Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺HIer om nae dat ghehoort hadden alle die coninghen der Amorrheen die ouer die Iordane woonden, aen die westsijde, ende alle die coninghen van Chanaan die welcke besaten die plaetsen omtrent die groote zee, dat die Heere die vloeden der Iordanen drooghe ghemaeckt hadde voor die kinderen van Israhel, tot dat sij door gheghaen waren, soo is hen herte heel onmachtich gheworden, ende daer en is gheenen gheest in hen bleuen, vreesende voor die incoemste der kinderen van Israhel.

+ A

2

Op dien tijt seyde die Heere tot Iosue, Maect voor v steenen messen, ende besnijdt anderwerf die kinderen van Israhel.

3

Ende hy heeft ghedaen dat die Heere beuolen hadde, ende die kinderen van Israhel besneden op den hoeuele der ouerstofkens.

4

Ende dit is die sake van der tweeder besnijdenissen, ⁺Alle dat volck van mans persoonen die wt Egipten gegaen waren alle strijdtbaer mannen die sijn in die woestijne ghestoruen, door die seer langhe omganghen des wechs,

+ B

5

die welcke allegader besneden waren. Maer het volck dat in die woestijne gheboren was,

6

binnen die veertich iaren van die reyse der alderbreetster woestijnen, dat was onbesneden tot dat sij al vernielt waren, die nae des Heeren woort niet ghehoort en hadden, ende dien hy te voren ghesworen hadde, dat hy hen toonen soude tlant van melck ende honich vloeyende.

7

Deser kinderen sijn ghecomen in die plaetse van haren vaderen, ende van Iosue besneden, want sij waren noch onbesneden, alsoo sij gheboren waren, ende niemant en hadde hen onder weghen besneden.

8

⁺Maer nae dat sij alle besneden waren, soo bleuen sij op die selue plaetse des leghers, tot dat sij ghenesen waren.

+ C

9

Ende die Heere heeft tot Iosue gheseyt, Heden heb ick tverwijt van Egipten v lieden afghenomen. Ende die plaetse is ghenoemt Galgala, tot op den dach van heden toe.

10

Ende die kinderen van Israhel sijn te Galgala bleuen, ende hebben daer Phase ghehouden, opden veerthiensten dach der maent, des auonts, op dat plat lant van Iericho,

11

ende sij hebben des anderen daechs gheten van die vruchten dies lants, onghedeesemde brooden ende ghersten pappen vanden seluen iare.

12

Ende het Manna heeft opghehouden. nae dat sij van die vruchten des lants gheten hadden, ende die kinderen van Israhel en hebben die spijse niet meer ghebruyckt, ⁺maer sij aten van die vruchten van dien iare, des lants van Chanaan.

+ D

13

Maer doen Iosue was op dat ackerlant der stadt van Iericho, soo heeft hy sijn ooghen opghehauen, ende ghesien eenen man teghen hem staende houdende een bloot swaert, ende hy is tot hem ghegaen, ende heeft gheseyt, Sijde onse, oft onser vianden?

14

Ende hi antwoorde, Gheensins, maer ic ben een prince van des Heeren heyr, ende ic coem nv.

15

Ende Iosue viel op sijn aensicht gheboocht te aerden, Ende aenbiddende heeft hy gheseyt, Wat seyt mijn heere tot sijnen dienaer?

16

Ontbint (seyde hy) die scoenen van uwen voeten, want die plaetse daer ghy op staet is heylich. Ende Iosue heeft ghedaen alsoo hem beuolen was.