Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺ENde Moyses metten ouders van Israhel hebben den volck gheboden, segghende. Bewaert allen tghebodt dat ick v heden ghebiede,

+ A

2

Ende als ghy ouer die iordane sult ghegaen sijn in dlant dat die Heere uwe Godt v gheuen sal, soo suldi seer groote steenen oprechten ende die met calc effen maken,

3

alsoo dat ghy daer in moecht scrijuen, alle die woorden van deser wet, als ghy ouer die iordane sult comen sijn, om te gaen int lant dat die Heere v Godt v gheuen sal, een lant van melck ende honich vloeyende, ghelijck hy uwen vaderen ghesworen heeft,

4

Daerom als ghy ouer die iordane ghepasseert sult sijn, soo recht op die steenen die welcke ick v heden beuele opden berch Hebal, ende ghy sultse met calck effen maken,

5

ende daer eenen outaer timmeren den Heere uwen God van steenen daer gheen yser aen ghenaect en heeft,

6

ende van rouwen ende onghehouwen steenen, ende ghi sult daer op den Heere uwen Godt offeren brantofferanden,

7

⁺ende ghi sult hem oock offeren vreedtofferanden, ende ghy sult daer eten ende vrolijck maeltijt houden voor den Heere uwen Godt,

+ B

8

Ende ghy sult scrijuen op die steenen alle die woorden van deser wet besceedelijck ende claerlijck.

9

Ende Moyses met die priesters van der Leuiten gheslachte, hebben gheseyt tot alle die van Israhel. Aenmerct ende hoort toe Israhel. Heden sijdi ghemaect des Heeren ws Godts volck,

10

ghy sult nae sijn stemme hooren, ende doen die gheboden ende rechte ordeelen die ick v heden ghebiede.

11

Ende Moyses heeft den volcke op dien dach gheboden, segghende.

12

Dese sullen staen om den Heere te ghebenedijden opden berch Garizim als ghi ouer die iordane sult ghegaen sijn, Symeon, Leui, Iudas, Issachar, Ioseph, ende Beniamin,

13

Ende daer tseghen ouer sullen dese staen opden berch Hebal om te vermaledijden, Ruben, Gad, ende Aser, ⁺ende Zabulon Dan, ende Nephtali.

+ C

14

Ende die Leuiten sullen wtspreken, ende met luyder stemmen segghen tot alle die mannen van Israhel.

15

Vermalendijt sij die mensch, die eenich ghesneden ende ghegoten afgods beelt maket, een afgrijselijckheyt des Heeren, een hantwerck der constenaren, ende dat stellen sal int heymelijck, ende alle tvolck sal antwoorden ende segghen, Amen.

16

Vermalendijt sij hy die niet en eert sijnen vader ende moeder, ende alle tvolck sal segghen, Amen.

17

Vermalendijt sij hi die sijns naesten palen verstelt ende alle tvolck sal segghen, Amen.

18

Vermalendijt sij hy die eenen blenden inden wech doet dolen, ende alle tvolck sal segghen, Amen.

19

Vermalendijt sij hy die dat recht verkeert vanden wtlander, weese ende weduwe, ende alle tvolck sal segghen, Amen.

20

Vermalendijt sij hy, ⁺die by sijns vaders huysurouwe slaept, ende ontdect dat decsel van sijnen beddeken, ende alle tvolck sal segghen, Amen.

+ D

21

Vermalendijt sij hy, die hem met eenighe beeste versaemt, ende alle tvolck sal segghen, Amen.

22

Vermalendijt sij hy, die by sijn suster slaept, die sijns vaders oft sijns moeders dochter is, ende alle tvolck sal segghen, Amen.

23

Vermalendijt sij hy, die by sijn sweerinne slaept, ende alle tvolck sal segghen, Amen.

24

Vermalendijt sij hy, die al heymelijck sijnen naesten slaet, ende alle tvolck sal segghen, Amen.

25

Vermalendijt sij hy, die eenighe ghiften neemt, om te slaen die ziele van donnoosel bloet, ende alle tvolck sal segghen, Amen.

26

Vermalendijt sij hy, die niet en blijft in die woorden van deser wet, ende metten wercken die niet en volbrenghet, ende alle tvolck sal segghen, Amen.