Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺VVelcke dinghen als Iabin die coninck van Asor ghehoort hadde soo heeft hy ghesonden aen Iobab den coninck van Madon, ende totten coninck van Semeron, ende totten coninck van Achsaph,

+ A

2

ende tot die coninghen vanden Noorden, die int gheberchte woonden, ende in dat plat nederlant teghen die suytsijde van Ceneroth, ende oock in die veltachtighe landen, ende lantscappen van Dor by die zee.

3

Ende tot die Chananiters van den Oosten ende Westen, ende totten Amorrhiters ende Hethiters ende Phereziters ende Iebuzeiters int gheberchte, ende totten Heueiters oock die daer woonden aen dat onderste van Hermon int lant Maspha.

4

Ende sij sijn allegader wtghetrocken met haren heyrscharen een volck wter maten groot van ghetale, ghelijck dat sandt dwelck aen die zeecant is, ende oock peerden ende waghenen van een ontellijcke menichte.

5

Ende alle dese coninghen sijn te samen comen ouer een aen die wateren van Merom dat sij strijden souden teghen Israhel.

6

Ende die Heere

[p. *191]

heeft gheseyt tot Iosue, en vreest dese niet, ⁺Want morghen op dese selue ure sal ick alle dese leueren om ghewont te wordene voor daenschijn van Israhel, Hen peerden suldi vermincken, ende hen waghenen verberren metten viere.

+ B

7

Ende Iosue is ghecomen ende alle theyr met hem teghen henlieden aen die wateren Merom onuersienlijck, ende sij hebbense oueruallen,

8

ende die Heere heeftse gheleuert in Israhels handen Die welcke hebbense gheslaghen ende veruolcht tot groot Sidon toe, ende tot die wateren Maserephoth, ende tot dat velt van Maspha, welc is aen diens oostsijde. Aldus heeft hy die alle verslaghen, alsoo dat hi gheen bleuelinghen van hen achter en liet,

9

ende hi heeft ghedaen ghelijc die Heere hem beuolen hadde, hen peerden heeft hy verminct, ende die waghenen metten viere verbrant.

10

Ende terstont weder om keerende heeft hy inghenomen Asor, ende haren coninck heeft hy verslaghen metten sweerde, Want Asor hiel van outs douerste heerlijcheyt van alle desen rijcken.

11

Ende hy versloech alle die zielen die daer woonden, hi en heeft daer niet ghelaten eenighe bleuelinghen, maer hy heuet al verdoruen, ⁺alsoo datter niet le leuen en bleef, ende die stadt heeft hy metten brande vernielt.

+ C

12

Ende alle die steden rontsomme, ende haer coninghen heeft hy ghenomen, verslaghen, ende vernielt, ghelijck hem beuolen hadde Moyses des Heeren dienaer,

13

sonder die steden die op die hueuelen ende hoochden gheleghen waren, die andere heeft Israhel verbrant, alleen die alder stercste stadt Asor heeft hy metter vlammen vernielt.

14

Ende alle den roof van desen steden ende dat vee hebben die kinderen van Israhel onder malcanderen ghedeylt, alle die menschen verslaghen wesende,

15

Ghelijc die Heere Moysi sijnen dienaer gheboden hadde, alsoo heeft Moyses Iosue gheboden ende die heuet al volbrocht, hy en heeft van allen den gheboden niet achterghelaten, oock niet een woort dat die Heere Moysi beuolen hadde.

16

Aldus heeft Iosue inghenomen alle dat lant der gheberchten ende dat suytlant, ende dlant van Gessen, ende dat plat lant, ende die westsijde, ende den berch Israhel, ende sijn veltachtighe landen,

17

ende eendeels des berchs die opclimt tot Seir tot Baalgad toe, door dat plat lant van Libanus onder den berch Hermon, alle haer coninghen heeft hy gheuanghen, ⁺gheslaghen, ende ghedoot,

+ D

18

Langhen tijt heeft Iosue ghestreden teghen dese coninghen.

19

Daer en was niet een stadt die haer niet ouer en gaf den kinderen van Israhel, sonder die Heueiters die te Gabaon woonden, want hy heeftse alle strijdende ghewonnen,

20

Want het was des Heeren vonnisse dat hen herten souden verhert worden, ende dat sij strijden souden teghen Israhel, ende vallen, ende dat sij gheen ghenadicheyt en souden verdienen, ende dat sij vergaen souden ghelijck die Heere Moysi beuolen hadde.

21

In dien tijt is Iosue ghecomen ende heeft dootgheslaghen Enacim van tgheberchte van Hebron ende Dabir ende Anab ende van alle tgheberchte van Iuda ende Israhel, ende hen steden heeft hy vernielt.

22

Hy en heefter niet eenen ouerghelaten van Enacims gheslachte int lant der kinderen van Israhel, sonder die steden van Gaza ende Geth, ende Azoto, in die welcke sij alleen ghelaten sijn.

23

Aldus heeft Iosue alle dlant inghenomen, ghelijck die Heere ghesproken heeft tot Moysen, ende hy heeft dat tot een besittinghe gheleuert den kinderen van Israhel, nae hen deelen ende gheslachten, ende het lant heeft gherust van orloghen.

[afbeelding]