Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel

1

⁺ENde als ghy int lant sult comen sijn, dwelck die Heere uwe Godt v te besitten sal gheuen, ende ghy dat sult vercreghen hebben ende daer in ghewoont,

+ A

2

soo suldi van allen uwen vruchten nemen die ierste vruchten ende die in eenen corf legghen ende gaen ter plaetsen welc die Heere uwe Godt vercoren sal hebben, datmen sijnen naem daer aenroepen soude,

3

ende ghi sult gaen aen den priester, die in dien daghen sijn sal, ende hem segghen. Ick belijde heden voor den Heere uwen God dat ic comen ben int lant waer af dat hy onsen vaderen ghesworen hadde, dat hi ons dat gheuen soude,

4

Ende die priester dien corf wt uwer hant ontfanghende sal dien stellen voor den outaer des Heeren ws Gods,

5

ende ghy sult segghen voor dat aenscijn des Heeren ws Godts. Die Syrier veruolchde mijnen vader, die welck is neder ghegaen in Egipten, ende daer heeft hy een vreemdelinck gheweest in seer cleynen ghetale, ende hy is ghewassen tot een groot ende sterck volck ende van ontelliker menichten.

6

⁺Ende die Egiptenaers hebben ons swaerlijck verdruct, ende ons veruolcht seer swaer lasten oplegghende,

+ B

7

ende wij hebben gheroepen tot den Heere onser vaderen Godt, die welc heeft ons verhoort, ons ootmoedicheyt aenghesien, ende onsen arbeyt ende benautheyt

8

ende hi heeft ons wt Egipten gheleyt, door een stercke hant, ende met eenen wtghestrecten arm, met grooten anxt, door veel teekenen ende wonderlijcke wercken

9

ende hy heeft ons ghebracht tot in dese plaetse, ende ons gheleuert een lant vloeyende van melck ende honich

10

ende daer om offere ick v nv die ierste gauen van die vruchten des landts, dwelck die Heere my ghegheuen heeft, Ende ghi sult die laten voor dat aenschijn des Heeren ws Godts, ende als ghy den Heere uwen Godt sult aenbeden hebben,

11

dan suldy met vruechden maeltijd houden van allen den goede dat die Heere uwe Godt v ghegheuen sal hebben, ende uwen huyse, ghy ende die Leuijt, ende die vreemdelinck die met v is.

12

Als ghi die thiende van allen uwen vruchten heel vergadert hebt, soo suldi die ten derden iare der thienden, gheuen den Leuijt, den vreemdelinghen ende wee-

[p. *176]

sen ende der weduwen, ⁺dat sij die eten moghen binnen uwe poorten ende versaet worden,

+ C

13

ende ghi sult segghen voor dat aenschijn des Heeren ws Godts. Ick heb van mijnen huyse ghebracht dat gheheylicht is, ende heb dat ghegheuen den Leuijt ende vreemdelinck, ende weese ende weduwe, ghelijck ghy my gheboden hebt, ic en heb v gheboden niet ouertreden, noch v beuel vergheten,

14

Ick en heb daer af niet gheten in mijnen rouwe, nocht die wtghedeylt tot eenighe onsuyuerheyt, noch daer af yet ghedaen tot eenigher dooder wtuaert, Ick heb des Heeren mijns Godts stemme onderdanich gheweest, ende alle dinghen ghedaen, alsoo ghy my beuolen hebt.

15

Siet nederwaert van uwer heylichster plaetsen ende van die hooghe wooninghe der hemelen, ende ghebenedijt uwen volc Israhel, ⁺ende dat lant dwelc ghy ons ghegheuen hebt, ghelijck ghy onsen vaderen ghesworen hebt, den lande dat van melck ende honich vloeydt.

+ D

16

Heden heeft die Heere v Godt v gheboden, dat ghy doen soudt dese gheboden ende rechte ordeelen, ende dat ghy die bewaren ende volbrenghen soudt, wt v gheheel herte ende wt v gheheel ziele.

17

Ghy hebt heden den Heere vercoren dat hi v Godt soude sijn, ende dat ghy soudt in sijn weghen wandelen, ende sijn ceremonien ende gheboden, ende rechten bewaren, ende dat ghy sijnen beuele soudt ghehoorsaem sijn.

18

Siet die Heere heeft v heden vercoren dat ghy sijn eyghen volck soudt sijn, ghelijc hy v gheseyt heeft, ende dat ghy alle sijn gheboden soudt onderhouden,

19

ende hi sal v stellen bouen alle natien, die welcke hy ghescapen heeft tot sijnen loue, ende naem ende glorie, dat ghy soudt een heylich volck des Heeren ws Godts sijn, ghelijck hy gheseyt heeft.