Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺EEst datter eenighe sake is tusschen die sommighe ende dat sij die rechters aenroepen, soo sullen sij die victorie der rechtuaerdicheyt gheuen, den ghenen dien sij sien sullen dat rechtuerdich is, Wien sij sien ongoddelijc, dien sullen sij der ongoddelijcheyt doemen.

+ A

2

Maer eest dat sij sien dat die misdadighe slaghen verdient heeft, soo sullen sij hem nederworpen ende voor hen doen staen, na die mate der sonden, sal die mate der slaghen wesen,

3

also nochtans dat die bouen tghetal van veertich niet en gaen, op dat v broeder niet mismaectelijc ghequetst voor v ooghen wech en gae.

4

Ghi en sult den muyl vanden osse niet toebinden die v coren opden dorschvloer wt tredende is.

5

Als twee broeders tsamen woonen, ende dat die eenen van hen sonder kinderen ghestoruen is, soo en sal die huysurouwe vanden ouerledenen gheenen anderen man nemen, maer sijn broeder sal haer nemen, ende sijns broeders saet verwecken,

6

ende den iersten sone die hi van haer wint, ⁺sal hi noemen metten naem van dien dooden, dat sijnen naem niet en vergae wt Israhel.

+ B

7

Maer eest dat hi sijns broeders huysvrouwe niet en wilt nemen, die hem vander wets weghen toebehoort, soo sal die vrouwe gaen ter stadt poorten, ende aenroepen die ouders ende segghen. Mijns mans broeder en wilt sijns broeders saet niet verwecken in Israhel, noch my tot een huysvrouwe nemen,

8

ende sij sullen ter stont dien man doen by hen halen, ende hem vraghen.

Eest dat hi antwoort. Ick en wil haer tot een huysurouwe niet nemen,

9

soo sal die vrouwe by hem comen voor die ouders, ende sijnen schoen van sijnen voet nemen ende in sijn aensicht spouwen, eude segghen. Also sal dien man ghescieden, die sijns broeders huys niet op en timmert,

10

Ende sijnen naem sal in Israhel ghenoemt worden, het huys vanden ontscoeyden.

11

⁺Eest sake datter twee mans teghen malcanderen eenighen twist hebben, ende dat den eenen tseghen den anderen beghint te kijuen, ende dat die huysvrouwe van den eenen, haren man wilt verlossen wt die hant des gheens die stercker is, ende dat sij haer hant wtreyct ende grijpt sijn scamelheyt,

+ C

12

soo suldi haer die hant af snijden, ende v ouer haer niet laten booghen door eenighen bermherticheyt.

13

Ghy en sult in v sacken gheen verscheyden ghewichten hebben, meerder ende minder,

14

noch in v huys en sal gheen meerder ende minder mate wesen,

15

ghy sult een rechtuaerdich ende warachtich ghewicht hebben, ende v mate sal ghelijc ende warachtich wesen, op dat ghy moecht langhen tijt leuen op dlant, welc die Heere uwe Godt v sal ghegheuen hebben.

16

⁺Want v Heere veronwaerdicht den ghenen die sulcke dinghen doet, ende hy heeft een afkeeren van allen onrechtuerdicheyt,

+ D

17

Ghedenct wat v Amalec opden wech ghedaen heeft als ghi wt Egipten quaemt,

18

hoe dat hy v te ghemoet quam, ende versloech die achterste van uwen heyr die van vermoetheyden achter bleuen sittende, als ghi van hongher ende arbeyt mat waert, ende dat hi Godt niet gheureest en heeft,

19

Daerom soo wanneer die Heere uwe Godt v sal ruste ghegheuen hebben ende alle die natien der heydenen rontsomme onder v bedwanc gebrocht, so suldi Amalecs naem te niet doen van onder den hemel, Wacht v dat ghi dit niet en verghetet.