van Basan van die bleuelinghen van Raphaim, die ghewoont heeft in Astharoth, ende in Edrai, ende heeft heerscappie ghehadt op den berch Hermon, ende in Salecha, ende ouer gheheel Basan tot aen die palen

5

van Gessuri, ende Machati, ende van dat half deel van Galaad, die palen van Sehon des conincks van Hesebon,

6

Moyses des Heeren dienaer, ende die kinderen van Israhel hebbense gheslaghen, ende hen lant heeft Moyses gheleuert tot een besittinghe den Rubeniten ende Gaditen ende der helicht van Manasses gheslachte

7

Dit sijn die coninghen des lants die Iosue verslaghen heeft ende die kinderen van Israhel, ⁺ouer die Iordane aen die westsijde, Van Baal Gad int velt van Libanus totten berch welcs deel opclimt tot in Seir, ende Iosue heeft dat gheleuert tot een besittinghe den gheslachte van Israhel, elcken besonder hen deelen,

+ C

8

soo wel in die gheberchten als in die platte ende veltachtighe landen, In Aseroth ende in die woestijne ende in die suytsijde, waren die Hethiters ende Amorrhiters, Chananiters, ende Pherezeiters, Heueiters, ende Iebuseiters.

9

Die coninc van Iericho was een, Die coninc van Hai welc is ter sijden van Bethel een,

10

Die coninck van Ierusalem een, Die coninc van Hebron een,

11

⁺Die coninck van Ierimoth een, Die coninc van Lachis een,

+ D

12

Die coninck van Eglon een, Die coninc van Gazer een,

13

Die coninck van Dabir een, Die coninck van Gader een,

14

Die coninck van Herma een, Die coninck van Hered een,

15

Die coninck van Lebna een, Die coninck van Adullam een,

16

Die coninck van Maceda een, Die coninck van Bethel een,

17

Die coninck van Taphua een, Die coninck van Ophir een,

18

Die coninck van Aphec een, Die coninck van Saron een,

19

Die coninck van Mador een, Die co-

[p. *192]

ninck van Asor een,

20

Die coninck van Semeron een, Die coninck van Acsaph een,

21

Die coninck van Thenac een, Die coninck van Mageddo een,

22

Die coninck van Cedes een, Die coninck van Iachanam van den Carmelus een,

23

Die coninck van Dor ende des lantscaps van Dor een, Die coninc der heydenen van Galgal een,

24

Die coninck van Thersa een, Alle die coninghen waren eenendertich.