Den gheheelen Bybel, Inhoudende het oude ende nieuwe Testament (Leuvense bijbel 1548)

Dat eerste Capittel.

1

⁺ENde tes ghesciet nae die doot van Moyses des Heeren dienaer, dat die Heere ghesproken heeft tot Iosue Nuns sone, Moyses dienaer, ende hem seyde,

+ A

2

Mijn dienaer Moyses is ghestoruen, Staet op ende reyst ouer dese Iordane, ghy ende alle tvolck met v int lant dat ick den kinderen van Israhel gheuen sal.

3

Alle die plaetsen welck die voetstappen uwer voeten betreden sullen die sal ick v gheuen, ghelijck ic Moysi gheseyt hebbe.

4

Vander woestijnen ende lybanus, totter grooter riuiere Euphrates, alle dat lant vanden Hethiters tot die groote zee, teghen der sonnen onderganck sal v pale wesen.

5

Niemant en sal v moghen wederstaen alle die daghen ws leuens, ghelijck ic met Moysen gheweest hebbe, also sal ick oock met v sijn, Ic en sal v niet verlaten, noch van v sceyden.

6

⁺Wordt versterct ende sijt vroom, want ghy sult desen volcke het lant metten lote wtdeylen, daer om dat ic uwen vaderen ghesworen hebbe, dat ict hen leueren soude.

+ B

7

Daerom wordt versterct, ende weest seer vroom, dat ghi bewaert ende doet alle die wet, welc Moyses mijn dienaer v beuolen heeft, en wilt daer niet afgaen ter rechter oft ter slincker sijden, op dat ghy verstaen moecht alle dinghen die ghy doet.

8

En laet dat boeck van deser wet van uwen monde niet gaen, maer ghy sult daer op dencken by daghen ende nachten, op dat ghy bewaren ende doen moecht alle die dinghen die daer inne ghescreuen staen. Dan suldi uwen wech recht maken ende dien verstaen,

9

Siet ic ghebiede u, Wort versterct, ende weest vroom, En wilt niet vreesen, ende en wilt niet veruaert sijn, want die Heere v Godt is met v, in alles daer ghy toe ghaen sult.

10

⁺Ende Iosue heeft den princen des volcs gheboden segghende, Gaet doert midden vanden legher, ende ghebiedt den volcke, ende segghet,

+ C

11

Versiet v van spijse, want nae den derden dach suldi ouer die Iordane trecken, ende ingaen om te besitten dat lant welc die Heere uwe Godt v gheuen sal.

12

Ende tot die Rubeniten ende Gaditen ende tot dat halue gheslachte van Manasse heeft hy gheseyt,

13

Weest ghedachtich der woorden die welcke v Moyses des Heeren dienaer gheboden heeft, segghende, Die Heere nwe Godt heeft v lieden ruste ghegheuen, ende alle dat lant,

14

v huysvrouwen ende v kinderen ende v vee sullen blijuen in dlant welck Moyses v ghegheuen heeft aen dese sijde der Iordanen, maer gaet ghy ouer ghewapent voor uwe broeders, alle die sterck van handen sijt, ende strijt voor hen,

15

⁺tot dat die Heere uwen broederen rust gheue, ghelijck hy v ghegheuen heeft, ende dat sij ooc moghen besitten dat lant welck die Heere uwe Godt hen gheuen sal, ende also keert wederom in dlant van uwer besittinghen, ende ghy sult daer in woonen, welck Moyses des Heeren dienaer v gegheuen heeft ouer die Iordane teghen der sonnen opganck.

+ D

16

Ende sij hebben tot Iosue gheantwoort ende gheseyt, Alle dat ghi ons beuolen hebt sullen wij doen, ende werwaerts dat ghy ons senden sult, sullen wij gaen,

17

Ghelijck wij in allen dinghen Moysi onderdanich gheweest hebben alsoo sullen wij v oock onderdanich sijn, alleen so sij die Heere v Godt met v, ghelijck hy met Moyses gheweest heeft,

18

Soo wie dat tseghen uwen mont spreect, ende niet onderdanich en is alle den woorden die ghy hem ghebieden sult, die moet steruen, alleenlijck weest ghy vroem ende doet manlijck.