Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ALdus soo heeft Iosue Nuns sone van Sethim ghesonden twee mannen, bespieders int heymelijck, ende tot hemlieden gheseyt, Gaet, ende besiet dat lant, ende die stadt van Iericho. Ende sij sijn ghereyst ende ghegaen int huys van een ghemeyn werdinne die Rahab hiet, ende sij hebben by haer gherust.

+ A

2

Ende het is den coninck van Iericho ghebootscapt ende gheseyt, Siet hier sijn inder nacht mannen incomen vanden kinderen van Israhel om dlant te bespieden.

3

Ende die coninck van Iericho heeft ghesonden tot Rahab, segghende, Brengt die mans wt, die tot v comen sijn ende in v huys gheghaen sijn, want het sijn bespieders, ende sij sijn comen om alle dlant te besien.

4

Ende die vrouwe nemende die mannen heeftse gheborghen, ende gheseyt, Ick belijdt, sij sijn by my comen, maer ic en wist niet van waer dat sij waren,

5

ende alsmen die poorte sloot in die duysternisse soo sijn sij tsamen wtghegaen, ick en weet niet waer henen dat sij ghegaen sijn, veruolcht se rasschelijc, ende ghy sultse achterhalen.

6

Maer sij dede die mannen bouen gaen opden solder van haren huyse, ende bedectese met stoppelen van vlas, dat daer was.

7

⁺Maer die ghene die wtghesonden waren, sijn hen gheuolcht doer den wech die daer leyt nae die ondiepte der Iordanen, ende als sij wtgheghaen waren soo is terstont die poorte ghesloten.

+ B

8

Sij en waren noch niet ontslapen die daer gheborghen laghen, ende siet die vrouwe is opwaerts by hen comen, ende seyde,

9

Ick weet wel dat die Heere v lieden dlant gheleuert heeft, want den grouwel van v lieden heeft ons oueruallen, ende alle die inghesetenen des lants sijn heel onmachtich gheworden,

10

Wij hebben ghehoort dat die Heere die wateren vander rooder zee verdroocht heeft, doen ghy daer in ghinghet als ghy wt Egipten ghegaen waert, ende wat ghy ghedaen hebt den twee coninghen der Amorrhiten die woonden ouer die Iordane, Sehon ende Og, die welcke ghy verslaghen hebt.

11

Ende dese dinghen hoo-

[p. *184]

rende, hebben wij seer gheureest, ende ons herte is heel flau gheworden, ende daer en is gheenen gheest in ons ghebleuen tot uwer incoemste, Want die Heere uwe Godt, is Godt bouen inden hemel ende beneden opder aerden.

12

Daerom so sweert my nv byden Heere, ghelijck ic met v bermherticheyt ghedaen hebbe, dat ghy ooc also doen sult met mijns vaders huys, ende dat ghy my gheuen sult een warachtich teeken,

13

⁺dat ghy sult behouden mijnen vader ende moeder, mijn broeders ende susters, ende al dat hen toebehoort, ende dat ghy onse zielen sult vander doot verlossen.

+ C

14

Die welcke hebben haer gheantwoordt, Ons ziele moet voor vlieden ghedoot worden, eest sake nochtans dat ghy ons niet en verradet, ende als die Heere ons dit lant sal gheleuert hebben, so sullen wij aen v ghenade ende warachticheyt doen.

15

Hier om soo heeft sij die mannen neder ghelaten met een coorde door een vinster, want haer huys was vast aen der stadt muer.

16

Ende sij seyde tot hemlieden Treckt opwaerts naet tgheberchte, op dat sij v int wederkeeren by auontueren niet en ontmoeten, ende houdt v daer drij daghen verborghen, tot dat sij weder comen sijn, ende also suldi uwen wech gaen.

17

Ende sij hebben tot haer gheseyt, Wij sullen ontsculdich sijn, van desen eede, daer ghy ons mede besworen hebt,

18

soo wanneer wij int lant comen, eest dat een teeken sijn sal dit root coordeken, ende dat ghy dat bindet in die vinster, door die welcke ghy ons neder ghelaten hebt, ende dat ghy v vader ende moeder, ende v broeders, ende allen v maescap verghadert hebt in v huys.

19

Soo wie wt die doore ws huys gheghaen sal sijn, diens bloet sal op sijn hooft wesen, ende wij sullen daer vreemt af sijn. ⁺Maer het bloet van alle die ghene die by v in huys sullen wesen sal op ons hooft comen, eest dat hen iemant ghenaket.

+ D

20

Maer eest dat ghy ons sult willen verraden, ende dese woorden int openbaer brenghen, so sullen wij van desen eede suyuer wesen daer ghy ons mede besworen hebt.

21

Ende sij heeft gheantwoordt, Het ghesciede alsoo ghy gheseyt hebt.

Ende latende hen gaen dat sij voorts trecken souden heeft sij dat root coordeken in die venster ghehanghen.

22

Ende wandelende sijn sij ghecomen tot dat gheberchte, ende sijn daer drij daghen lanc bleuen, tot dat sij wederom comen waren die hen veruolcht hadden, want doen sij hen door allen die weghen sochten, en hebben sij die niet gheuonden.

23

Ende als die in die stadt comen waren, soo sijn die bespieders wederghekeert, ende neder ghegaen vanden berch, ende als sij ouer die Iordane ghepasseert waren, soo sijn sij tot Iosue Nuns sone ghecomen, ende hebben hem vertelt alle die dinghen die hen ghebuert waren,

24

ende hebben gheseyt, Die Heere heeft alle dit lant in onse handen gheleuert, ende alle die inghesetenen des lants sijn van vreesen heel verslaghen.