Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺EEn ghescent man, wiens mannelijcke leden onderghebroken oft afghehaelt sijn, oft diens mannelijcheyt vore afghesneden is, en sal in die vergaderinge des Heeren niet comen.

+ A

2

Een bastaert dat is van een oneerbaer vrouwe gheboren, en sal in die vergaderinghe des Heeren niet comen tot die thienste generatie.

3

Een Ammoniter ende Moabiter (ooc na die thienste generatie) en sullen in des Heeren vergaderinghe niet comen inder eewicheyt,

4

om dat sij v niet en wilden te ghemoete comen met broot ende water op den wech, als ghi wt Egipten comen waert, ende om dat sij Balaam Beors sone van Mesopotamien des lants van Sirien teghen v ghehuert hadden, dat hy v soude vermaledijden,

5

ende die Heere uwe God en heeft niet willen Balaam hooren, ende hy verkeerde sijn maledijnghe in v benedijnghe, om dat hi v lief hadde.

6

Ghi en sult met hemlieden gheenen paeys maken, noch en soect hemlieden gheen goet, alle die daghen ws leuens inder eewicheyt.

7

⁺Ghi en sult den Edumiter niet versmaden, want het is v broeder, nocht ooc den Egiptenaer, want ghi hebt een vreemdelinc gheweest in sijn lant.

+ B

8

Die van hen gheboren sijn, sullen ter derder generatien moghen comen in die vergaderinghe des Heeren.

9

Als ghi tseghen v vianden sult trecken ter orloghen, soo suldi v bewaren van allen quaden dinghen.

10

Eest sake datter onder v lieden iemant is die door eenen droom des nachts besmet is, die sal buyten den legher gaen,

11

ende niet weder keeren, voor dat hi teghen den auont hem met water ghewasschen heeft, ende nae der sonnen onderganc sal hi wederomme inden legher comen.

12

Ghi sult een plaetse hebben buyten den legher, daer toe ghi wt gaen sult om uwer natueren gheuoech te doen,

13

een scuppeken aen uwen riem draghende, ende als ghi gheseten sijt soo suldi rontsomme grauen, ende metter eerden die ghi wt ghegrauen hebt, suldi bedecken

14

tghene daer ghy af verlicht sijt, ⁺Want die Heere uwe Godt wandelt int midden vanden legher om dat hi v verlossen soude ende v vianden in v handen leueren, ende dat uwen legher mach heylich wesen ende datter gheen vuylicheyt in ghesien en worde, op dat hy v niet en verlate.

+ C

15

Den knecht die tot v gheuloden is en suldi sijnen Heere niet wederom leueren,

16

maer hy sal by v blijuen woonende, terplaetsen daert hem belieuen sal, ende hy sal rusten in een van uwen steden, en wilt hem niet bedroeuen.

17

Daer en sal gheen ghemeyn vrouwe wesen, van die dochteren van Israhel, Noch gheen hoereerder vanden sonen van Israhel.

18

Ghi en sult den loon van een hoere, oft die weerde van eenen hont, niet offeren in des Heeren ws Godts huys, ende wat dat is dat sij ghelouen, Want het is beyde een afgrijselijcheyt, voor den Heere uwen Godt.

19

Ghy en sult uwen broeder gheen ghelt, oft graen oft eenich ander dinck op woecker leenen,

20

maer eenen vreemden, ⁺maer uwen broeder suldy leenen alle dat hem van noode is, sonder woecker, dat die Heere uwe Godt v ghebenedijde, in allen v werck int lant daer ghy in comen sult om dat te besitten.

+ D

21

Als ghi den Heere uwen Godt een ghelofte doet soo en suldi dat niet wtstellen te betalen, want die Heere uwe Godt sal dat versuecken, ende eest dat ghy langhe beyt, soo sal v dat tot een sonde gherekent worden.

22

Eest dat ghi niet ghelouen en wilt, soo suldi sonder sonde sijn,

23

maer dat eens wt uwen lippen ghegaen is, dat suldi onderhouden ende doen, alsoo ghi dat den Heere uwen Godt belooft hebt, ende ghelijck ghy met uwen eyghenen wille ende monde ghesproken hebt.

24

Als ghi gaet in ws naesten wijngaert, soo etet wijndruyuen soo vele alst v lust, maer en draechter gheen met v buyten.

25

Eest sake dat ghy coemt in ws vrients coren, soo suldi die aeren breken ende metter hant wrijuen, maer metter seysenen en suldy die niet afpicken.