Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺HOort ghy hemelen dat ic spreke, ende die eerde hoore die woorden mijns monts.

+ A

2

Mijn leeringhe renne tot eenen reghen, ende mijn sprake vloeye als den dauwe, ghelijck den reghen opt cruyt, ende ghelijck die druppelen opt gras.

3

Want ick sal den naem des Heeren aenroepen, gheeft onsen Godt die heerlijcheyt.

4

Godts wercken sijn volmaect, ende alle sijn weghen sijn rechte ordeelen.

God is ghetrouwe ende sonder eenighe onrechtuerdicheyt, rechtuerdich ende recht.

5

Dat quaet ende verkeert gheslachte heeft teghen hem ghesondicht in vuylicheden, maer sijn kinderen niet

6

Loonde ghy hier mede den Heere, o ghy dwaes ende onwijs volck, en is hy niet v vader die v beseten heeft, ende ghemaect, ende v ghescapen heeft?

7

Ghedenckt der ouder daghen, ouerpeyst alle die gheslachten besonder, vraghet uwen vader, ende hy salt v vercondighen, uwen ouders, ende sij sullent v segghen.

8

⁺Doen die alderhoochste die heydenen bedeylde, als hy Adams kinderen van een scheyde, doen stelde

+ B

[p. *181]

hy die palen der volcken, nae tghetal der kinderen van Israhel.

9

Maer des Heeren deel was sijn volc, Iacob was dat coordeken van sijnder eruen.

10

Hy heeft hem vonden in dat woeste lant, in die grouwelijcke plaetse der grooter wildernissen.

Hy heeft hem al omme gheleyt ende gheleert, ende bewaert als den appel sijnder ooghen.

11

Ghelijck eenen arent die sijn ionghen tot vlieghen verwect, ende op hen vlieghende, soo heeft hy sijn vloghelen wt gheslaghen, ende hy nam hem op, ende droech hem op sijn scouderen.

12

Die Heere heeft alleene sijn leytsman gheweest, ende daer en was gheen vreemt Godt met hem.

13

Hy heeft hem ghestelt, op een verheuen lant, om dat hy eten soude der velden vruchten, ende suyghen honich wt den steen, ende olie wt den alder hartsten steen.

14

⁺Boter vanden coeyen, ende melck vanden schapen, met dat vet vanden lammeren ende rammen der kinderen van Basan, ende bocken, met dat merch der tarwen, ende dat hij dalderpuerste bloet vanden wijndruyuen drincken soude.

+ C

15

Mijn beminde is vet gheworden, ende hy heeft teghen ghesporret, Hy is weeldich gheworden vet ende breet, hy heeft verlaten Godt sijnen scepper, ende hy is van Godt sijnen salichmaker ghesceyden.

16

Sij hebben hem gecreyt door die vreemde goden, ende door die afgrijselijcheden hebben sij hem tot gramscappen verwect.

17

Sij hebben slachofferanden gheoffert den duyuelen ende niet Gode, den goden die sij niet en kenden, die nieuwe ende versch sijn comen, den welcken haer vaderen niet ghedient en hebben.

18

Den Godt die v ghewonnen heeft hebdi verlaten ende den Heere uwen scepper hebdi vergheten.

19

Die Heere heuet ghesien, ende hy is tot gramschap verwect, want sijn sonen ende dochteren hebben hem ghecreyt.

20

Ende hy heeft gheseyt, Ick sal mijn aensicht van hen verberghen, ende haer wterste aenmercken, want het is een verkeert gheslachte ende tsijn onghetrouwe kinderen.

21

Sij hebben my opgheroeyt door den ghenen die gheen Godt en was, ende sij hebben my met haren ydelheyden ghecreyt, ende ick salse oproeyen door die ghene die gheen volc en sijn, ende door een dwaes volc sal icse creyten.

22

⁺Daer is een vier ontsteken in mijnder heeter gramscappen, ende tsal bernen tot dat wterste der hellen, ende dlant met sijnen groeytsel verslinden, ende tsal die fundamenten der berghen verbranden.

+ D

23

Ick sal op hen veel quaets vergaderen ende mijn schichten in hen al verschieten,

24

Sij sullen van hongher vergaen ende voghelen sullense verslinden, met die alderbitterste beten, der beesten tanden sal ick hen toesenden, met een rasende verwoetheyt der treckender dieren op die eerde, ende der cruypender.

25

Van buyten salse tsweert bederuen, ende van binnen den anxt, beyde den ionghelinck mettermaghet, dat suyghende kint metten ouden mensch.

26

Ende ick heb gheseyt, Waer sijn sij? ic sal hen ghedenckenisse doen vergaen van onder die menschen.

27

Maer om der vianden gramscappe, heb ict wtghestelt, op dat haer vianden by auontueren hen niet verhouerdighen en souden, ende segghen, ons hant is verhauen, ende die Heere en heeft dit niet al ghedaen.

28

Het is een volck sonder raet, ende sonder voersienicheyt.

29

Och oft sij wijs waren, ende verstonden, ende dat sij haer wterste voersaghen.

30

Hoe gesciedet datter een veruolchde duysent, ende datter twee thien duysent deden vlieden? en is dat niet om dat haer Godt hen vercocht heeft, ende die Heere hen beuanghen?

31

Want ons Godt en is niet ghelijc hen goden, ende ons vianden sijns rechters.

32

⁺Haren wijngaert is vander Sodomiten wijngaert, ende van die voersteden van Gomorrha, Haren druyf is eenen druyf der gallen, ende haer wijndruyuen sijn bouen maten seer bitter.

+ E

33

Der draken galle is haren wijn, ende een venijn van aspijden ongheneselijck.

34

En sijn dese dinghen by my niet verborghen, ende beseghelt in mijn scatten?

35

Mijne is die wrake, ende ic salt hen loonen ten tijde alsoo dat haren voet struyckelen sal, den dach der verderffenissen is by, ende die tijden haesten hem om by te sijn.

36

Die Heere sal ouer sijn volck recht doen, ende met sijn dienaers sal hy bermhertich wesen.

Hy sal aensien dat hen hant onmachtich gheworden is, ende dat die beslotene vergaen sijn, ende die ouerbleuene vernielt sijn.

37

Ende hy sal segghen, waer sijn haer goden daer sij betrouwen in hadden?

38

Vander welcker slachofferanden sij tbinnenste vet aten, ende droncken den wijn van haren dranckofferen.

Laetse opstaen ende v hulpen, ende v bescermen in uwen noot.

39

Siet dat ict alleen ben, ⁺ende datter anders gheen Godt en is dan ick, Ick sal dooden ende doen leuen, Ic sal slaen, ende ic sal ghenesen, ende daer en is niemant diet wt mijnen handen soude moghen trecken.

+ F

40

Ic sal mijn hant totten hemel heffen, ende segghen, Ick leue inder eewicheyt.

41

Eest dat ic mijn swaert scerp slijpe, ghelijck eenen blixem, ende dat mijn hant dat recht ordeel aengrijpt, soo sal ick met die wrake mijn vianden betalen, ende den ghenen die my haten sal ick wederloonen.

42

Ic sal mijn pijlen met bloede droncken maken, ende mijn swaert sal vleesch verslinden, vanden bloede der verslaghenen, ende der gheuanghenissen van dat ghebloot hooft der vianden.

43

Loeft ghy heydenen sijn volck, want hy sal dat bloet van sijnen dienaers wreken, ende haren vianden metter wraken betalen, ende sijns volcks lant ghenadich sijn.

44

Aldus soo is Moyses ghecomen, ende heeft alle die woorden van desen lofsanck ghesproken in die ooren des volcks, hy ende iosue Nuns sone.

45

⁺Ende hy heeft alle dese woorden volseyt, sprekende tot alle die van Israhel,

+ G

46

ende tot hen gheseyt, Stelt v herte op alle die woorden die ick v lieden heden ghetuyghe, dat ghy die uwen kinderen voerts ghebiedt te bewaren, ende te doen, ende te volbringhen alle datter ghescreuen is van deser wet,

47

Want sij en sijn v te vergheefs niet gheboden, maer om dat een ieghelijck daer doer leuen soude, die welcke ghy volbrenghende langhen tijt moecht blijuen int lant daer ghy incomen sult om dat te besitten als ghy ouer die Iordane sult ghepasseert sijn.

48

Ende die Heere heeft tot Moysen opden seluen dach ghesproken segghende,

49

Gaet op dit gheberchte Abarim, dats te segghen der ouerganghen

[p. *182]

tot opden berch Nebo, die daer is int lant van Moab, teghen ouer Iericho, ende besiet dat lant van Chanaan, dwelck ic den kinderen van Israhel gheuen sal om te behouden, ende sterft daer opden berch,

50

ende als ghy daer op sult comen sijn, soo suldi by uwen volcke versaemt worden, ghelijck v broeder Aaron ghestoruen is opden berch Hor, ende versaemt by sijnen volcke,

51

Want ghy hebt tseghen my ouertreden int midden der kinderen van Israhel, aen die wateren des wedersegghens te Cades in die woestijne Sin, ende ghy en hebt my niet gheheylicht onder die kinderen van Israhel.

52

Ghy sult teghen v ouer dlant sien, ende ghy en sult daer niet in gaen, dwelck ick den kinderen van Israhel gheuen sal.