Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

MAer die kinderen van Israhel hebben tghebodt ghebroken, ende van dat veruloect goet hem seluen toegheeyghent, ⁺Want Achan die sone van Charmi des soons Sabdi des soons Zare wt Iudas gheslachte, heeft wat ghenomen van dat veruloect goet, ende die Heere is gram gheworden teghen die kinderen van Israhel.

+ A

2

Ende doen Iosue mannen wtsant van Iericho teghen Hai, die by Bethauen gheleghen is, aen die oostsijde der stadt van Bethel, soo seyde hy tot hemlieden, Climt opwaerts ende bespiet dat lant. Ende sij volbrenghende dat hen gheboden was, hebben Hai bespiet.

3

Ende wedercomen sijnde, hebben sij tot hem gheseyt, En laet alle tvolck niet opclimmen, maer laet twee oft drij duysent mannen derwaerts trecken, ende die stadt heel verderuen. Waerom sal alle tvolck te vergheefs ghequelt worden teghen so seer luttel vianden?

4

Hier om soo sijnder drij duysent strijtbaer mannen opwaerts ghetrocken, Die welcke ter stont den rugghe keerende

5

sijn gheslaghen van die mannen der stadt van Hai, ende daer sijn van hemlieden sessendertich mannen verslaghen, ende die vianden hebbense veruolcht vander poorten tot Sabarim toe, ende sij vielen verslaghen, vliedende door die neder plaetsen. Ende het herte des volcs is veruaert gheworden, ende ghesmolten ghelijck water.

[p. *187]

6

Maer Iosue heeft sijn cleederen ghescoert, ende is plat op sijn aensicht ter aerden neder gheuallen voor die arcke des Heeren totten auont toe, so wel hy als alle die ouders van Israhel, ende sij hebben ghestubbe vander aerden op haer hoofden gheworpen,

7

⁺ende Iosue heeft gheseyt, Ach Heere Godt, waerom hebdi dat volck willen brenghen ouer den vloet der Iordanen, dat ghy ons soudt leueren in die handen vanden Amorrheen, ende verderuen? Och oft wij ouer dander zijde der Iordanen bleuen waren soo wij begonst hadden,

+ B

8

mijn Heere Godt wat sal ick segghen, siende dat Israhel sijnen vianden den rugghe keert,

9

Die Chananeen ende alle die inwoonders des lants sullent hooren, ende tsamen ghehoopt sullen sij ons omringhen, ende onsen naem te niet doen opder eerden, ende wat suldi uwen grooten naem doen?

10

Ende die Heere heeft tot Iosue gheseyt, Staet op, Waerom ligt ghy ghebuycht op v aensicht ter aerden?

11

Israhel heeft ghesondicht, ende mijn verbont ouertreden, ende sij hebben van dat verbannen goet ghenomen, ende ghestolen, ende gheloghen, ende dat onder haer ghereedtschap gheborghen.

12

Ende Israhel ende sal niet moghen staende blijuen voor sijn vianden, ende sij sullen daer voor vlieden, om dat sij besmedt sijn met dat veruloect goet, ick en sal voertaen met v niet wesen, tot dat ghy hem sult vernielt hebben, die deses groots misdaets schuldich is.

13

Staet op, heylicht dat volck, ende segghet hen, Heylicht v teghen morghen, want dit seyt die Heere Godt van Israhel, Israhel daer is verbannen goet int midden van v, ghi en sult niet moghen voor v vianden staende blijuen tot dat hy wt v lieden vernielt worde die met deser grooter sonden besmet is.

14

⁺Ende ghy sult morghen vroech een yeghelijck aencomen door uwen gheslachten, ende wat gheslachte dat het lot vinden sal, dat sal met sijnen maesschap aencomen, ende elck maesschap by huysghesinnen, ende elck huysghesin by mannen.

+ C

15

Ende soo wie beuonden wordt in dit groot misdaet, die sal int vier verbrant worden, met allen sijn hauelijck goet, om dat hy tverbont des Heeren ouertreden heeft, ende een ongheorloft stuck ghedaen in Israhel.

16

Hier om Iosue des morghens opstaende heeft Israhel aenghebracht by haren gheslachten, ende tgheslachte van Iuda worde beuonden.

17

Ende als dat gheslachte by sijn familien aenghebracht was, soo is die familie van Zare beuonden. Ende die by sijn huysghesinnen offerende, heeft hy beuonden Zabdi,

18

Welcks huys by mannen elck bysonder deylende, soo heeft hy beuonden Achan den sone van Charmi, des soons Zabdi, des zoons Zare, van Iudas gheslachte.

19

Ende Iosue heeft tot Achan gheseyt, Mijn sone gheeft den Heere Godt van Israhel glorie, ende belijdt, ende segghet my, wat ghy ghedaen hebt, en wilt dat niet verborghen.

20

Ende Achan heeft tot Iosue gheantwoordt, ende hem gheseyt, Voerwaer ic heb ghesondicht teghen den Heere Godt van Israhel, ende aldus, ende alsoo ghedaen,

21

Want ick sach onder den roof eenen rooden mantel seer goet, ende twee hondert siclen siluers, ende eenen gulden rije van vijftich siclen, ende begherende heb ic die wech ghedraghen, ende gheborghen in die aerde teghen dat midden van mijnder tenten, ende dat siluer heb ick in die eerde ghegrauen ende bedect.

22

⁺Aldus soo heeft Iosue dienaers ghesonden, welcke loopende tot sijn tente, hebbent al verborghen vonden ter seluer steden, ende dat siluer mede.

+ D

23

Ende sij namen dat wter tenten ende brachtent tot Iosue, ende tot alle die kinderen van Israhel, ende sij hebben dat voor den Heere gheworpen.

24

Aldus soo heeft Iosue ghenomen Achan Zares sone, ende dat siluer ende den mantel ende die gulden rije, ende sijnen sonen oock ende dochteren, ossen ende eselen ende scapen, ende oock dat selue tabernakel, ende alle den huysraet (ende alle die van Israhel met hem) hebben hem gheleyt tot Achors dal

25

daer heeft Iosue gheseyt, Want ghy ons verstoort hebt, soo verstoore v Godt op desen dach. Ende gheheel Israhel hebben hem ghesteent, ende alle dat hem toebehoorde is metten viere verdaen.

26

Ende sij hebben op hem eenen grooten hoop steenen verghadert, die noch blijft tot opden dach van heden. Ende die rasende gramschap des Heeren is van hemlieden afghekeert. Ende die plaetse is ghenoemt Achors dal, tot desen dach toe.