Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺DIt sijn die woorden des verbonts welc die Heere Moysi gheboden heeft, dat hy maken soude metten kinderen van Israhel, int lant van Moab, behaluen dat verbont dwelc hi met hen ghemaect hadde in Horeb.

+ A

2

Ende Moyses heeft gheheel Israhel gheroepen, ende tot hen gheseyt. Ghy hebt ghesien alle die dinghen, welck die Heere ghedaen heeft voor v in dlant van Egipten, Pharao ende alle sijnen dienaers, ende alle sijnen lande,

3

groote becoringhen die welcke v ooghen ghesien hebben, die teekenen ende ouergroote wonderlijcke wercken,

4

Ende die Heere en heeft v gheen verstandich herte, noch siende ooghen, noch ooren die hooren mochten ghegheuen tot opden dach van heden toe.

5

Hy heeft v veertich iaren gheleydt door die woestijne, v cleederen en sijn niet versleten, ende die scoenen van uwen voeten en sijn van outheden niet vergaen,

6

Ghy en hebt gheen broot gheten, noch gheenen wijn oft verhueghelijcken dranck ghedroncken, om dat ghy weten soudt dat hy die Heere v lieder Godt is,

7

Ende ghy sijt tot deser plaetsen comen, ende Sehon die coninck van Hesebon is wt ghetrocken, ende Og die coninck van Basan comende ons teghen ten strijde, ende wij hebbense verslaghen

8

ende haer lant inghenomen, ende dat te besitten ghegheuen, Ruben ende Gad, ⁺ende den haluen gheslachte van Manasse.

+ B

9

Daerom bewaert die woorden van desen verbont ende volbrenghet die, op dat ghy verstaen moecht, al wat ghy doet.

10

Ghy staet heden al te samen voor den Heere uwen Godt, v Princen ende gheslachten ende ouders, ende leeraers alle dat volck van Israhel,

11

uwe kinderen ende huysvrouwen ende die vreemdelinghen die by v inden leghere woonen wtghenomen die boschouwers, ende die ghene die water aen halen,

12

dat ghi soudt ouer comen in dat verbont des Heeren ws Gods, ende in den eedt den welcken die Heere uwe Godt heden met v lieden vastmaect,

13

om dat hy v soude verwecken tot sijn volck, ende uwe Godt soude wesen, ghelijck hy v gheseyt heeft, ende ghelijck hy uwen vaderen ghesworen heeft, Abraham, Isaac, ende Iacob,

14

Ende ick en maeck dit verbont ende desen eedt niet vaste met v lieden alleen,

15

maer met allen den ghenen die hier teghenwoordich sijn, ende die hier niet teghenwoordich en sijn.

16

⁺Want ghy weet wel, hoe dat wij ghewoont hebben int lant van Egipten, ende hoe wij ghegaen sijn doort midden der natien, door die welcke gaende

+ C

17

hebdi ghesien hen afgrijselijcheden ende vuylicheden, dat is hen afgoden, hout ende steen, siluer ende gout die welcke sij eerden,

18

op datter by auontueren onder v lieden niemant en sij man oft vrouwe, familie oft gheslachte, wiens herte heden vanden Heere onsen Godt afghekeert is, dat hy soude willen gaen ende dienen den goden van dien natien, ende dat alsoo onder v lieden soude wesen een wortel voortbrenghende galle ende bitterheyt,

19

Ende als

[p. *179]

hy die woorden van desen eedt sal ghehoort hebben, dat hi dan si seluen in sijn herte ghebenedijde segghende. Ic sal vrede hebben, ende wandelen in die quaetheyt mijns herten ende dat die dronckersse tot haer neme den dorstigen,

20

ende dat die Heere hen dit niet en vergheue, Maer dan sal sijn heete gramscap ende sijn ialoursheyt aldermeest rooken teghen dien mensche, also dat op hem sullen sitten alle die vermaledijdinghen, die in desen boeck gheschreuen sijn, ende dat die Heere sijnen naem doe ver gaen onder den hemel,

21

ende hem verderue tot dat hy hem vernielt heeft wt alle die gheslachten van Israhel nae die vermaledijdinghen die in den boeck deser wet ende verbonts begrepen sijn,

22

Ende dat naecomende gheslachte ende die kinderen die daer nae sullen gheboren worden, ende die wtlanders die van verre ghecomen sijn sullen segghen, als sij sien sullen die plaghen van dien lande, ende die siecten daer die Heere die mede ghepijnicht sal hebben,

23

⁺met solfer ende met den brant der sonnen die verbrandende, alsoo datmen dat niet meer en besaeye ende datter niet groens wt en wasse nae die gelijckenisse der verderffenissen van Sodoma ende Gomorrha, Adama, ende Seboim, welck die Heere omghekeert heeft in sijnen torn, ende heete gramschap

+ D

24

ende alle die lieden sullen segghen. Waerom heeft die Heere desen lande aldus ghedaen? Ende wat is desen grooten torn van sijnder onghemetender gramscappen?

25

Ende sij sullen antwoorden. Om dat sij des Heeren verbont verlaten hebben, dat hy met haren vaderen vast ghemaect heeft, als hy die leyde wt dat lant van Egipten,

26

ende sij hebben den vreemden goden ghedient, ende hen aenbeden die sij niet en kenden, ende dien sij niet en waren toeghescict,

27

Daerom is die gramschap des Heeren verstoort teghen dit lant, dat hy daer op brenghen soude alle die vermaledijdinghen, die in dit boec ghescreuen sijn,

28

ende hy heeftse wt haren lande verdreuen met gramscappen ende met eenen rasenden moet, ende met die alder grootste verbolghentheyt, ende hy heeftse verworpen in een vreemt lant, ghelijc dat heden blijckelijck is.

29

Die verborghen dinghen behooren den Heere onsen Godt toe, die openbaer sijn ons ende onsen kinderen tot inder eewicheyt, dat wi doen souden alle die woorden van deser wet.