Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

ENde als sij ouer gheghaen waren, soo seyde die Heere tot Iosue,

2

⁺Kiest tweelf mannen, wt elcken gheslachte eenen besonderen man,

+ A

3

ende ghebiedt hen dat sij wt dat midden van den gront der Iordanen daer der priesters voeten ghestaen hebben, wech draghen twaelf seer harde steenen, die welcke ghy stellen sult op die plaetse des leghers daer ghi desen nacht die tenten slaen sult.

4

Ende Iosue heeft twaelf mannen gheroepen die hy ghecosen hadde wt die kinderen van Israel, wt elcken gheslachten eenen besonderen man.

5

Ende hi heeft tot hen gheseyt, Gaet voor die arcke des Heeren ws Godts tot int midden

[p. *185]

der Iordanen, ende draecht van daer elck eenen besonderen steen, op uwe scouderen, nae dat ghetal der kinderen van Israhel,

6

op dat een teeken sij tusschen v lieden. Ende als v kinderen v morghen vraghen sullen segghende, Wat willen hem dese steenen?

7

soo suldi hen antwoorden, Die wateren vander Iordanen sijn vergaen voor die arcke van des Heeren verbont, als die daer door ghinck, daerom sijn dese steenen daer ghestelt tot een ghedenckenisse der kinderen van Israhel, tot inder eewicheyt.

8

⁺Hier om hebben die kinderen van Israhel ghedaen alsoo hen Iosue gheboden hadde, draghende wt dat midden van den gront der Iordanen twaelf steenen, ghelijck die Heere hen beuolen hadde, nae dat ghetal der kinderen van Israhel tot op die plaetse daer sij haren legher ghemaeckt hebben, ende daer hebben sij die ghestelt.

+ B

9

Ende Iosue heeft noch twaelf ander steenen ghestelt int midden vanden gront der Iordanen, daer die priesters ghestaen hadden die darcke van dat verbont des Heeren droeghen, ende die sijn daer tot opden dach van heden toe.

10

Maer die priesters die darcke droeghen, stonden int midden vander Iordanen tot dat al volbracht worde dwelck die Heere Iosue beuolen hadde, dat hy den volcke segghen soude, ende ghelijck hem Moyses gheseyt hadde. Ende tvolck heeft hem ghehaest ende is door gheghaen.

11

Ende als sij alle gader ouer waren, soo is die arcke des Heeren oock door ghegaen, ende die priesters ghinghen voor dat volck.

12

⁺Ende die kinderen van Ruben ende Gad ende dat half gheslachte van Manasse sijn al ghewapent ghetrocken voor haer broeders die kinderen van Israhel, ghelijc hen Moyses beuolen hadde,

+ C

13

ende veertich duysent strijdtbaer mannen by haren hoopen, ende scharen ghinghen door die effen plaetsen ende platte velden der stadt van Iericho.

14

Op dien dach heeft die Heere Iosue groot ghemaect voor alle die van Israhel, datse hem ontsien souden ghelijc sij Moysen ontsien hadden doen hi noch leefde

15

Ende hy heeft tot hen gheseyt,

16

Ghebiedt den priesters die de arcke des Heeren draghen, dat sij opgaen wter Iordanen.

17

Die welcke heeft hen beuolen segghende, Climt opwaerts wter Iordanen.

18

Ende als sij opghecomen waren draghende die arcke des Heeren, ende begonsten die drooghe aerde te betreden, soo sijn die wateren wederom comen in haer plaetse, ende vloeydden ghelijck sij te voren pleghen.

19

⁺Ende het volc clam wt die Iordane opden thienden dach der ierster maent, ende sij hebben haren legher ghemaect in Galgalis, teghen die oostsijde der stadt van Iericho.

+ D

20

Ende die twaelf steenen die sij wten gront der Iordanen ghenomen hadden, heeft Iosue ghestelt in Galgalis,

21

ende tot die kinderen van Israhel gheseyt, Als v kinderen morghen van haren vaders vraghen sullen, ende hen segghen, Wat bedieden dese steenen?

22

so suldi hen leeren ende segghen, Door den drooghen gront is Israhel gegaen door dese Iordane

23

als die Heere onse God die wateren van die verdroochde voor ons aensicht tot dat ghy door waert gegaen,

24

ghelijck hy te voren ghedaen hadde in die roode zee welck hy oock drooghe heeft ghemaect tot dat wij daer door waren ghegaen,

25

op dat alle het volck der aerden souden leeren kennen die aldersterckste hant des Heeren, ende om dat ghy oock soudt vreesen den Heere uwen Godt tot allen tijden.