Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ALs dit ghehoort heeft Adonisedec die coninc van Iherusalem, te weten dat Iosue Hai inghenomen ende omgheworpen hadde (want ghelijck hy Iericho ende haren coninck ghedaen hadde, soo heeft hy ooc Hai ende haren coninc ghedaen) ende dat die Gabaoniters ouergheuloden waren tot Israhel, ende met hemlieden verbonden,

+ A

2

so is hy seer veruaert gheweest, Want Gabaon was een groote stadt, ende een vanden coninclijcke steden, ende meerder dan die stadt Hai, ende alle haer vechtende mannen waren seer sterck.

3

Daer om soo heeft Adonisedec die coninc van Ierusalem ghesonden, aen Oham den coninc van Hebron, ende aen Pharam den coninck van Ierimoth, ende aen Iaphia ooc den coninck van Lachis, ende aen Dabir den coninck van Eglon segghende,

4

Coemt opwaerts tot my, ende brengt helpe, dat wij die stadt van Gabaon moghen verwinnen, want sij is tot Iosue ende Israhel ouerghetrocken.

5

Aldus sijn die vijf coninghen der Amorrhiters tsamen verghadert ende opghetrocken, te weten die coninck van Iherusalem, die coninck van Hebron, die coninck van Ierimoth, die coninck van Lachis, die coninck van Eglon, tsamen met haren heyrscaren, ende sij hebben haren legher ghemaect omtrent Gabaon, ⁺die bestrijdende,

+ B

6

Maer die inwoonders van Gabaon der stadt die beleghen was, hebben ghesonden tot Iosue, die alsdoen was inden heyrlegher by Galgala, ende hem gheseyt, En wilt v handen niet af trecken van die helpe uwer dienaren, coemt haestelijck opwaerts, ende verlost ons, ende coemt ons ter helpen, want alle die coninghen vanden Amorrhiters die int gheberchte woonen sijn te samen tseghen ons ghecomen.

7

Ende Iosue is opwaerts ghereyst van Galgala, ende alle dat heyr der strijtbaer mannen, met hem seer stercke mannen,

8

ende die Heere heeft gheseyt tot Iosue, En wilt dese niet ontsien, want ic hebse in v handen gheleuert, Niemant van henlieden en sal v moghen wederstaen.

9

Aldus heeftse Iosue oueruallen onuerhoets alle den gheheelen nacht opwaerts treckende van Galgalis.

10

Ende die Heere heeftse verbaest ghemaect voor daenschijn van Israhel, ende hy heeftse vernielt met een swaer plaghe in Gabaon, ende heetse veruolcht door den wech des opgancs nae Bethoron, ende gheslaghen tot Azeca ende Maceda toe.

11

Ende als sij vloden voor die kinderen van Israhel ende waren in den nederganck van Bethoron, ⁺soo heeft die Heere op hen ghesonden groote steenen van den hemel tot Azeca, ende daer isser veel meer ghestoruen van die hagelsteenen, dan die de kinderen van Israel metten sweerde verslaghen hadden.

+ C

12

Doen heeft Iosue totten Heere ghesproken op den dach als hy die Amorrhiters gheleuert hadde voor daenschijn der kinderen van Israhel, ende hy heeft voor hen gheseyt, Ghy sonne en wort niet gheroert teghen Gabaon, ende ghy mane teghen die valleye van Aialon.

13

Ende die sonne ende die mane bleuen stille staende tot dat het volck hem ghewroken hadde ouer sijne vianden. En is dat niet ghescreuen inden boeck der rechtuerdighen? Hierom heeft die sonne ghestaen int midden vanden hemel, ende sij en heeft haer niet ghehaest onder te gaen den tijt van eenen daghe.

14

Daer en heeft

[p. *190]

voor noch nae soo langhen dach niet gheweest, den Heere onderdanich wesende der stemmen van eenen mensch ende voor Israel strijdende.

15

Ende Iosue is wederghekeert met alle die van Israel in den heyrlegher van Galgale,

16

Want die vijf coninghen waren gheuloden ende hadden hen gheborghen in een speluncke der stadt Maceda.

17

Ende het is Iosue ghebootscapt dat die vijf coninghen gheuonden waren verborghen in die speluncke der stadt Maceda.

18

Die welcke heeft sijnen ghesellen gheboden ende gheseyt, ⁺Wentelt groote steenen tot aen dat gat der speluncken, ende stelt neerstighe mannen diese besloten bewaren moghen,

+ D

19

maer en wilt niet staende blijuen, maer veruolcht die vianden, ende slaet alle die achterste der gheender die vlieden, noch en laetse niet in haerder steden beurijtheden ingaen, die welcke die Heere Godt gheleuert heeft in uwen handen.

20

Als dan die vianden gheslaghen waren door eenen grooten slach, ende by nae heel totten lesten man vernielt, so sijn die ghene die Israhel hebben connen ontulieden in vaste besloten steden gheghaen.

21

Ende alle theyr is tot Iosue wederghekeert in Maceda, daer doen die heyrlegheren waren, ghesont ende in gheheelen ghetale, ende daer en heeft niemant tseghen Israhel derren kicken.

22

Ende Iosue heeft beuolen segghende, Doet open dat gat der speluncken, ende brengt voorts tot my die vijf coninghen die daer in verborghen sijn.

23

Ende die dienaers hebben ghedaen alsoo hen beuolen was, ende sij hebben tot hem ghebracht die vijf coninghen wter speluncken, den coninck van Ierusalem, den coninck van Hebron, den coninc van Ierimoth, den coninc van Lachis, den coninck van Eglon.

24

Ende als die tot hem ghebracht waren, soo heeft hy alle die mannen van Israel gheroepen, ende gheseyt tot die hooftlieden des heyrs die met hem waren, ⁺Gaet henen ende stelt v voeten op die halsen van desen coninghen. Ende als sij voorts ghegaen waren ende sij der nederligghender halsen metten voeten treedden,

+ E

25

soo seyde hy wederom tot hen, En wilt niet vreesen noch veruaert sijn, wert versterct ende weest vroem, want alsoo sal die Heere doen allen uwen vianden teghen die welcke ghy strijdt.

26

Ende Iosue heeftse gheslaghen ende ghedoot, ende ghehanghen aen vijf stijlen, ende sij waren ghehanghen totten auont toe.

27

Ende als die sonne onderghinck, soo heeft Iosue beuolen den ghesellen dat sij die souden afdoen van die galghen. Die welcke hebbense afghenomen ende gheworpen in die speluncke daer sij in verborghen hadden gheweest, ende sij hebben op dat gat van dier speluncken gheleyt groote steenen, die welcke daer blijuen tot op desen dach toe.

28

Opden seluen dach heeft Iosue oock Macedam inghenomen, ende verslaghen metten scerpe vanden sweerde, ende den coninck van dier stadt heeft hy ghedoodt, ende alle haer bewoonders, hy en heeft daer in niet ghelaten soo veel als een luttel bleuelinghen. Ende hy heeft den coninck van Maceda ghedaen ghelijck hy den coninck van Iericho ghedaen hadde.

29

⁺Ende hi is voorts ghetrocken met gheheel Israhel van Maceda tot Lebna, ende streedt daer teghen,

+ F

30

die welcke die Heere met haren coninck gheleuert heeft in die handen van Israhel, ende sij hebben die stadt gheslaghen met dat scerpe des sweerts ende allen haer bewoonders, sij en hebben gheen bleuelinghen ghelaten. Ende sij hebben den coninck van Lebna ghedaen ghelijck sij ghedaen hadden den coninck van Iericho.

31

Van Lebna is hy ouerghetrocken in Lachis met gheheel Israhel, ende als hy het heyr rontsomme ghestelt hadde, soo bestormde hy die.

32

Ende die Heere heeft Lachis in Israels hant gheleuert, ende hy heeft die des anderen daechs inghenomen ende gheslaghen metten scerpten des sweerts, ende alle die zielen die daer in waren, ghelijck hy Lebna ghedaen hadde.

33

In dien tijt soo is opcomen Horam die coninck van Gazer om dat hy Lachis helpen soude, den welcken heeft Iosue verslaghen met allen sijnen volcke datter niet een ouer en bleef.

34

Ende hy is van Lachis voerts ghereyst tot Eglon, ende hy heeft die omleyt,

35

ende vechtende ghewonnen op den seluen dach, ende hy heeft metten scerpen des sweerts gheslaghen alle die zielen die daer in waren, nae alle dat hy Lachis ghedaen hadde.

36

Ende hy is oock met gheheel Israhel opghetrocken van Eglon tot Hebron, ende hy heeft daer teghen ghestreden,

37

ende die inghenomen, ende verslaghen metten scerpen des sweerts, ende oock haren coninck, ende alle die steden van dien lantschap, ende alle die zielen die daer in woonachtich waren, ⁺hy en heeft daer in niet ghelaten eenighe bleuelinghen, ghelijck hy Eglon ghedaen hadde alsoo heeft hy Hebron oock ghedaen, alle dat hy daer in vant vernielende metten sweerde.

+ G

38

Ende van daer wederghekeert sijnde tot Dabir,

39

heeft hy die inghenomen ende verdoruen, ende ooc haren coninck, ende alle die steden rontsomme heeft hy gheslaghen metten scerpen des sweerts, hy en heeft daer inne niet ghelaten eenighe bleuelinghen, ghelijck hy ghedaen hadde Hebron ende Lebna ende haren coninghen, alsoo heeft hy Dabir ende haren coninck ghedaen.

40

Aldus heeft Iosue verslaghen alle dat lant des gheberchten, ende dat suytwaerts lach, ende der platter velden, ende Asedoth met haren coninghen, hy en heeft daer niet ghelaten eenighe bleuelinghen, maer alle dat adem trecken mocht heeft hy ghedoodt, ghelijck hem beuolen hadde die Heere die Godt van Israhel,

41

van Cadesbarne tot Gazam toe, Alle dlant van Iessen tot Gabaon,

42

ende alle haer coninghen ende hen lantscappen heeft hy met eenen oploop inghenomen ende verdoruen, Want die Heere die Godt van Israhel heeft voor hem ghestreden.

43

Ende hy is wederghekeert met gheheel Israhel tot die plaetse der heyrlegheren in Galgala.