Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

1

⁺DAerom soo wanneer dat alle dese woorden op v comen sullen, die benedijdinghe oft die vermaledijdinghe, welc ick voor v aensicht gheleyt hebbe, ende dat ghy beweecht sijnde door berou ws herten onder alle die heydenen, daer v die Heere v Godt onder sal verstroyt hebben,

+ A

2

ende ghi v weder tot hem keeren sult, ende onderdanich wesen sijnen gheboden ghelijck ick heden ghebiede v ende uwen kinderen, met v gheheel herte ende met v gheheel ziele,

3

soo sal die Heere uwe Godt v wederom leyden wt uwer gheuanghenissen, ende uwer bermhertich wesen, ende v weder vergaderen wt allen volcken, daer hy v te voren onder verstroyt hadde,

4

Ende al waerdi verstroyt aen die wterste des hemels, van daer sal v die Heere uwe Godt wederom trecken, ende te hemwaerts nemen,

5

ende brenghen int landt dat v vaders beseten hebben, ende ghi sult dat wederom besitten, ende hy sal v ghebenedijden, ende maken v meerder van ghetale dan v vaderen gheweest hebben.

6

⁺Ende die Heere uwe Godt sal v herte besnijden, ende dat herte ws saets, dat ghy den Heere uwen Godt sult moghen lief hebben met v gheheel herte ende met v gheheel ziele, dat ghy moecht leuen.

+ B

7

Maer alle dese vermaledijdinghe sal hy keeren op uwe vianden, ende op die ghene die v haten ende veruolghen.

8

Maer ghi sult weder keeren, ende hooren die stemme des Heeren ws Godts, ende doen alle die gheboden die ic v heden beuele,

9

ende die Heere sal v maken oueruloedende in alle die wercken uwer handen, in die vrucht ws lichaems, ende in die vrucht van uwen behelpighen vee, in die vruchtbaerheyt ws lants, ende in oueruloedicheyt van allen dinghen, Want die Heere sal wederkeeren dat hy hem verblijde van v in alle goede dinghen, ghelijck hi hem verblijt heeft in uwe vaderen,

10

eest sake nochtans dat ghy hooren sult nae die stemme des Heeren ws Godts, ende sijn gheboden ende ceremonien onderhout, die in dese wet ghescreuen sijn, ⁺ende dat ghy tot den Heere uwen Godt wederkeert met uwen gheheelen herte, ende met v gheheel ziele.

+ C

11

Dit ghebodt welck ick v heden ghebiede en is bouen v niet, oft verre gheleghen,

12

noch inden hemel ghestelt, dat ghi soudt moghen segghen. Wie ysser van ons lieden die inden hemel opclimmen mach, dat hy dit tot ons brenghe, dat wi dat moghen hooren, ende metten wercken volbrenghen?

13

Noch ten is ouer die zee niet gheleghen, dat ghy moecht claghen ende segghen. Wie ysser van ons lieden die sal moghen ouer die zee varen, ende dat tot by ons halen, op dat wij mochten hooren ende doen datter gheboden is?

14

Maer dat woort is seer by v, in uwen mont, ende in v herte, op dat ghijt doen soudt.

15

Aenmerct dat ick heden voor v aensicht ghestelt hebbe dleuen ende dat goet, ende daer teghen die doot ende het quaet,

16

om dat ghy den Heere uwen Godt soudt liefhebben ende wandelen in sijn weghen, ende sijn gheboden ende ceremonien ende ordeelen soudt bewaren, ⁺ende leuen ende dat hy v vermenichfuldighe, ende v ghebenedijde, int lant daer ghy in gaet, om dat ick besitten.

+ D

17

Maer eest dat v herte afghekeert wort, ende ghi niet hooren en wilt, ende dat ghi door verdoeltheyt bedroghen sijnde vreemde goden aenbidt, ende hen dient,

18

soo segghe ick v heden te voren, dat ghi vergaen sult, ende luttel tijts blijuen int lant daer ghy nv ouer die Iordane gaende sult incomen, om dat te besitten.

19

Ic aenroep heden hemel ende aerde tot ghetuyghen, dat ick v te voren gheleyt hebbe het leuen, ende dat goet, die benedijdinghe ende die vermaledijdinghe. Daerom so verkiest dat leuen, op dat ghi ende v saet leuen moecht

20

ende bemint den Heere uwen Godt, ende weest sijnder stemmen ghehoorsaem, ende blijft hem by (want hy is v leuen ende die lancheyt uwer daghen) opdat ghy moecht woonen in dlant, waerom dat die Heere uwen vaderen ghesworen heeft, Abraham, Isaac ende Iacob, dat hy hen dat gheuen soude.