Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

⁺ALdus is Moyses wech ghegaen, ende heeft alle dese woorden ghesproken, tot alle die van Israhel,

+ A

2

ende hen gheseyt. Ick ben heden hondert ende twintich iaren out, ick en can niet meer wt ende in ghegaen, besonder want die Heere oock tot my gheseyt heeft. Ghy en sult ouer dese Iordane niet ghaen,

3

Daerom sal die Heer uwe Godt voor v ouer trecken, ende hy sal alle dese volcken vernielen in v aenschijn, ende ghy sult die besitten, ende desen Iosue sal voor v ouertrecken, ghelijck die Heere gheseyt heeft.

4

Ende die Heere sal hen doen ghelijck hy Sehon

[p. *180]

ende Og der Amorrhiters coninghen, ende haren lande ghedaen heeft, ende hi salse te niet brenghen.

5

Hierom als hy v dese oock sal gheleuert hebben, soo suldi hen desghelijcs doen alsoo ick v beuolen hebbe.

6

Doet manlijck, ende weest vroem, en wilt niet vreesen, noch en veruaert v niet tot haren aenschouwen, want die Heere v Godt is v leydtsman, ⁺ende hy en sal v niet verlaten oft afgaen.

+ B

7

Ende Moyses heeft Iosue gheroepen, ende hem gheseyt voor gheheel Israhel, Hebt stercken moet, ende weest vroem, want ghy sult dit volck brenghen int lant, waer af die Heere ghesworen heeft haren vaderen dat hy hen dat soude gheuen, ende ghy sult dat metten lote wtdeylen.

8

Ende die Heere die v leytsman is, sal met v wesen, hy en sal v niet verlaten oft afgaen, en wilt niet vreesen oft verscrict sijn.

9

Hierom heeft Moyses dese wet ghescreuen, ende die den priesters ghegheuen, den kinderen van Leui, die daer droeghen die arcke van dat verbont des Heeren, ende alle den ouders van Israhel.

10

Ende hy heeft hemlieden gheboden segghende, Nae seuen iaren int iaer der quijtsceldinghen op dat hoochtijt der tabernakelen

11

als alle die van Israhel tsamen comen sullen, ⁺om hen te vertoonen voor dat aenschijn van den Heere uwen Godt, ter plaetsen welc die Heere sal vercoren hebben, soo suldi die woorden van deser wet lesen voor alle die van Israhel, daer sijt hooren,

+ C

12

ende daert volck al te samen sal vergadert wesen, soo wel die mans als die vrouwen, kinderen ende vreemdelinghen die binnen nwer poorten sijn, op dat sijt hoorende moghen leeren ende vreesen den Heere uwen Godt, ende bewaren ende volbrenghen alle die woorden van deser wet,

13

ende dat haer kinderen diet noch niet en weten moghen hooren, ende vreesen den Heere haren Godt alle die daghen dat sij verkeeren sullen opt lant, waer toe ghy nv ouer die Iordane gaende reyst, om dat te besitten.

14

Ende die Heere seyde tot Moysen, Siet die daghen uwer doot sijn nakende, roept Iosue, ende staet in dat tabernakel des ghetuyghenissen, op dat ick hem ghebiede.

⁺Hierom sijn Moyses ende Iosue wech ghegaen, ende stonden in dat tabernakel des ghetuyghenis,

+ D

15

ende die Heere heeft daer gheopenbaert in een columne van eender wolcken, die welcke heeft ghestaen in den inganck des tabernakels.

16

Ende die Heere heeft tot Moysen gheseyt, Siet, ghy sult ontslapen met uwen vaderen, ende dit volck opstaende sal oncuysheyt bedrijuen met die vreemde goden in dlant, daert inne gaet om daer in te woonen, daer sullen sij my verlaten, ende tverbont breken, het welck ic met hemlieden ghemaect hebbe.

17

Ende mijn heete gramscap sal haer seer verstooren tseghen hen in dien daghe, ende ick salse verlaten, ende mijn aenschijn van hen verberghen, ende sij sullen verslint worden, ende alle quade dinghen, ende tribulacien sullen hen vinden, alsoo dat sij op dien dach segghen sullen, In der waerheyt om dat Godt met my niet en is, daer om hebben my alle dese quade dinghen gheuonden.

18

⁺Ende ic sal mijn aenschijn verberghen, ende bedecken op dien dach, om alle dat quaet dat sij ghedaen hebben, om dat sij die vreemde goden gheuolcht hebben.

+ E

19

Daerom soo scrijft nv voor v dit liedeken, ende leeret den kinderen van Israhel, dat sij dit onthouden moghen in haer memorie, ende metten monden singhen, ende dat dit liedeken my mach sijn voor een ghetuyghenisse onder die kinderen van Israhel.

20

Want ick salse brenghen int lant, daerom dat ick haren vaderen ghesworen hebbe, van melc ende honich vloeyende.

Ende als sij sullen gheten hebben, ende versaet, ende vet gheworden sijn, soo sullen sij afghekeert worden tot die vreemde goden, ende hen dienen, ende sij sullen my lasteren, ende mijn verbont breken.

21

Als hen dan veel quaets ende lijdens vonden sullen hebben, soo sal hen dit liedeken antwoorden voor een ghetuyghenis, ⁺dwelck gheen verghetelijcheyt en sal verdrijuen wt den mont ws saets.

Want ic kenne hen ghedachten die sij noch heden doen sullen, eer icse sal brenghen int lant dat ick hen beloeft hebbe.

+ F

22

Hier om soo heeft Moyses den lofsanck ghescreuen, ende den kinderen van Israhel gheleert.

23

Ende die Heere heeft Iosue Nuns sone gheboden ende gheseyt, Wort versterct, ende weest vroom, want ghy sult die kinderen van Israhel brenghen int lant welc ic hen gheloeft hebbe, ende ic sal met v wesen.

24

Daer om nae dat Moyses die woorden van deser wet in eenen boeck ghescreuen ende voleynt hadde,

25

so heeft hy den Leuiten gheboden, die darcke van des Heeren verbont droeghen, segghende,

26

Neemt desen boeck, ende legt dien binnen aen die sijde der arcken des verbonts, vanden Heere uwen Godt, dat dien aldaer tseghen v lieden mach sijn tot een ghetuyghenis.

27

⁺Want ick kenne v wederspannicheyt wel, ende uwen seer harden necke, Want die wijle dat ic noch gheleuet hebbe ende met v ghegaen, soo hebdi altijt wederspannichlijck ghedaen teghen den Heere, hoe veel te meer als ick doot sal sijn?

+ G

28

Vergadert by my allen die ouders by uwen gheslachten, ende v leeraers, ende ic sal dese woorden spreken dat sijt hooren, en ic sal hemel ende aerde tseghen hen aenroepen,

29

Want ic weet wel dat ghy na mijn doot booslijck doen sult, ende seer corts sult afkeeren van den wech dien ick v gheboden hebbe, ende dan sal v veel quaets ouercomen ten laesten tijden als ghy sult quaet ghedaen hebben voor daenschijn des Heeren om hem te creyten door uwer handen wercken.

30

Hier om heeft Moyses (daert alle die vergaderinghe van Israhel hoorde) die woorden van desen liedeken ghesproken, ende tot den eynde toe volbracht.