Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺EEst dat een man een wijf trout, ende dat hy die gehadt heeft, ende die sijnen ooghen niet wel en behaecht, om eenige vuylicheyt, so sal hy eenen sceybrief scrijuen, ende dien in haer hant gheuen, en latense wt sijnen huyse gaen,

+ A

2

Ende als sij wt ghegaen sijn sal, ende eenen anderen man sal ghetrout hebben,

3

ende dat die haer oock haet, ende haer oock eenen scheybrief gheeft, ende laetse wt sijnen huyse gaen, oft dat hy emmer ghestoruen is,

4

soo en sal dieierste man haer niet moghen wederom tot sijnder huysvrouwen ontfanghen, want sij is besmet, ende afgrijselijc gheworden voor den Heere, op dat ghy v landt niet en doet sondighen, dwelck die Heere v Godt v sal gheuen te besitten.

5

Als een man onlancs een huysvrouwe ghetrout heeft, soo en sal hi ter orloghen niet trecken, noch hem en sal niet nootelijcs vander ghemeynten weghen beuolen worden, maer hy sal sonder scult hem thuys ledich houden, dat hi een iaer met sijnder huysurouwen mach vrolijckwesen.

6

⁺Ghy en sult den ondersten ende den oppersten molensteen niet nemen te pande, want sulck heeft v sijn ziele by ghestelt.

+ B

7

Eest datmen iemant beuint verleydende sijnen broeder vanden kinderen van Israhel, ende dat hy dien vercocht hebbende, den prijs ontfanghen heeft, dien sal men dooden, ende ghy sult dat quaet wech doen wt dat midden van v.

8

Wacht v neerstelijc dat ghi die siecte der lazerien niet en crijcht, maer ghy sult doen alle dat v die priesters vander Leuiten gheslachten leeren sullen, na dat ic hen beuolen hebbe ende volbrengt dat sorchuuldichlijck.

9

Weest ghedachtich wat die Heere uwe Godt Marien ghedaen heeft onder weghen, doen ghi wt Egipten ginct.

10

Als ghi van uwen naesten eenich dinc wedereysschen sult dat hi v sculdich is so en suldi in sijn huys niet gaen, om eenen pant te halen

11

maer ghi sult buyten staen, ende hy sal v voortbrenghen dat hi heeft,

12

Maer eest dat hi arm is, so en sal die pant bi v niet vernachten,

13

⁺maer ghi sullet hem ter stont weder gheuen voor der sonnen onderganc, op dat hi in sijn cleedt slapende mach v ghebenedijden, ende dat ghy moecht rechtuaerdicheyt hebben voor den Heere uwen Godt.

+ C

14

Ghi en sult den loon niet weygheren van uwen behoeftighen ende armen broeder, ende den wtlander die met v int lant woont, ende is binnen uwe poorten

15

maer opden seluen dach suldi hem den loon van sijnen arbeyt gheuen voor der sonnen onderganc, want hi arm is ende onderhout daer mede sijn leuen, dat hy tseghen v niet en roepe aen den Heere, ende v dat voor een sonde gherekent

[p. *175]

worde.

16

Die vaders en sullen voor die kinderen niet ghedoot worden, noch die kinderen voor die vaders, maer een yeghelijck sal voor sijn sonde steruen.

17

Ghy en sult dat recht vanden vreemdelinck ende weese niet verkeeren, noch ghi en sult het cleedt van een weduwe voor eenen pandt niet nemen.

18

⁺Ghedenct dat ghi in Egipten ghedient hebt, ende dat die Heere uwe Godt, v daer wt verlost heeft Daerom beueel ick v, dat ghi dit dinck doet.

+ D

19

Als ghi v coren sult ghemaeyt hebben op uwen acker, ende dat ghi eenen scoof daer verghetende ghelaten hebt, soo en suldi niet wederom gaen om dien te halen, maer ghi sult den vreemdelinck, ende die weese, ende weduwe, dien laten wech halen, dat die Heere uwe Godt v mach ghebenedijden in alle die wercken uwer handen.

20

Eest dat ghi die vruchten vanden olijfboomen verghadert, soo en suldi niet weder comen om te vergaderen al datter achter bleuen is, maer ghi sult dat den vreemdelinghen weesten ende weduwen laten.

21

Eest dat ghi uwen wijngaert af snijt, soo en suldi die achterghebleuen druyuen niet vergaderen, maer die sullen comen ten behoeue vanden vreemdelinghen weesen, ende weduwen.

22

Ghedenct dat ghi oock ghedient hebt in Egipten ende daerom beueele ick v dat ghi dit dinck doet.