Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

ENde die Heere heeft tot Iosue gheseyt, ⁺En vreest niet, noch en weest niet veruaert, Neemt met v alle die menichte der strijdtbaer mannen, ende opstaende reyst opwaerts nae die stadt Hai, siet ick heb haren coninck gheleuert in v hant, ende tvolck, ende die stadt, ende dlant.

+ A

2

Ende ghy sult der stadt Hai ende haren coninck doen, ghelijck ghy Iericho ende haren coninck ghedaen hebt, Maer den roof met alle den beesten sult ghy voor v lieden nemen, legt laghen der stadt achter haer.

3

Ende Iosue is opghestaen ende alle dat heyr der vechtender mannen met hem, om op te trecken nae Hai, ende hy heeft wtghecoren dertich duysent stercker mannen ghesonden des nachts,

4

ende hen gheboden segghende, Legghet laghen achter die stadt, ende en vertrect niet verder van daer, ende ghy sult allegader bereedt sijn,

5

maer ick ende die ander menichte die met my is sullen recht teghen die stadt opcomen. ⁺Ende als sij teghen ons sullen wtghecomen sijn, soo sullen wij vlieden ghelijck wij te voren ghedaen hebben ende onse rugghen keeren,

+ B

6

tot dat sij veruolghende verre vander stadt vertrocken sullen sijn, want sij sullen meynen dat wij vlieden, ghelijck te voren.

7

Hier om die wijle dat wi vlieden ende sij ons veruolghen, soo suldt ghy opstaen van die laghen, ende die stadt verderuen, ende die Heere v Godt sal v die in uwe handen leueren.

8

Ende als ghy die inghenomen hebt, soo suldi die ontsteken, ende al doen ghelijck ick gheboden hebbe.

9

Ende hy heeftse laten ghaen, ende sij sijn ghereyst ter plaetsen van die laghen, ende nedergheleghen tusschen Bethel ende Hai, aen die westzijde der stadt Hai. Maer Iosue is dien nacht int midden des volcs bleuen,

10

ende des smorghens vroech opstaende heeft hy sijn ghesellen ghetelt, ende is metten outsten op ghetrocken int vorste vanden heyre omringhelt met die helpe der strijdtbaerigher mannen.

11

Ende als sij comen waren ende opghegaen teghen ouer die stadt, soo stonden sij aen die noortsijde der stadt, daer een dellinghe was tus-

[p. *188]

schen die stadt ende hemlieden.

12

Maer hy hadde vijf duysent mannen ghecosen, die hy ghestelt hadde in die laghen tusschen Bethanen ende Hai, ⁺aen die westzijde der seluer stadt.

+ C

13

Maer alle dander heyr stelden haer slachorden teghen die westzijde der seluer stadt, alsoo dat die vorste vander menichten quamen tot aen die westzijde der stadt.

Hierom soo is Iosue dien nacht voorts ghegaen ende stont int midden der dellinghen.

14

Ende als die coninck van Hai dit ghesien hadde, soo heeft hy hem des morghens vroech ghehaest, ende is wtghetrocken met allen dat heyr vander stadt. Ende hy heeft sijn slachorden ghescict teghen die woestijne, niet wetende datter achter rugghe laghen verborghen waren.

15

Maer Iosue ende alle die van Israhel hebben van die plaetse gheweken, ghelatende hem als oft sij gheureest hadden, ende sij vloden door den wech der woestijnen.

16

Maer van Hai tsamen groot ghecrijsch makende, ende malcanderen moet gheuende, hebben hen veruolcht. Ende als sij vander stadt afghetrocken waren,

17

ende datter niet een in die stadt van Hai ende Bethel ghebleuen en was die Israhel niet en veruolchde (latende die steden open alsoo sij daer wtgheloopen waren)

18

heeft die Heere tot Iosue gheseyt, ⁺Heft op den scilt die in v hant is, teghen die stadt Hai, want ic sal v die leueren. Ende als hy den scilt opghehauen hadde teghen ouer die stadt,

+ D

19

soo sijn die laghen die daer verborghen waren terstont opghestaen, ende gaende nae die stadt hebben sij die inghenomen ende ontsteken.

20

Maer die mannen vander stadt die Iosue veruolchden (omsiende ende siende den roock vander stadt opghaende totten hemel toe) en consten niet meer herwaerts ende derwaerts gheulieden, besonder om dat die ghene, die te voren die vlucht gheueynst hadden, ende liepen nae die woestijne, nv teghen die veruolghers seer vromelijck wederstonden.

21

⁺Ende Iosue ende alle die van Israhel siende dat die stadt inghenomen was, ende dat den roock vander stadt opghinck, soo is hy wederom ghekeert, ende heeft die mannen van Hai gheslaghen,

+ E

22

Want die ghene die de stadt inghenomen ende ontsteken hadden, waren ooc wter stadt comen teghen haerlieden ende beghonsten int midden die vianden te slaen. Als dan die vianden van beyde die sijden gheslaghen worden, alsoo datter niemant van die groote menichte behouden en bleef,

23

hebben sij oock den coninck vander stadt Hai leuende gheuanghen, ende dien voor Iosue gebracht.

24

Als sij dan al verslaghen waren die Israhel nader woestijnen vliedende veruolcht hadden, ende ter seluer plaetsen metten swaerde gheuallen waren, soo sijn die kinderen van Israhel weder ghecomen, ende hebben die stadt gheslaghen.

25

Ende alle die op dien dach verslaghen sijn vanden mans totten vrouwen, waren twaelf duysent menschen, alle luyden der stadt Hai.

26

Maer Iosue heeft sijn hant wederom ghetrocken, die hy hooghe opghehauen hadde houdende den scilt, tot dat alle die inwoonders van Hai verslaghen waren.

27

⁺Maer die beesten ende den roof vander stadt, hebben die kinderen van Israhel onder malcanderen ghedeelt, ghelijc die Heere Iosue beuolen hadde.

+ F

28

Ende hy heeft die stadt verbrant, ende daer af ghemaect eenen eewighen hoop,

29

ende haren coninck aen een galghe ghehanghen tot den auont, ende totter sonnen onderganck toe.

Ende Iosue heuet gheboden, ende sij hebben sijn lichaem vanden cruyce ghedaen, ende dat gheworpen inden inganck der seluer stadt, verghaderende daer op hem eenen grooten hoop steenen die daer blijft tot opden dach van heden.

30

Doen stichte Iosue den Heere den Godt van Israhel eenen outaer, opden berch Hebal,

31

ghelijck Moyses des Heeren dienaer den kinderen van Israhel gheboden hadde, ende soo dat ghescreuen is int boeck van Moyses wet, eenen outaer van onghehouwen steenen, die welcke gheen ijser ghenaect en heeft, ende hi heeft daer op den Heere heel brantofferanden gheoffert, ende oock vreedoffers gheoffert.

32

Ende hy heeft op die steenen ghescreuen die tweede wet van Moyses die hy ghescreuen hadde voor die kinderen van Israel.

33

⁺Maer alle dat volck ende alle die outste ende die hooftmannen ende rechters stonden aen beyde die sijden vander arcken, voor daensicht der priesters die de arcke van dat verbont des Heeren droeghen, soo wel die wtlanders als die ingheborene, Die helicht van hen stont by den berch van Garizim, ende dander helicht by den berch Hebal, ghelijck Moyses des Heeren dienaer gheboden hadde. Ende ten iersten soo heeft hy dat volck van Israhel ghebenedijt,

+ G

34

Ende daer nae soo heeft hy ghelesen alle die woorden vander benedijnghen, ende maledijnghen ende alledie woorden die daer ghescreuen waren in dat boeck der wet,

35

ende hy en heeft niet ongheruert ghelaten van alle dat Moyses beuolen hadde, maer hy heuet al verhaelt voor alle die menichte van Israhel voor die vrouwen, kinderen, ende vreemdelinghen die onder hemlieden woonachtich waren.