Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

MAer Iericho was ghesloten, ⁺ende bewaert om den grouwel van den kinderen van Israhel, ende niemant en dorste daer wt oft ingaen.

+ A

2

Ende die Heere heeft tot Iosue gheseyt, Siet ick heb Iericho ghegheuen in uwe handen, ende haren

[p. *186]

coninck, ende alle die stercke mannen,

3

Gaet omme die stadt alle ghy strijdtbaer mannen des daechs eens ende alsoe suldi ses daghen lanck doen,

4

Maer op den seuensten dach sullen die priesters seuen trompetten nemen, diemen int iubileus iaer ghebruyct, ende voer die arcke des verbonts gaen ende seuenwerf die stadt ommegaen, ende die priesters sullen metten trompetten gheluyt maken.

5

Ende als die stemme der trompetten langher ende met meer poosen gheluyt gheeft, ende in v ooren gheclanck maect, soe sal alle tvolck tsamen roepen, met een seer groot ghecrysch ende die mueren der stadt totten gronde toe sullen neder vallen, ende dan sal een ieghelijck daer inne gaen doer die plaetse daer hy teghen staet

6

Hier om soo heeft Iosue Nuns sone des priesters gheroepen, ende tot hem gheseyt, Neempt die arcke des verbonts, ende seuen ander priesters laet nemen die seuen basoenen vanden iubileus iaren ende laet die gaen voer die arcke des heeren

7

Ende tot den volcke heeft hy oeck gheseyt, Gaet henen, ende wandelt rontsomme die stadt, al ghewapent, gaende voer die arcke des heeren.

8

⁺Ende als Iosue sijn woorden voleyndt hadde, ende die seuen priesters met die seuen trompetten gheclanck maecten voor die arcke des Heeren verbont,

+ B

9

ende alle dat heyr ghewapent voorghinck, soo is dat ander ghemeyn volck achter de arcke gheuolcht, ende metten trompetten worde ouer al gheluyt ghemaect.

10

Maer Iosue hadde den volcke gheboden segghende, Ghy en sult niet roepen, noch v stemme en sal niet ghehoort worden, noch gheen woordt en sal wt uwen monde gaen, tot dat den dach comen sal, opden welcken ick v segghen sal, Roept ende maect groot ghecrijsch.

11

Hier om heeft die arcke des Heeren eens daechs rontsomme ghegaen, ende wederghekeert sijnde inden legher is sij daer bleuen.

12

Ende als Iosue des nachts opstont, soo hebben die priesters die arcke des Heeren ghedraghen,

13

ende seuen van hemlieden die seuen trompetten, welckmen opt iubileus iaer besicht, ende sij ghinghen voor die arcke des Heeren, gaende ende groot gheclanck makende, ende alle dat ghewapent volck ghinck voor hen, maer dat ander ghemeyn volck volchde die arcke, ende maecten gheluyt met trompetten.

14

Ende sij ghinghen rontsomme die stadt opden tweeden dach eens, ende sij sijn wederomme inden legher comen. Ende alsoo hebben sy ses daghen ghedaen.

15

Maer opden seuensten dach, smorghens vroech opstaende, hebben sij die stadt omme gheghaen (alsoo dat te voren besciet was) seuenwerf.

16

⁺Ende als die priesters in den seuensten ommeganck metten trompetten groot gheclanck maecten, soo seyde Iosue tot alle die van Israhel, Roept, want die Heere heeft v lieden die stadt gheleuert,

+ C

17

ende laet dese stadt wesen verbannen met alle datter binnen is, Alleen laet leuen Raab die ghemeyn weerdinne, met alle die by haer in huys sijn, want sij heeft die boden gheborghen die wij besciet hadden.

18

Maer wacht v dat ghy niet aen en tast van alle die dinghen die v gheboden sijn, op dat ghy niet sculdich en wordt der ouertredinghen, ende dat den legher van Israhel onder die sonde niet en sij, ende niet verstoort en worde,

19

Maer watter is van gout ende siluer, ende van metalen ghereedtscap, ende van ijser, laet dat den Heere heylighen, ende gheleyt worden in sijn tresoiren.

20

Alsdan alle het volck groot ghecrijsch maecte, ende die trompetten groot gheclanck ghauen, nae dat tgheroep ende gheclanck in die ooren der menichten quam, soo sijn die mueren terstont nedergheuallen, ende een ieghelijck is daer op gheclommen ter plaetsen die teghen hem ouer was, ende sij hebben die stadt inghenomen,

21

ende al verslaghen wat daer binnen was, vanden mans totten vrouwen, vanden ionghen kinderen tot den ouden menschen. Ende die ossen, ende schapen, ende esels hebben sij oock met dat scerp vanden swaerde verslaghen.

22

⁺Ende tot den twee mannen die welcke bespieders wtghesonden waren, hebt Iosue gheseyt, Gaet int huys der ghemeynder weerdinnen, ende brengtse wt, ende alle dat haer toebehoort, ghelijck ghy haer by eede vast beloeft heeft.

+ D

23

Ende die ionghelinghen sijn daer in gheghaen, ende hebben daer wt ghebracht Raab, ende haer ouders ende haer broeders met allen haren huysraet, ende haer maesschap, ende sij deden die blijuen buyten den heyrlegher van Israhel.

24

Maer die stadt met alle dat daer binnen vonden is, hebben sij verbrant, sonder dat gout ende siluer ende die metalen vaten, ende ijsere, welck sij gheheylicht hebben inden tresoir des Heeren.

25

Maer Raab der ghemeynder vrouwen ende haers vaders huys met alle dat sij hadde, heeft Iosue doen leuen, ende sij hebben int midden van Israhel ghewoont tot op desen dach toe, om dat sij die boden verborghen hadde, die hy ghesonden hadde om Iericho te bespieden.

Op dien tijt heeft Iosue eenen vloeck ghesproken segghende,

26

Vermalendijt moet die man wesen voor den Heere, die weder oprechten ende timmeren sal die stadt van Iericho, in sijnen iersten gheboren sone moet hy die fundamenten legghen, ende in den ioncsten van sijnen kinderen moet hy haer poorten stellen.

27

Aldus soo heeft die Heere met Iosue gheweest, ende sijnen naem is vermaert gheworden in allen landen.