Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺HIer om Iosue des nachts opstaende heeft den legher doen optrecken, ende van Setim vertreckende sijn sy ghecomen by die Iordane, hy ende alle die kinderen van Israhel, ende sij sijn daer bleuen drij daghen lanck.

+ A

2

Ende als die ouerleden waren, soo sijn die wtroepers gheghaen doort midden vanden heyrleghers,

3

ende hebben begonst te roepen, Als ghy die arcke des Heeren ws Godts sien sult, ende die priesters vander Leuiten gheslachte die arcke draghende, soo staet ghy ooc op, ende volcht hen die v voorgaen sullen,

4

ende laet tusschen v ende die arcke een ruymte wesen van twee duysent cubicus, op dat ghi verre sien moecht, ende kennen door welcken wech dat ghy sult moeten ghaen, want ghy en hebt door dien te voren noyt ghewandelt, ende wacht v dat ghy der arcken niet by en coemt.

5

⁺Ende Iosue heeft tot dat volck gheseyt, Wort gheheylicht, want morghen sal die Heere onder v lieden wonderlijcke dinghen doen.

+ B

6

Ende hy seyde tot die priesters, Neemt op die arcke des verbonts, ende gaet voor tvolc, Die welcke tghebodt volbrenghende, hebben die arcke opghenomen ende voor hen ghewandelt.

7

Ende die Heere heeft tot Iosue gheseyt, Heden sal ic v beghinnen te verheffen voor gheheel Israhel, opt dat sij weten moghen, dat ic met v ben ghelijck ic met Moyses was.

8

Maer ghebiedt ghy den priesters, die de arcke des verbonts draghen, ende segghet hen, Als ghy sult comen sijn in een deel vanden water der Iordanen, so blijft daer in staende.

9

Ende Iosue heeft gheseyt tot die kinderen van Israhel, Coemt herwaerts ende hoort dat woordt des Heeren ws Godts.

10

Ende wederom, Daer aen (seyt hy) suldi weten, ⁺dat die Heere die leuende Godt int midden onder v lieden is, ende dat hy voor v aenschijn sal verderuen die Chananeen, ende Hetheen, Heueen, ende Pherezeen, die Gergeseen oock, ende die Iebuseen, ende die Amorrheen.

+ C

11

Siet die arcke des Heeren van alle der aerden, sal voor v lieden gaen door die Iordane,

12

Bereyt twaelf mannen van die gheslachten van Israhel, wt elcken gheslachte eenen besonderen.

13

Ende als die priesters die de arcke des Heeren Godts van alle der werelt draghen die voetstappen van haren voeten sullen gheset hebben in die wateren der Iordanen, soo sullen die wateren die beneden sijn nederwaerts afloopen ende heel te niet gaen, ende die van bouen comen sullen op eenen grooten hoop staende blijuen.

14

Hierom is dat volck wt sijn tabernakelen ghegaen dat sij doer die Iordane gaen souden, ende die priesters die de arcke des verbonts droeghen ghinghen voor hen.

15

⁺Ende als sij in die Iordane comen waren, ende dat hen voeten eensdeels metten water nat gheworden waren (want die Iordane hadde die oeueren van haren loop al gheuult ten tijde vanden oochst)

+ D

16

soo bleuen die nederloopende wateren op een plaetse staende, ende opswillende ghelijc eenen berch worden ghesien van verre, vander stadt die Edom ghenoemt is tot die plaetse van Sarthan, maer die wateren die beneden waren, sijn nederwaerts afgheloopen in die zee der woestijnen (welc nv ghenoemt wort die doode zee) tot dat sij heel vergaen waren.

17

Maer het volc ghinck teghen die Iordane, ende die priesters die darcke des verbonts droeghen, stonden op die drooghe aerde int midden vander Iordanen opghescort, ende alle dat volck ghinck door den drooghen gront.