Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ALs dit ghehoort hebben alle die coninghen ouer die Iordane, die daer woonden opt gheberchte, int plat lant, aen die zee canten, ende aen den oeuer vander grooter zee, ende oock mede die daer woonden by Libanus, die Hethiters ende Amorrhiters, Chananiters Pheresiters ende Heueiters ende Iebuseiters,

+ A

2

soo sijn sij al te samen verghadert, dat sij teghen Iosue ende Israhel strijden souden, met eenen moede, ende met ghelijcken sinne.

3

Maer die daer woonden te Gabaon hoorende alle dat Iosue hadde ghedaen den steden Iericho ende Hai,

4

scalckelijck denckende, hebben met hem spijse ghenomen, legghende oude sacken op ezels, ende wijnflesschen ghescoert ende wederom toeghenaeyt,

5

ende seer oude scoenen, die tot een teeken der outheyt met lappekens tsamen ghenaeyt waren, ghecleedt met ouden cleederen, ende die brooden die sij om te teren ouer wech droeghen, waren hart ende in stucken ghebroken,

6

ende sij sijn ghereyst tot by Iosue, die doen inden legher was te Galgala, ende hebben tot hem gheseyt, ⁺ende tsamen tot alle die van Israhel, Wij sijn van seer verren lande comen, begherende met v lieden pays te maken.

Ende die kinderen van Israhel hebben hen gheantwoordt ende gheseyt,

+ B

7

Ghy moecht by auontueren woonen int lant welck ons metten lote toeghedeelt moet worden, ende soo en souden wij gheen verbont met v moghen maken,

8

Maer sij seyden tot Iosue, Wij sijn v dienaers. Ende Iosue seyde tot hemlieden, Wie sijdi? oft van waer coemdi?

9

Sij hebben gheantwoordt, Wi v dienaers sijn van seer ver-

[p. *189]

ren lande comen inden naem des Heeren ws Gods, Want wij hebben ghehoort die vermaertheyt van sijnder macht, alle dat hy in Egipten ghedaen heeft

10

ende den twee coninghen der Amorrhiters, die ouer die Iordane waren, Sehon den coninck van Hesebon, ende Og den coninck van Basan, die daer waren in Astaroth,

11

ende die ouders ende alle die inwoonders van onsen lande hebben tot ons gheseyt, Neemt spijsen in v handen, om den seer langhen wech, ende gaet hen te ghemoete ende segghet, Wij sijn v dienaers, wilt een verbont met ons maken.

12

Siet dese brooden namen wij al heet doen wij wt onsen huysen ghinghen om tot v te comen, nv sijn sij al drooghe gheworden, ende van te groote outhede in stucken ghebrijselt,

13

deze wijnflesschen vulden wij al nieuwe, nv sijn sij gheborsten ende ontbonden, die cleederen ende scoenen die wij aen hebben, ende die wij aen ons voeten hebben, die sijn van die lancheyt des wechs versleten, ende by nae al heel te niete.

14

⁺Hierom soo hebben sij van haer lieden spijsen ghenomen, ende den mont des Heeren niet gheuraecht.

+ C

15

Ende Iosue heeft vrede met hem ghemaect, ende makende een verbont heeft hy hen gheloeft dat sij niet ghedoot en souden worden, ende die princen der menichten hebben hen oock ghesworen.

16

Ende nae drij daghen dat dit verbont ghemaect was, soo hebben sij ghehoort dat sij daer by woonden, ende dat sij onder hemlieden souden woonen.

17

Ende die kinderen van Israhel hebben haren heyrlegher vertrocken, ende sijn in hen steden ghecomen opden derden dach, waer af dit die namen sijn, Gabaon ende Caphira, ende Beroth, ende Cariathiarim.

18

Ende sij en hebbense niet verslaghen, om dat die princen der menichten hen ghesworen hadden, in den naem des Heeren van Israhel. Ende alle tghemeyn volck heeft ghemurmelt tseghen die princen,

19

Die welcke hebben hen gheantwoort, Wij hebben hen ghesworen inden naem der Heeren Gods van Israhel, ende daerom en moghen wi hen niet ghenaken.

20

Maer dit sullen wij hen doen, Laetse behouden dat sij te leuen blijuen moghen, op dat die gramschap des Heeren teghen ons niet verwect en worde, waert sake dat wi onsen eedt braken,

21

⁺Maer laetse also leuen dat sij tot behoeue vander gheheelder menichten hout houwen, ende water aenbrenghen. Ende als sij dit seyden,

+ D

22

soo riep Iosue die Gabaoniters, ende seyde tot hemlieden, Waerom hebdi ons met bedroch willen bedrieghen, alsoo dat ghy seyt, Wij woonen seer verre van v lieden, daer ghy int midden van ons woont?

23

Daerom suldi onder den vloeck staen, ende daer en sal nemmermeer iemant ghebreken van uwen gheslachte die hout houwe, ende water aenhale in dat huys van mijnen Godt.

24

Ende sij hebben gheantwoordt, Het was ons uwen dienaers ghebootscapt, hoe dat die Heere v Godt Moysi sijnen dienaer gheloeft hadde, dat hy v alle dit lant soude leueren, ende alle des lants bewoonders vernielen. Daerom waren wij seer veruaert, ende hebben voorsien voor onse zielen, bedwonghen sijnde wt den grouwel van v lieden, ende hebben desen raet ouer een ghedraghen.

25

Maer nv sijn wij in handen, doet ons dat v goet ende recht dunct te wesen.

26

Hierom heeft Iosue ghedaen alsoo hy gheseyt hadde, ende heeftse verlost wt die handen der kinderen van Israhel, dat sij niet ghedoot en souden worden.

27

Ende hy heeft gheordineert op dien dach dat sij sijn souden ten dienste van alle den volcke, ende van des Heeren outaer, hout afhouwende ende water aenbrenghende tot op desen dach toe, ter plaetsen welck die Heere vercoren soude hebben.